اتعرفي معانا على الاكلات المفيدة لبشرتك
بشرتنا طبيعي بتتأثر بالجو حوالينا وتغيير المواسم واحنا دلوقتي كمان داخلين على حرارة الصيف والرطوبة وده هيأثر اكيد على بشرتنا اكتر عشان كده لازم اننا منهملش الاهتمام ببشرتنا ابدا بس غير الماسكات الطبيعية والمرطبات والحاجات الخارجية في الاهم وهو الاهتمام الداخلي بالبشرة لان جمال البشرة بيبدأ من جوه الجسم الاول وده بينعكس على بشرتنا بشكل ايجابي , عشان كده احنا هنقول لكل بنات حوا النهاردة الاكلات المفيدة لبشرتك واللي هتخليها دايما صحية ومنورة ونضرة وصافية.
تعالوا نعرف مع بعض ايه هي اكتر الاكلات المفيدة لبشرتك:
1- الافوكادو:
الافوكادو احنا اتكلمنا عنه اكتر من مره وداخل في كتير من ماسكات البشرة لكن فايدة الافوكادو مش بس في الماسكات او الاستخدام الخارجي لكن اكله كمان مفيد جدا وخصوصا لموسم الربيع والصيف اللي في كتير من البنات بيعانوا من حساسية بشرتهم في الموسمين دول, كتري من اكل الافوكادو هيحمي بشرتك من احمرار والتهاب الجلد لانه غني جدا بفيتامين E والفيتامين ده بيحمي البشرة كمان من الجذور الحرة اللي بتسبب التجاعيد وبتجدد خلايا الجلد.
2- الفراولة:
مع الصيف وحرارة الجو البشرة طبيعي بتعرق كتير وبتفرز زيوت زيادة وده بيسد مسام البشرة وبالتالي بيسبب ظهور الحبوب والبثور اللي بتشوه شكل بشرتنا, هنا بيجي دور الفراولة هي مش بتمنع العرق لكن بتمنع افراز الزيوت الزيادة على البشرة وبكده مسام البشرة مش هتتسد ومش هيظهر لنا حبوب وبشرتنا تبقى دايما صحية وصافية.
3- الكوسة:
من اضرار اشعة الشمس على بشرتنا انها بتسبب الشيخوخة المبكرة للبشرة وظهور التجاعيد والخطوط الرفيعة وبقع الشمس, وعشان نتفادى كل ده ونحافظ على بشرتنا ناكل الكوسة لانها غنية بفيتامين A و C ومضادات اكسدة وده بيساعد على الحفاظ على صحة الجلد وبيحميها من التجاعيد.
4- الجريب فروت:
الجريب فروت من انواع الفاكهة المفيدة جدا للبشرة لانها بتساعد على تقشير البشرة وبتخلص البشرة من خلايا الجلد الميتة اللي بتتسبب في سد مسام البشرة.
5- الجزر:
الجزر من الخضروات الغنية جدا بمضادات الاكسدة واحنا اتكلمنا كتير عن مضادات الاكسدة وفايدتها لصحة البشرة ده غير انه فيه نسبة عالية جدا من فيتامين A المفيد جدا للبشرة واللي هيحافظ عليها ويخليها صحية, عشان كده نحرص على اكل الجزر باستمرار وهو متوفر طول السنة يعني نقدر ناكله في اي وقت ندخله في اكلاتنا او مع طبق السلطة.
6- السبانخ:
السبانخ من الخضروات الغنية بفيتامين K وده مفيدة جدا للبشرة لانه بتمنع تخثر الدم وبيقوي جدران الاوعية الدموية وده بيمنع ظهور الهالات السودا والانتفاخات والاكياس تحت العين.
لو حافظنا على اكل كل الحاجات دي هتفرق جدا في بشرتنا وهنحس انها بقت احسن وشكلها صحي ومش هنعاني من اي مشاكل فيها.
اعرفي معانا كمان ازاي اكل الدهون يخليكي اذكى !.
