6 اسباب هيخلوكي تحبي الروج المات !
الروج المات من الحاجات اللي في بنات كتير بيحبوه لانه بتبقى الوانه جريئة وكثيفة وبتدي لوك حلو اوي للشفايف احلى من الروج اللي بيلمع, احنا النهاردة هنقول لكل بنات حوا حاجات بتميز الروج المات وهتخليكي تحبيه اكتر.
تعالوا نعرف مع بعض 6 اسباب هيخلوكي تحبي الروج المات:
1- ماشي مع الموضة جدا:
اول سبب هيخلينا نستخدمه انه طالع موضة جدا وطبعا كل بنات حوا بيكونوا حريصين يمشوا على الموضة ويجربوا كل حاجة جديدة, وهو مش مجرد موضة وبس لا بيدي كمان لوك وشكل احلى للشفايف.
2- بيظهر الشفايف:
لو عايزة لوك جريء وتظهري شكلك شفايفك اكتر يبقى لازم تستخدمي الروج المات لانه بيحدد الشفايف وبيظهرها جدا اكتر من الروج اللي بيلمع وبيديها لون كثيف, وبيخلي شكل الشفايف مخملي جدا, وحتى هيخليكي مش محتاجة تحطي اي ميكب تاني معاه لان هو لوحده هيديكي لوك حلو.
3- بيدوم فترة طويلة:
طبعا معظمنا بيشتكي ان الروج مش بيثبت ولو هنقضي اليوم كله بره بنكون محتاجين روج يثبت معانا طول اليوم, عشان كده في الحالة دي هتكون انسب حاجة ليكي هو الروج المات لانه بيتميز بثباته جدا وممكن يقعد معاكي طول اليوم حتى مع الاكل والشرب بعكس الروج اللي بيلمع بيتمسح بسرعة ومش بيثبت.
ممكن تشوفوا من هنا انواع روج مات من مايبيلين و اوريفليم.
4- تقدري تستخدميه اي وقت طول السنة:
الروج المات من الانواع المناسبة لاي وقت ولكل المواسم, يعني في الشتا مثلا ممكن تعتمدي على الالوان الدافية والغامقة زي التوتي والنبيتي, وفي الصيف ممكن تستخدمي الالوان الفاتحة عشان تمشي مع جو الصيف زي درجات الوردي والميزة انه في الصيف هيثبت معاكي ومش هيسيح من الحرارة والرطوبة اللي بتبوظ مكياجنا دايما, يعني هتقدري تستخدميه في اي وقت هيكون مناسب جدا.
5- رسمه اسهل على الشفايف:
الروج المات عشان بيكون تقيل شوية ومخملي بعكس الروج اللي بيلمع فهتقدري تتحكمي فيه اكتر وانتي بترسمي شفايفك وتظبطيه على حدود الشفايف وميخرجش بره شفايفك.
6- مش هيتلغبط منك:
في مشكلة بتقابل بنات كتير مع الروج اللي بيلمع لو في يوم هوا مثلا وشعرك بيطير الشعر بيلزق في الروج وبيضايقنا والاكتر بقى انه بيبقى شعرنا فيه روج وبيجي على وشنا والروج بيتلغبط والدنيا كلها بتبوظ :) , لكن الروج المات هيخلصك من المشكلة دي بشكل نهائي لان لونه ثابت ومش بيطلع بسهولة فهيريحنا جدا مهما كان الجو مش هنبقى شايلين هم انه يبوظ مننا يعني هتحطيه وتنسيه خالص.
اعرفي معانا ازاي تختاري الوان الروج اللي تليق على لون بشرتك.