إزاي تختاري الفرشة المناسبة لنوع شعرك؟

زى ما قلنا قبل كده انه الاهتمام بالشعر اساسى و ضرورى جدا لكل بنت ، و علشان تعرفى دايما افضل و احسن الطرق اللى تهتمى بيها بشعرك ، ” بنات حوا ” بتحاول دايما تجيبلك كل حاجه جديدة علشان تفضلى تحافظى بيها على جمالك و شعرك وبشرتك ، و لأن كل بنت فينا ليها طبيعة شعر مختلفة  ولانه فرشة الشعر بنستخدمها طول الوقت و كل يوم بتعتبر اساسية جدا فى الاهتمام بشعرنا و بتأثر على صحته  ، فى المقال ده هتعرفى كل حاجه محتاجاها اشكال و خامات فرش الشعر علشان تقدرى تحددى نوع و خامة الفرشة المناسبة لشعرك.

 اشكال فرش الشعر :

1- الفرشة متوسطة الحجم: لشعر مفرود

 الفرشة متوسطة الحجم بتبقى عبارة عن فرشة مطاطية و اسنانها بتنتهى برؤوس دائرية ، علشان كده بتعتبرمن احسن انواع الفرش لانها بتعمل مساج لفروة الرأس اثناء استخدامها و بتنشط الدورة الدموية لفروة الرأس كمان ، ده غير انها منابة جدا لفك التشابك و فرد الشعر . الحشوة او التكوين المطاطى للفرشة دى بيخليها تميل مع انحناءات الرأس علشان واتى بتسرحى بيها ماتشدش شعرك او تقطعه و بتستخدم اساس علشان تفرد الشعر خصوصا لو كنتى من اصحاب الشعر اللى فتلته ناعمة و بيتفرد بسهولة حتى لو مع حرارة قليلة .

2- الفرشة المستديرة : لتجفيف الشعر بالسيشوار 

فرش الشعر المدورة مثالية لتجفيف الشعر بالسيشوار او عمل تسريحة شعر بالسيشوار و الشعر ناشف ، خصوصا لو شعرك ناعم لانها بتخلى التحكم فى شعرك اسهل و بتديله شكل ناعم و املس .

3- فرشة الاسنان المعدنية : علشان تعملى ستايل كيرلى 

النوع ده من فرش الشعر بتبقى اسنانه معدنيه علشان كده بيفضل انه ماتستخدميش الفرشة دى على شعرك و هو رطب علشان الشعر و هو رطب بيبقى ضعيف فممكن يتكسر او يتقطع لو استخدمتى عليه الفرشة دى ، بيفضل استخدامها على الشعر الجاف او اللى تم تجفيفه بالسيشوار و تستخدميها علشان تظبطى بيها اللوك الاخير لشعرك و تثبتى بيها الخصل الكيرلى ، حلوة جدا لو حبيتى تعملى شعرك كيرلىعلى خفيف او لو حبيتى تموجيه من الجذور للاطراف .

4- فرشة الاسنان الواسعه :لفك التشابك و تكثيف الشعر 

الفرشاة دى موجودة بالشكلين المدور و العادى  و جنب اسنانها بيبقى فى ثقوب صغيرة كده علشان تسمح للهواء بالمرور بين خصل شعرك و انت بتسرحيه او بتصففيه بالسيشوار ،علشان كده بتعتبر قعاله جدا فى فك تشابك الشعر ده غير انه اهم ميزة ليها و وظيفتها الاساسية هى انها بتدى لوك كثيف لشعرك و بتديله Volume .

5- فرشة فك التشابك : 

و دى فرشاة بتبقى اسنانها واسعه علشان تقدرى تحركيها بين خصلات شعرك بسهولة و تقدرى بيها تفكى التشابك او عقد الشعر بسهولة و من غير الم .

2- خامات فرش الشعر :

1- فرشة اسنانها من الشعر الطبيعى : لجميع انواع الشعر 

و النوع ده من فرش الشعر بتكون اسنانه متصنعه من شعر طبيعى علشان كده بتكون لطيفة على الشعر و فروة الرأس و بتساعد فى توزيع الزيوت الطبيعية اللى بتفرزها فروة الرأس على الشعر كله فبترطبه و تحافظ على نسيج الشعر من التقصف فبعد استخدامها بتلاحظى انه شعرك شكله ناعم و بيلمع ، علشان كده النوع ده من فرش الشعر بيكون مناسب لجميع انواع الشعر مهما اختلفت درجة نعومتها او كثافتها ، كمان الفرش دى ممتازة جدا فى فرد الشعر او لو عايزة تفرديه بعد ما كنتى عاملاه كيرلى . 

2- فرشة اسنانها من الشعر الصناعى :

النوع ده من فرش الشعر بيبقى عكس فرش الشعر الطبيعى فى كل حاجه ، لا بيوزع الزيوت على الشعر ولا بيرطبه و كمان ممكن استخدامها المتكرر يأذى الشعر و يخليه مقصف و متكسر ، علشان كده بننصح دايما انك تستخدمى فرشة من نوع الشعر الطبيعى علشان تحافظى على صحة و جمال شعرك . 

3- فرشة اسنانها من الشعر الطبيعى و الصناعى : للشعر العادى الى الكثيف

النوع ده من الفرش بتبقى اسنانه متكونه من مزيج من الشعر الطبيعى و الصناعى ، مناسبة جدا للشعر من العادى للكثيف و بتجمع بين مزايا فرش الشعر الطبيعى و فك التشابك اللى بتقوم بيه الاسنان الصناعية ، و كمان سعرها بيبقى فى المتناول . شوفى معانا كمان دليلك الكامل لـانواع فرش الشعر .