اسهل طريقة لرسم السمدج ايلينر فى 4 خطوات
اتكلمنا قبل كده كتير عن الايلينر eyeliner و انه بيعتبر من اهم اساسيات الماكياج دلوقتى ، لانه هو اللي بيحدد شكل رسمة العين وبيدي لوك حلو جدا وبيفرق جدا فى الشكل النهائى للماكياج ، و لانه رسم الايلينروانه يطلع مظبوط احيانا بيبقى صعب على كتير مننا و اوقات كتيرة بيطلع فيه مشاكل انه مثلا يكون مايل او عريض بزيادة ، ” بنات حوا ” جابتلك فى المقال ده طريقة جديدة خالص و سهلة جدا ترسمى بيها الايلينر بدقة و هيطلع مظبوط فى 4 خطوات بس و هى طريقة ” السمدج ايلينر ” “Smudge Eyeliner”.
اعرفى معانا اسهل طريقة لرسم السمدج ايلينر فى 4 خطوات ..
الادوات المطلوبة :
.قلم كحل ناعم ” يفضل يكون ثابت “
فرشة .
الخطوات :
الخطوة الاولى : بعد وضع الايشادو بلون فاتح, باستخدام قلم الكحل هتبدأى ترسمى خط قريب اوى اوى من خط الرموش ، ببطء هتبدأى ترسمى خط مستقيم من منتصف الجف لحد الزاوية الخارجة للعين من غير ما تشدى جفن العين لانه شد الجفن هيخلى الخط يبقى ملطش و مش متساوى .
الخطوة الثانية : كملى الخط من نص الجفن لحد الزاوية الداخية للعين ، و حاول تفضلى قريبة من خط الرموش على قد ما تقدرى .
الخطوة الثالثة : باستخدام قلم الكحل ارسمى نقط صغيرة على الجفن السفلى للعين على مسافات بعيدة من بعضها و برده خليكى قريبة جدا من خط الرموش ،علشان تحددى عنيكى اكتر ، و النقط دى كمان هتخلى خط الكحل يطلع مظبوط و متساوى اكتر من انك ترسمى خط مستقيم مرة واحدة .
الخطوة الرابعة : فى الخطوة دى هنبدأ نعمل ” السمدج “، باستخدام فرشة ماكياج امزجى نقط الكحل اللى عملناها على خط الرموش السفلى ببعضها فى حركة بطيئة و رقيقة علشان الكحل مايطلعش بره العين . و نفذى نفس الخطوة دى على الجفن العلوى لعينيكى لحد ما توصلى لخط ناعم و مستوى زى اللى فى الصورة ، و باستخدام الفرشة نعمى الكحل فى زوايا عنيكى الخارجية ، و اخر خطوة هى انك تطبقى طبقة من الماسكارا الخاصة بالتكثيف على رموشك علشان توصلى للشكل النهائى .
اختيار بنات حوا عشان تعملي اللوك ده :
1- كحل ايلينر فلورمار : كحل ممتاز من فلورمار “Flormar Ultra Eyeliner” ناعم جدا علي العين مع وقت ثبات عالي لحد 24 ساعة ومقاوم للمايه.
2- كحل ذا ون من اوريفلام : كحل هاي امباكت من اورفلام مجموعة ذا ون “The ONE High Impact Eye Pencil” ناعم جدا ومش بيحتاج إنك تبريه, مش بيسبب تكتلات أو كلكعة وبيدوم وقت طويل.
3- كحل لوريال باريس: كحل انفلايبل من لوريال “L’Oreal Paris Infallible Eyeliner” تركيبه تشبه الكريم وبيجي معاه البرايه بتعته, بيدوم حوالي 16 ساعة ومناسب جدا كمان لو عايزة ترسمي عينيكي سموكي.
