اتعرفي علي انواع فرش الشعر المختلفة!
كل بنت فينا ليها طبيعة شعر مختلفة حتى لو كان معظمنا بيتفقوا فى نوعية الشعر سواء ناعم او خشن اوغيره ، و لانه الشعر دايما هو اهم جزء من جمالك و تألقك ، مهم جدا تكونى عارفة كل حاجه عن طرق الاهتمام و العناية بشعرك . علشان كده فى المقال ده هنتكلم عن حاجة جديدة من طرق الاهتمام بالشعر وهى انواع فرش الشعر المختلفة ، بعد ما تقرأى المقال ده هتعرفى ايه هى انواع فرش الشعر و ايه هى فرشة الشعر المناسبة لطبيعة و نوع شعرك ..
يلا نعرف مع بعض ايه هي انواع فرش الشعر؟
معرفة نوع الفرشة المناسبة لشعرك مش بس هيأثر بشكل ايجابى على صحة شعرك و قوته ، لكنه كمان هيخلى تصفيفه و تسريحه اسهل بكتير ، وفى 14 نوع من فرش الشعر ولكل فرشاة استخدامها وهما :
1- الفرشة الصغيرة:
و دى الفرشاة اللى بيبقى حجمها صغير و بتقدرى تاخديها مغاكى فى شنطة ايدك ، بتقدرى باستخدامها تسرحى شعرك ة تظبطيه على السريع انتى ه فى خروجة او فى الشغل او لو مسافرة .
2- الفرشة متوسطة الحجم:
الفرشاة بالحجم ده بتعمل تنشيط لفروة الرأس و انتى بتسرحى شعرك ، كمان بتخفف من تشابك الشعر و بتساعدك فترتيبه لو شعرك من النوع اللى بيهيش وممكن كمان تساعد في تنشيف الشعر لو فضلتي تسرحي بيها شعرك لمدة 5 دقايق وهو مبلول.
3- فرشة الاسنان الطبيعية “نيلون”:
و دى فرشاة اسنانها بتبقى مصنوعة من مواد او الياف طبيعية، بتساعدك على ترتيب شعرك وخصوصا الاطراف الهايشة او المتقصفة وتسريح القصة لو عندك واحدة, و كمان مثالية لتصفيف الشعر لو شعرك قصير .
4- فرشة الاسنان المعدنية المدورة:
الفرشاة دى بتستخدم فى تصفيف الشعر بالسيشوار وبتدى شعرك كثافة وبيها بتقدرى تدى لاطراف شعرك لوك ” كيرلى” ومثالية لو عندك قصة “Curtain Bangs” اللي بتبقي انسيابية مع طول الوش ومقسومة من النص أو الجنب بنسبة بسيطة. الفرشاة دى كمان مناسبة للاستخدام مع اى نوع شعر لانها بتتحرك خلال خصل شعرك بسهولة ، و بتعتبر اهم مميزاتها انها بتسخن بدرجة حرارة زى مكواة الفرد بالضبط فبتكون حلوة جدا لفرد الشعر و تصفيفه حتى لو كان الشعر كثيف او خشن فبتديله لوك ناعم و انسيابى . بتعتبر مثالية لفرد الشعر و هو مبلول او جاف . بس لازم نبقى حريصين و احنا بنستخدمها علشان نحمى الشعر من انه يتأذى بسبب حرارتها العالية .
5- فرشة ال extension:
الفرشاة دى مثالية لو انتى عاملة extension لشعرك ، لانها بتساعدك تسرحيه بسهولة ومابتشبوكش فى ال extension ولا بتكسره او تخليه يقع من اهم مميزات الفرشاة دى انها بتستخدم لاى نوع شعر و اسنانها مالهاش رؤوس بلاستيكية فده بيخليها تقدر تفك اى تشابك بسهولة ، بس بتعتبر اهم مميزات الفرشاة دى انها بتساعدك تعملى تسريحات كتيرة لشعرك بسهولة من غير ما تضر الextension .
6- فرشة تجفيف الشعر:
الفرشاة دى نازله جديد فى السوق و فى منها انواع مختلفة ، ودى بتبقى فرشاة و سيشوار فى نفس الوقت فبتساعدك تعملى تسريحات سهلة و سريعة في تنشيف الشعر.
