25 طريقة تديكي طاقة ونشاط حالا

بقلمآية حسان فيصحة visibility3489

مفيش حد فينا مابيجيش عليه وقت فى اليوم و مابتبقاش مش قادة تعمل حاجه و عايزة تقعد من غير ولا حركة ، ومن غير ما تعمل اى حاجه . رغم انه ممكن بيبقى ورانا حاجات كتيرة عايزة تتعمل ، شغل متأخر فى المكتب او البيت عايز يتروق او حتى مذاكرة للكلية او واجبات متأخرة ، و بنبقى مضطرين اننا لازم نعمل الحاجات دى و بنبقى مكسلين جدا جدا ، خصوصا فى ايام الصيف اللى بتبقى حر جدا و كلنا بنبقى مش قادرين نقوم ، لكن خلاص ” بنات حوا ” جابتلك حلول بسيطة و سهلة جدا علشان يبقى عندك طاقة و نشاط ، فى المقال ده هنقولك على طرق كتير و مختلفة علشان تزودك طاقة و نشاط و حيوية …

25 طريقة تديكى طاقة و نشاط حالا ..

1- اتمرنى فى نص اليوم : 

طاقة و نشاط
اتمرنى

لو حسيتى بكسل فى نص اليوم و ده تقريبا لازم بيحصل كل يوم بدل ما تستسلمى للكسل وتنامى ، قاومى الكسل و قومى اتمرنى او اجرى على المشاية مثلا ، لو ماعندكيش مشاية تمرينات بسيطة زى الجرى فى المكان او نط الحبل ممتازة جدا علشان تطرد الكسل و تديكى كمية كبيرة من النشاط و الحيوية لانها بتنشط جسمك كله و بتنشط الدورة الدموية فبتديكى جرعة طاقة عالية جدا . 10 دقايق مستمرين من التمرينات الخفيفة دى هتديكى كمية طاقة و نشاط عالية تقدرى تكملى بيها يومك .

2- خدى nap : 

بو لقيتي نفسك كسلانة بزيادة و تعبانة او جسمك مرهق ومش قادرة تعملى اى تمرينات ، Nap سريعة لمد اقصاها ربع ساعة مثلا ممكن تفوقك جدا ، النوم لفترة قليلة كده خلال النهار بيديكى كمية نشاط كبيرة جدا ، و الطريقة دى فعالة جدا خصوصا للطلبة اللى بتذاكر خلال النهار وممكن يكنوا مطبقين ، النومة الخفيفة دى بتدى فرصة للمخ انه يرتب كل المعلومات اللى دخلتله و بتريحه شوية علشان تديله فرصة انه يستوعب و يكمل باقى اليوم .

3-كلى حاجه حلوة : 

اكل الحاجات الحلوة و خصوصا الشوكولاته مهمة جدا فى زيادة الطاقة و النشاط ، و ده مش بس لانه الشوكولاته طعمها حلو و كلنا بنحبها و لكن لانه الكاكاو اللى بتتعمل منه الشوكولاته بيحتوى على مواد بتدعم و تزود الطاقة فى الجسم و كمان بتحسن المود .

كلى شوكولاته
كلى شوكولاته

4- اشربى قهوة : 

فنجان قهوة واحد خلال اليوم او اول ما تصحى مثلا كفاية جدا علشان يمدك بالطاقة طول اليوم و تحميكي من الكسل ، و المفهوم الغلط انه شرب القهوة الكتير بيصحصح مش صح ابدا لانه القهوة الزيادة بتديكيى جرعة عالية من الكافيين اللى ممكن تخلى ضغطك يبقى ملخبط و بتزيد من التوتر و القلق و الانفعال ، فنجان قهوة واحد كفاية .

اشربى قهوة
اشربى قهوة

5- اخرجى : 

الخروج مهم جدا ، انزلى كل يوم و اتمشى على الاقل لمدة 20 ديقة خصوصا لو فى جنينة او فى منطقة فيها مساحات خضراء ، الخروج و التمشية بتدعم الطاقة و تزود النشاط بشكل ملحوظ و كمان بتحسن المود جدا .

6- كلى بانتظام :

 و احنا صغيرين كانوا دايما يقولولنا انه جسمنا زى العربية محتاج بنزين ، و ده صحيح جدا . ضرورى تاكلى وجبات متكاملة فى اوقات ثابتة ومنتظمة من اليوم علشان تمدى جسمك بالطاقة اول بأول ، لانه قلة الاكل بتخلى الجسم ضعيف و بالتالى كسلان .

7- حافظى على نسبة الكربوهيدرات :

زى ما الاكل مهم، مهم كمان انك تحافظى على نسبة الكربوهيدرات فى جسمك و دى بنلاقيها بالنسب اللى جسمنا بيحتاجها علشان يفضل نشيط فى الحبوب الكاملة زى القمح و الفول و العدس. 

8- اشربى مشروبات من غير سكر :

ألعصاير اللى فيها سكر”خصوصا مشروبات الطاقة ” بتفقد قيمتها الغذائية بعد ساعة واحدة بس من شربنا ليها ، علشان كده نسبة السكر الكبيرة مش هتفيدك بحاجه ، اشربى عصاير فريش اكتر من مرة فى اليوم و هتديكى كمية الطاقة و النشاط اللى جسمك محتاجهم و من غير ما  تقلقى من زيادة الوزن بسبب السكر .

