9 غلطات بنعملهم في المطبخ !

ريهام محمود
ريهام محمود
9017

مافيش حد فينا طبعا مش بيدخل المطبخ يوميا , بس واحنا في المطبخ بنعمل غلطات مش بناخد بالنا منها وتقريبا هنلاقي معظمنا بيقع في نفس الغلطات دي, احنا النهاردة هنقولكم اكتر 9 غلطات معظمنا تقريبا بيقع فيهم من غيرما ياخد باله.

تعالوا نعرف مع بعض اكتر 9 غلطات بنعملهم في المطبخ:

9 غلطات بنعملهم في المطبخ
9 غلطات بنعملهم في المطبخ

1- تخزين الخضار والفاكهة مع بعض:

معظمنا تقريبا بيعمل كده ترجعي من بره تكوني شارية خضار وفاكهة تفتحي التلاجة وتستسهلي وتحطيهم مع بعض في درج واحد لكن ده غلط جدا لازم الخضار يتخزن في درج لوحده والفاكهة في درج تاني, وده ضروري لانه في بعض انواع الفاكهة بيخرج منها غاز الاثيلين زي  “التفاح والموز” والغاز ده ممكن يضر الخضار اللي حواليه ويخليه يبوظ بسرعة, كمان من الافضل اننا نخلي الفاكهة اللي ليها نواه ناشفة زي “الخوخ والبرقوق” مثلا وكمان الطماطم بره التلاجة لان درجة الحرارة الباردة جوه التلاجة ممكن تهري النسيج بتاعها وتبوظها, وخلي دايما الفاكهة اللي ممكن تتفعص زي العنب مثلا بعيد عن بعضها متخليهاش فوق بعض عشان متتفعصش وكمان عشان تديهم فرصة يوصل الهوا ليهم كويس ومتتعفنش جوه التلاجة.

تخزين الخضار والفاكهة مع بعض
تخزين الخضار والفاكهة مع بعض

2- تخزين الاكل في علب بلاستيك وهو سخن:

كلنا طبعا بيفضل عندنا بواقي اكل وبنحطه في التلاجة عشان نحميه من انه يبوظ لان التلاجة بتمنع نمو البكتيريا الضارة اللي ممكن تسبب لنا تسمم غذائي عشان كده لازم نحتفظ ببواقي الاكل في التلاجة عشان نحافظ عليها سليمة ونحافظ على صحتنا لكن الغلطة بقى اللي بنقع فيها اننا بنحط الاكل في العلب البلاستيك وهو لسه سخن وده مضر جدا لان العلب البلاستيك فيها مواد كيميائية بتتفاعل مع الاكل السخن وبتسبب لنا امراض والدراسات اثبتت انه ممكن يسبب مشاكل في الانجاب, وبعض انواع السرطان, وكمان ممكن يسبب السمنة, عشان كده من الافضل اننا نخزن الاكل في علب سيراميك او زجاج ونبعد عن البلاستيك, ولو مضطره تحطي الاكل في العلب البلاستيك يبقى حطيه الاول على طبق ميكونش بلاستيك بردوا وحطيه في التلاجة وسيبيه لما يبرد خالص وبعدين انقليه في علبة بلاستيك واقفليها.

تخزين الاكل في علب بلاستيك وهو سخن
تخزين الاكل في علب بلاستيك وهو سخن

3- شراء كميات توابل كبيرة:

