البسي الكعب باللون النيود عشان رجلك تبان اطول
الرجل الطويلة والرفيعة او الممشوقة يعني بتبقى حلم بنات كتير ومش بيعرفوا يعملوا ايه عشان رجلهم تبان اطول او هما يبانوا اطول بشكل عام لكن الموضوع ده ليه حل دلوقتي وهي الكعب باللون النيود الكعب العالي عموما بيدي طول ولكن كمان لو عايزة تباني اطول يبقى تلبسي كعب باللون النيود اللي هو بيكون نفس لون البشرة ده بيدي ايحاء بالطول شوية.
والميزة في النيود انه ممكن يتلبس على كل حاجة يعني اللون يمشي كل اللبس وكل الالوان وكمان يمشي على الكلاسيك وعلى الجينز.
بالنسبة للبنات اللي مش بيحبوا الكعب العالي او بيتعبوا منه في شوية حاجات حطيهم في الاعتبار وانتي بتشتري الشوز اللي بكعب عالي.
– اول حاجة هاتي الشوز اللي بيكون النعل اللي جوه بتاعه من النوع المطاطي او الطري مش ناشف , ابعدي عن الخشب اوالبلاستيك لان ده هيتعبك اكيد.
– اشتري المقاس المناسب لرجلك يعني ميكونش ولا ضيق ولا واسع عشان ميتعبكيش في المشي لما يكون مظبوط هترتاحي فيه.
– مش لازم نلبس الكعب العالي يوميا يعني ممكن نريح رجلنا كام يوم في الاسبوع ونلبس حاجات فلات.
– ممكن نبعد عن الشوز اللي بيكون البوز بتاعه ضيق لانه بيتعب الصوابع, اشتري افضل الشوز اللي بوزه عريض.
– وانتي ماشية بالشوز متخليش التركيز على الصوابع يعني دوسي بكعب رجلك الاول وبعدين بالصوابع, دي افضل طريقة عشان رجلك متتعبكيش مع الكعب العالي وكمان هتحافظ على توازنك وانتي ماشية.
– متلبسيش الكعب العالي لو هتمشي كتير او مسافات طويلة , دايما البسيه في المشاوير الصغيرة او لو هتكوني مش هتمشي كتير.
– مش لازم تجيبي الكعب الرفيع اوي ممكن تجيبي كعب تخين شوية عشان ترتاحي فيه اكتر وانتي ماشية, ومش لازم بردوا تجيبيه عالي اوي يعني يكون كعب معقول
– خلي دايما ضهرك مشدود ورجلك مفرودة والرجلين قريبين من بعض وانتي ماشية.
– في خدعة صغيرة ممكن تعمليها مع الشوزات اللي بكعب ممكن تحطي لزق طبي على الصباع التالت والرابع يعني تضميهم وتلزقيهم مع بعض باللزق ده هيخلي المشي بالكعب العالي اسهل بكتير.
– بعد ما ترجعي البيت وتقلعي الشوز اعملي تمارين تمدد العضلات يعني اقفي على صوابعك رجلك وبعدين نزلي كعب الرجل على الارض وارجعي اقفي على صوابعك تاني وهكذا وكرري التمرين من 6 ل 10 مرات كده ده بيريح الرجل حتى بعد المشي الطويل مش بس عشان كنتي لابسة كعب عالي.
تعالوا بقى نشوف مع بعض استايلات للبس الكعب باللون النيود:
