19 حيلة عبقرية بالكونسيلر لازم تكوني عرفاهم !
كلنا عارفين الكونسيلر أو ” خافى العيوب ” مهم اد ايه في المكياج لانه بيداري أي عيوب أو مشاكل في الوش, سواء كانت هالات السودا تحت العين أو حبوب أو بقع .. وفي بنات كتير مش بتقدر تستغنى عنه في مكياجها أو بتستعمله هو بس للمكياج النهاري مع لمسة كحل أو مسكاارا..
احنا النهاردة جايبين لكل بنات حوا مجموعة حيل واستخدامات مختلفة هتخليكوا تستفادوا اكتر من الكونسيلر.
– تعالوا نشوف مع بعض 19 حيلة عبقرية بالكونسيلر:
1- حطي كريم الاساس وبعدين الكونسيلر:
حطي كريم الاساس الاول على البشرة وبعدين حطي الكونسيلر لان ده هيخليكي تستخدمي كمية كونسيلر اقل, لو حطيتي الكونسيلر الاول وبعدين كريم الاساس هتمسحي الكونسيلر وانتي بتطبقي كريم الاساس على البشرة.
2- حطي الكونسيلر على شكل مثلث تحت العين:
الطريقة الصح عشان تحطي الكونسيلر صح ويطلع بشكل مظبوط تحت العين انك ترسميه على شكل مثلث لحد اول الخد, والطريقة دي مش بس بتداري الهالات السودا لا كمان بتحدد المنطقة بتاعة الخد وبتنور منطقة تحت العين وبتخلي فيها اضاءة حلوة.
3- عشان تمنعي الايشادو ينزل من على الجفون:
وانتي بتحطي مكياج العين بتاعك عشان تخلي الايشادو مينزلش من على الجفون حطي طبقة خفيفة من الكونسيلر قبل ما تحطي الايشادو بتاعك الطريقة دي هتثبته على الجفون.
4- لاخفاء الحبوب في الوش:
لو عندك حباية في وشك شكلها مضايقك ممكن تداريها بالكونسيلر بانك تحطي الاول طبقة من الكونسيلر الاخضر على الحباية بالفرشة وبعدين بحتة قطنة حطي عليها بطريقة الطبطبة طبقة كونسيلر تانية بدرجة نفس لون درجة بشرتك وادمجيهم مع بعض كويس وبعدين اخر حاجة حطي البودرة هتلاقي الحباية اختفت.
5- استخدمي كريم اساس سائل بدل الكونسيلر:
لو مافيش عندك كونسيلر ممكن تعملي حيلة بكريم الاساس السائل كبديل للكونسيلر حطي نقطة من كريم الاساس وسيبيها لمدة دقايق وبعدين ادمجيها على بشرتك, طيب ايه فايدة اننا نسيب كريم الاساس دقايق قبل ما ندمجه؟ ده بيخليه ينشف شوية ويبقى سميك اكتر ويعمل تغطية كاملة للبشرة لكن لو دمجتيه على طول من غير ما تسيبيه مش هيعمل تغطية كاملة.
6- عشان تدي العين اضاءة وتظهريها:
لو عايزة تظهري منطقة العين اكتر وتخليها منورة استخدمي كونسيلر افتح من لون بشرتك بدرجة او اتنين على تلات مناطق هما الزاوية الداخلية للعين على شكل حرف V , في وسط الجفن, وعند عضمة الحاجب, الطريقة دي هتظهر العين اوي وهتديها اضاءة حلوة.
7- حطي كونسيلر برتقاني او خوخي لاخفاء الهالات:
عشان تداري الهالات السودا وتعملي لها تغطية كاملة حطي كونسيلر باللون البرتقاني او الخوخي تحت العين بالصباع البنصر لان ده اضعف صوباع ومناسب لمنطقة تحت العين لانها بتكون حساسة عن باقي البشرة, حطي كمية كونسيلر مناسبة بضغط خفيف عشان تدمجي الكونسيلر تحت العين ومن غير ما تفركي البشرة.
8- الفرق بين الوان الكونسيلر:
الكونسيلر ليه تلات الوان هما.
– الخوخي : بيداري العروق الزرقا والكدمات.
– الاخضر: بيداري البقع الحمرا على البشرة وده يعتبر افضل لون للي عندهم حب شباب بيعملها تغطية كاملة.
– الاصفر : بيوحد لون البشرة وبيخلها شكلها نضر ومنورة.
9- اخفاء انتفاخ العين:
لو عندك انتفاخات في منطقة تحت العين ادمجي كريم العين مع الهايلايتر مع الكونسيلر وحطي الخليط ده على منطقة تحت العين من بره لجوه, وعند منطقة عضمة الحاجب هتظهرها وتديها اضاءة.
10- استخدمي منديل عشان تمنعي خطوط الكونسيلر تحت العين:
بعد ما تحطي الكونسيلر بتاعك لو لقيتي فيه زيادة اوعامل خطوط تحت العين استخدمي منديل ورق اتنيه نصين واضغطي بشكل خفيف جدا على منطقة تحت العين عشان تشيلي اي زيادة او اي تكتلات تحت العين.