في غلطة بردوا كتير مننا بيقع فيها لما بنيجي نشتري التوابل بنشتري كميات كبيرة وبنحطها في برطمانات عندنا وبنقول عشان تبقى موجودة ومش كل شوية نشتري لكن المشكلة انه بيحصل حاجتين ياما التوابل بتبوظ لما تقعد فترة طويلة ومش بنستفاد بيها كلها ونصها بيترمي وده طبعا هدر للميزانية بتاعتنا, والحاجة التانية اللي ممكن تحصل انه ناكهة التوابل بتروح ولما تحطيها في الاكل مش هتحسي بطعمها ولا هتشمي ريحتها لان التوابل دورها الاساسي بتنكه الاكل وتديه طعم وريحة حلوة لكن لما بتقعد فترة طويلة طبعا النكهة والريحة دي بتروح, عشان كده لما نيجي نشتري التوابل نحاول اننا نشتري كميات صغيرة عشان متقعدش عندنا فترة طويلة ونقدر اننا نستهلكها لحد الاخر ولما تخلص نشتري تاني ولو مافيش توابل سايبة وهي اصلا في السوبر ماركت متخزنة في برطمانات مثلا نحاول نشتري اصغر حجم منها, لما تيجي تخزني التوابل في البيت عندك حطيها في برطمانات محكمة القفل وتكون في مكان بعيد عن الحرارة والضوء المباشر عشان تحافظي على نكهتها وريحتها فترة اطول, وخلي جوه البرطمان معلقة خاصة لكل نوع توابل يعني متستخدميش معلقة واحدة لكل الانواع.

شراء كميات توابل كبيرة
شراء كميات توابل كبيرة

4- فتح الفرن اثناء طهي الطعام:

لما بنكون بنعمل حاجة في الفرن طبعا معظمنا بيفتح الفرن يطمن على الاكل من وقت للتاني عشان ميتحرقش مننا لكن فتح الفرن كل شوية ده بيخلي درجة الحرارة بتاعة الفرن تنزل والفرن بيفقد جزء كبير من حرارته وده بيخلي  الاكل ياخد فترة اطول انه يستوي, عشان كده بالكتير اوي تفتحي الفرن مره واحدة بس والاكل جوه يعني كده في نص الوقت المتوقع ان الحاجة اللي انتي حطاها تستوي افتحي بصي عليها وستات البيوت بخبرتهم بيكونوا عارفين كل اكله محتاجة وقت قد ايه عشان تستوي يعني هتقدري تحسبي بالتقريب نص الوقت وتفتحي تبصي عليها وتقفلي الفرن تاني بسرعة, او لو متوفر عندك لمبة الفرن يبقى مش هتحتاجي ساعتها تفتحي الفرن لانها هتستهل عليكي تشوفي الاكل من غير ما تفتحي عليه الفرن.

فتح الفرن اثناء طهي الطعام
فتح الفرن اثناء طهي الطعام

5- تخزين اكل فوق التلاجة:

ساعات كتير في حاجات من اللي مش بتكون محتاجة تخزين جوه التلاجة بنحطها فوق التلاجة زي العيش او المخبوزات مثلا لكن ده غلط جدا لان في حرارة بتبقى خارجة من التلاجة وده بيخلي الحاجات دي تبوظ وتتعفن, عشان كده من الافضل انها تتخزن في مكان بارد وبعيد عن الضوء المباشر يعني ممكن تحطيها جوه التلاجة نفسها او تحطيها في حاجة تكون مقفولة كويس وتخزنيها في مكان بعيد عن الحرارة والضوء المباشر.

تخزين اكل فوق التلاجة
تخزين اكل فوق التلاجة

6- رش الطاسات والصواني برذاذ ضد الالتصاق:

لما بنيجي نعمل حاجة في الفرن وبنبقى مش عايزينها تلزق بنستخدم بخاخ ضد الالتصاق اللي انتشر اوي في الفترة الاخيرة وده بيترش عشان الحاجة عندنا متلزقش لكن معظم انواع البخاخات دي للاسف مضره جدا لانها بتحتوي على مادة ثنائي الاسيتيل الكيميائية والمادة دي ممكن تسبب امراض الرئة, الافضل انك تستغني عن البخاخات دي خالص وتدهني الصينية بتاعتك بطبقة خفيفة من الزبدة او زيت جوز الهند او زيت الزيتون.