9-العبى يوجا: 

زى ما قلنا ، التمارين الخفيفة اثناء وجودك فى المكتب او المطبخ هتساعدك تزودى طاقتك . الدراسات بتقول كمان انه لعب اليوجا بيفيدك تزودى الطاقة و كمان بتقلل من القلق و التوتر .اعرفى 9 فوايد لـ ” اليوجا ” هيخلوكى تبدأيها حالا

9 فوايد لليوجا هيخلوكى تبدأيها حالا

10- خلى حواليكى زرع : 

الورد او النباتات الخضراء فى البيت او المطبخ او المكتب بتديلك موود حلو جدا ، و بمجرد البص ليها هتزودك طاقة و حيوية ، خصوصا انه النباتات بتزود الاوضه بالاكسجين و بتجدد الهواء باستمرار .

11- اضحكى :D 

الضحك اتثبت علميا انه بيقلل التوتر و بيزود الطاقة ، دورى على فيديوهات تضحك و افصلى بيها من ضغط اليوم او اقعدى مع حد بتحبيه و اتكلموا شوية و اضحكى :D .

اضحكى
اضحكى

12- افتحى الستاير : 

دايما خلى الستاير مفتوحة وانتى شغالة او و انتى بتاكرى ، دخلى الشمس المكان اللى انتى قاعدة فيه علشان تجددى الجو و تغيريه ، نور الشمس و الجو الحلو قادرين يغيروا مودك للاحسن و يخلوكى نشيطة .

13- كلى لبان !

قطعة صغيرة من اللبان وانتى فى اجتماع او او انتى بتمتحنى بيخليكى نشيطة و منتبهة و بيخلوكى تركزى اكتر فى الاوقات دى .

14- فكرى بسرعة : 

ساعات النوم بيبان اسهل حل ، بس بدل م تنامى جربى تفكرى بشكل اسرع ، خلى دايما جنبك حاجة صغيرة و اقري منها بسرعه صفحتين مثلا او اتعلمى حاجه جديدة كل يوم . ده هيعود مخك انه يشتغل بشكل احسن و اسرع .

15- خدى شاور بارد : 

لما تحسى نفسك كسلانة و خلاص فصلتى ، شاور بارد فى الوقت ده لمدة 3 دقايق على الاقل هيصحصحك جدا و يزودك طاقة كبيرة خصوصا فى ايام الحرو الصيام .

16- اتنفسى بعمق : 

لما تحسى نفسك كسلانة او متوترة حاولى تاخدى نفس عميق و طويل ، التمرين ده بيجدد الاكسجين فى دمك و مهك و بيخليكى تجددى نشاطك و طاقتك .

17- اشربى مياة : 

شرب المياة مفيد جدا لتنشيط جسمك و تقويته ، مهم جدا لما تحسي بكسل او ارهاق انك تشربى كوباية مياة ، وو انتى من الناس اللى بتنسى تشرب فى mobile applications  دلوقتى بتضربفى اوقات معينة اللى بيحتاج جسمك فيها للمياة علشان تفكرك تشربى .

اشربى مياة
اشربى مياة

18- علًى الصوت :

حاولى تفصلى من الشغل و التعب الكتير و اسمعى مزيكا و ماتنسيش تعلى الصوت  علشان تصحصحى .

19- غنى : 

و انتى بتسمعى المزيكا غنى مع اغانيكى اللى بتحبيها ، الغنا هيصحصحك و ينشط عقلك و كمان هيديك نشاط و حيوية .و فى دراسة بقول انه الغناء بيزود نسبة الاكسجين فى المخ و يجدد الطاقة خصوصا لاعمار الشباب اللى فى سن الجامعة . 

اسمعى مزيكا و غنى
اسمعى مزيكا و غنى

20- اعملى حاجه بتحبيها : 

حددى لنفسك اوقات ثابتة علشان تعملى الحاجه اللى بتحبيها ، ممكن تقرأى او تلعبى رياضة او حتى تتمشى . لازم تدى لجسمك وقت يتمتع بحاجه بيحبها علشان يجدد طاقة و نشاط و يقدر يكمل اليوم .

21- اتدفى : 

فى الشتاء و الجو ساقعة ماتسيبيش نفسك سقعانة ، شغلى الدفاية او التكييف و دفى جسمك علشان درجة حرارة الجسم لما بتقل جسمك بيبقى عايزك تنامى ، لكن لما تتدفى جسمك هيديكى طاقة و نشاط و يبعدك عن الكسل .

22- اقعدى جنب الشباك : 

حاولى دايما وا نتى فى فصل المدرسة او فى المدرج او لو حتى على مكتبك انك تقعدى جنب الشباك ، الهواء الفريش و نور النهار كلهم بيساعدوكى تزودى طاقتك .

23 – خليكى اجتماعية : 

خليكى اجتماعية و عندك اصحاب و معارف تحبى تقضى وقت معاهم ، فى دراسات بتقول انه الاشخاص الانطوائيين بيميلوا اكتر للكسل و النوم ، خلى حواليكى ناس تقضى وقت و تتكلمى معاهم بطبيعتك .

24- البسى احمر :

اللون الاحمر دايما مرتبط بالثقة بالنفس و النشاط و الحيوية ، حاولى دايما تلبسى بلوزة او طرحة حمراء على الاقل مرة فى الاسبوع ، ولما تحسي بكسل بصى لحاجه حمراء . اللون ده بينبه المخ و بيجدد النشاط .  

البسى احمر
البسى احمر

25 – خليكى مفرودة : 

القعدة الطويلة على المكتب او قدام الكمبيوتر بترهق عقلك و جسمك جدا ، حاولى دايما وانتى قاعدة بتشتغلى انك تقعدى مفرودة و تبقى اكتافك لوراء كده علشان تحسي بنشاط و طاقة اعلى .