موضة جزم وصنادل صيف 2016

ريهام محمود
ريهام محمود
7615

موضة الصنادل والجزم بتتغير كل موسم وكل سنة بتنزل حاجات جديدة وفي حاجات بتبطل وفي موضات قديمة بترجع تنزل تاني, والصيف ده نازل مجموعة مختلفة من موديلات الجزم والصنادل اللي ممكن نلبسها على الجينز او على الجيب او على الفساتين.

تعالوا نشوف مع بعض موضة جزم وصنادل صيف 2016:

1- الصنادل السيلفر اللي بتلمع:

موضة الشوزات او الصنادل اللميع من الموضات القديمة اللي نزلت قبل كده لكن الموضة دي  رجعت تاني صيف 2016 وخصوصا باللون السيلفر او الفضي, ونازل منها الصنادل الكلاسيكية اللي بكعب اللي ممكن يتلبس على لبس كلاسيك لخروج بعد الضهر, والشوزات الرياضية باللون الفضي اللي ممكن تتلبس الصبح على الجينز بيبقى شكلها حلو جدا.

2- الصنادل العريضة:

النوعية دي من الصنادل نزلت من فترة ولسه موضتها مستمرة برغم انها اول ما نزلت كان في بنات كتير بيشوفوا ان شكلها مش حلو لكن بدأت تنتشر وتلاقي اقبال جدا من كتير من البنات خصوصا انها مريحة في اللبس اوي ومناسبة للبنات اللي مش بيحبوا الكعب او بيتعبهم وفي نفس الوقت بيبقوا عايزين يلبسوا حاجة عالية شوية موديل الصندل هيكون مناسب جدا ليهم.

3- الاحذية الرياضية:

الاحذية الرياضية من الموضات اللي مش بتبطل ابدا ومنقدرش نستغنى عنها لانها مريحة جدا في اللبس وعملية وممكن تتلبس على الجينز او الفستان اوالجيب القصيرة او الطويلة يعني بتليق على كل حاجة.

4- الصنادل الطويلة:

موديل الصنادل الطويلة نازل موضة اوي الصيف ده والصنادل دي بيكون موديلها طويل لحد قبل الركبة بشوية ومفتح ونازل منها اللي طولة متوسط وبيبقى ملفوفعلى الرجل,  وبيكون شيك جدا في اللبس على الحاجات القصيرة او الفساتين الطويلة المفتوحة من الجنب عشان موديل الصندل يبان لانه مينفعش يتلبس طبعا على حاجة طويلة تداري الموديل او بنطلون جينز لان موديله مش هيبان.

5- الصنادل اللي وشها عريض:

الصنادل اللي وشها عريض وبتكون مغطية الرجل كلها من قدام من الموديلات اللي نازلة موضة بردوا الصيف ده, والموديل ده مناسب اوي للبنات اللي مش بيحبوا يلبسوا الصنادل المفتوحة اوي وفي نفس الوقت مش حابين يلبسوا شوز مقفول في الصيف فالموديل مناسب جدا لانه مغطي اغلب الرجل تقريبا وفي نفس الوقت مفتوح.

مقالات متعلقه

اهم 9 قطع ملابس في صيف 2016 هيغيروا اللوك بتاعك

اهم 9 قطع ملابس في صيف 2016 هيغيروا اللوك بتاعك

موضة 2016 فساتين صيفي مع سنيكرز او كوتشي

موضة 2016 فساتين صيفي مع سنيكرز او كوتشي

الجزم الملونة قطعة اساسية في دولابك صيف 2016

الجزم الملونة قطعة اساسية في دولابك صيف 2016