رش الطاسات والصواني برذاذ ضد الالتصاق
رش الطاسات والصواني برذاذ ضد الالتصاق

7- شوي الخضار على درجة حرارة عالية اوي:

ساعات كتير بنحب نشوي الخضار في الفرن عشان نديه طعم حلو ومختلف بس بنقع في غلطة اننا بنعلي درجة حرارة الفرن اوي عشان نخليه كريسبي ومقرمش من بره لكن ده هيخلي الخضار يتحرق من بره ومن جوه هيبقى لسه ني او مش مستوي كويس, وبالرغم انه مافيش درجة حرارة معينة تنفع لكل الخضار لكن تعتبر انسب درجة لمعظم انواع الخضار هي 400 درجة وفي اعتبارات تانية لازم تحطيها قدامك زي نوع الخضار وسمكه مثلا يعني الحاجات اللي متقطعة تخين او بحجم كبير اكيد هتاخد وقت اطول من الحاجات اللي سمكها اقل, ولما تحطي الخضار على الصينية بتاعتك خلي فيه مساحات بينهم يعني متحطيهوش فوق بعض او تلزقيه في بعضه اوي عشان تديه مساحة يستوي كويس.

شوي الخضار على درجة حرارة عالية اوي
شوي الخضار على درجة حرارة عالية اوي

8- غسل السكاكين في غسالة الاطباق:

ستات البيوت اللي بيستخدموا غسالة الاطباق وطبعا بيستسهلوا وبيحطوا كل حاجة فيها, لكن السكاكين لما بتتغسل في غسالة الاطباق بتبوظ بسرعة وبتبقى تلمة ومش بتقطع كويس وده لان غسالة الاطباق فيها ضغط مية عالي وده بيبوظ شفرات السكاكين بسرعة , فعشان تخليها حادة فترة اطول انسب طريقة انك تنضفيها على الحوض عادي بمية سخنة والصابون الخاص بغسل الاطباق وبسفنجة ناعمة, وبعد ما تغسليهم نشفيهم على طول بالفوطة عشان لو سيبتي المية عليهم بردوا هيبوظوا منك بسرعة وهتبقى مش حادة وهتتعبك في التقطيع.

غسل السكاكين في غسالة الاطباق
غسل السكاكين في غسالة الاطباق

9- غسل الفاكهة والخضار وتخزينها مغسولة:

في كتير مننا بيعملوا الغلطة دي نرجع البيت بالفاكهة والخضار اللي اشترناه ونغسله كله ونخزنه عشان نسهل على نفسنا ونختصر الوقت ويبقى جاهز على الطبخ او الاكل على طول لكن ده غلط جدا لان لما تغسليها وتخزينها اوتحطيها في التلاجة وهي مغسولة ده هيخليها تبوظ بسرعة وتعفن, الافضل انك تغسلي الكمية اللي هتاكليها اول بأول يعني تغسليها قبل ما تاكليها او تطبخيها على طول, الاستثناء الوحيد تقريبا من الموضوع ده هو المشروم وكمان ميتغسلش بشكل مباشر تحت المية هاتي فوطة نضيفة مبلولة او منديل مبلول وامسحي بيه المشروم عشان تنضفيه وبعد كده خزنيه عندك في التلاجة, لكن غير كده اي اكل تاني اغسلي كمية على قد استخدامك بس.

غسل الفاكهة والخضار وتخزينها مغسولة
غسل الفاكهة والخضار وتخزينها مغسولة

مقالات متعلقه

اسرار الطبخ من اشهر البلوجرز المتخصصين في الاكل

اسرار الطبخ من اشهر البلوجرز المتخصصين في الاكل

21 حيلة هتسهل حياتك في المطبخ مكنتيش تعرفيهم قبل كده

21 حيلة هتسهل حياتك في المطبخ مكنتيش تعرفيهم قبل كده

11 حيلة مدهشة للطبخ ميعرفهمش غير المحترفين !

11 حيلة مدهشة للطبخ ميعرفهمش غير المحترفين !