7- فرشة مع شعيرات ملفوفة:
الفرشة لتنشيف الشعر بالسشوار, شعيرتها الملفوفة وظيفتها انها بتموج الشعر وتخليه يبان اكتر كثافة و بتديله volume وكمان بتبين انه شعرك طبقات كتيرة فوق بعضها . مناسبة للشعر المتوسط والخشن ، حلوة جدا لتصفيف الشعر بالسيشوار لان اسنانها بتدخل جوا خصل الشعر اوى فده بيساعد فى انه حرارة السيشوار توصل للشعر كله فتطلعى بنتيجة احسن و بتخليه يبان انعم و كثيف اكتر .
8- فرشة الاسنان المختلطة:
الفرشة لتنشيف الشعر بالسشوار وتديله لوك مفرود أو ستريت مع curve او انحناء بسيط لاطراف الشعر و كمان بتديله مظهر كثيف. مناسبة للشعر المتوسط أو الطويل. اختلاف نوعية المواد اللى مكونة لاسنان الفرشة دى ” و غالبا بتكون من النايلون و الشعر الطبيعي ” بيخليها تفك التشابك و العقد و فى نفس الوقت الاسنان الطبيعية الناعمة بتحفز الدزرة الدموية لفروة الرأس و بتوزع الزيوت الطبيعية على شعرك كله اثناء التصفيف ، احسن استخدام ليها بيكون على الشعر الجاف .
9- فرشة التسريح:
انسب فرشة لتسريح الشعر, بتنشط الدورة الدموية لفروة الرأس ، بتنعم الاطراف وتفك التشابك ومثالية لعمل قصات الشعر المرفوعة. مناسبة لكل أنواع الشعر الطويل.
10- فرشة الشعر الطبيعى:
الفرشاة دى اسنانها من الشعر الطبيعى و وظيفتها انها بتنعم و تفرد الشعر وتخليه بيلمع, وبنستعملها بعد السشوار عشان تهدي الشعر الهايش. مناسبة للشعر الكثيف أو الطويل جدا وكمان للشعر القصير والمتوسط ، الفرشاة دى حلوة جدا للعر لانه باستخدامها بتديله اللمعان و المظهر الناعم الطبيعى لانها بتحفظ الدورة الدموية لفروة الرأس و باستخدامها بتوع الزيوت الطبيعية اللى بتفرزها فروة الرأس على الشعر كله و مان بتفك التشابك بلطف من غير ما تكسر الشعر او توقعه .
11- فرشة الفرد:
و دى كمان واحدة من انواع فرش تصفيف الشعر الموجودة فى السوق ، بتستخدم لفرد الشعر و مثالية لعمل قصات الشعر المرفوعة .
12- فرشة الأسنان الواسعة:
والفرشاة دى بتستخدم فى تصفيف الشعر بسهولة و بتكون لطيفة جدا على الشعر و كمان بتستخدم للتجفيف السريع للشعر ومناسبة جدا لو شعرك من النوع اللي بيحصلوا الكهربا “ستاتك” أو تطاير الشعر اللي بيحصل للشعر خصوصا بعد السشوار لانها مصممة عشان تمنع الكهربا.
13- فرشة التكثيف:
فرشة أسنانها واسعة ورفيعة بتدى لوك كثيف للشعر و volume . مناسبة لعمل تسريحات للشعر وتسريح الشعر الرفيع الهايش وتسريح الbaby hair و ده لانه بتبقى اسنانها من اطوال مختلفة فبتقدر توصل حتى للشعر القصير اوى ده بيخلى الشعر كله مفرود و بيبان كثيف .احسن استخدام ليها بيكون على الشعر الجاف .
14- فرشة فك التشابك:
الفرشاة دى بتنشط الدورة الدموية لفروة الشعر وكمان بتدلك فروة الرأس ، بتفك التشابك و بتسلك الشعر المتعقد بسهولة , ممتازة لتسريح الشعر المبلول والناشف خصوصا لو شعرك بيميل لأنه يتعقد خلال الاستحمام و بتساعدك تفكى التشابك من غير ما تشد شعرك او تسبب اى الم .وكمان مناسبة لاى نوع شعر .