11- ظبطي اي لغبطة في رسمة الايلاينر:
اكيد كلنا واحنا بنرسم الايلاينر بنلغبط في الرسمة وطبعا مش هنمسحه ونبدأ من جديد لكن هنعمل حيلة بالكونسيلر عشان نظبط اللغبطة دي ونظبط رسمة الايلاينر حطي كونسيلر على الفرشة وابدأي امسحي بيها على اي لغبطة وظبطي الرسمة بتاعتك.
12- عشان تظبطي الروج على شفايفك وتظهريه:
واحنا بنحط الروج بتاعنا في اغلب الاوقات بيطلع بره الشفايف في الحالة دي حطي الكونسيلر على الفرشة وامشي بيها على حدود الشفايف هتظبط لك اي لغبطة في الروج وكمان هتظهر شكل الشفايف وتحددها اكتر.
13- عشان تخلي شفايفك شكلها ممتليء:
لو عايزة تبيني شفايفك شكلها ممتليء اكتر وتبان احلى حطي كونسيلر فاتح على منطقة وسط الشفايف وادمجيه بصوابعك على الشفايف, وبعدين حطي ملمع شفايف بلون شفايفك.
14- عشان تكبري شفايفك:
لو عايزة شفايفك تبان بشكل اكبر هتغطي الشفايف كلها بالكونسيلر وخلي الكونسيلر بره حدود الشفايف, وبعدين بقلم التحديد ارسمي شفايفك بالحجم اللي انتي عايزاه وبعدين حطي الروج وملمع الشفايف.
15- عشان تظهري شكل الحواجب وتحدديهم:
لو عايزة تظهري رسمة حواجبك وتبقى متحددة اكتر حطي كونسيلر افتح من لون بشرتك من تحت وفوق الحاجب وادمجيه بصوابعك كويس مش بالفرشة لان بالصوابع هيندمج احسن على البشرة.
16- عشان تظهري ملامح الوش وتحدديها:
لو عايزة تظهري ملامح الوش وتحدديها اعملي كونتور للوش بالكونسيلر وهنستخدم فيه درجتين كونسيلر درجة اغمق من لون البشرة بدرجتين ودرجة افتح من لون البشرة بدرجتين هنستخدم اللون الفاتح في الاماكن اللي عايزين نديها اضاءة ونظهرها عند منطقة نص الجبين, ونص الانف, وعند عضمة الحواجب, وفوق الخدين, وفوق خط الفكين, ونص الدقن, واللون الغامق هنحطه عند الجبين من فوق ومن الجانبين عند منابت الشعر, وعلى جانبين الانف, وتحت الخدين, عند خط الفكين, وبعدين هندمجهم على البشرة كويس بالفرشة.
17- عشان تبرزي عضمتين الصدر:
عضمتين الصدر اللي بيكونوا تحت الرقبة دول لما بيكونوا بارزين يعتبروا من علامات الجمال لكن في بنات بيبقى عندهم العضمتين دول مش بارزين, عشان نبرزهم هنعمل لهم كونتور زي ما عملنا للوش هنستخدم درجتين كونسيلر درجة اغمق من لون البشرة بدرجتين, ودرجة افتح من لون البشرة بدرجتين هنحط اللون الفاتح على المناطق اللي بارزة لبره واللون الغامق على المناطق اللي داخله لجوه وندمجهم مع بعض كويس بالسفنجة او بالفرشة.
18- اعملي كريمك المرطب كونسيلر:
ممكن تعملي كريمك المرطب كونسيلر يخفي عيوب البشرة هتجيبي الكريم المرطب اللي انتي بتستخدميه وتخلطي معاه شوية من الكونسيلر وبعدين تحطيه على بشرتك, ده هيبقى مرطب للبشرة وفي نفس الوقت هيداري عيوب البشرة بشكل طبيعي اوي.
19- جيبي اكتر من نوع كونسيلر:
اشتري اكتر من نوع ولون كونسيلر من الانواع والالوان المختلفة اللي احنا قولنا عليها حسب احتياجك وحسب التغطية اللي انتي عايزاها لان اكيد هتحتاجي لبشرتك اكتر من نوع واكتر من لون عشان تعملي تغطية كاملة لاي عيوب في البشرة.
انواع الكونسيلر:
– تغطية عالية:
الكونسيلر الكريمي : وده بيكون سميك, ومات او غير لامع, وبيداري حب الشباب وعيوب البشرة والهالات السودا.
ستيك الجسم : بيكون سميك, ومات او غير لامع, والنوع ده تغطيته عالية اوي بيداري الاوردة والعروق, والتاتو, والوحمات, والندوب او اثار الجروح.
ستيك الوش: بيداري حب الشباب, واي عيوب في البشرة.
– تغطية من متوسطة لعالية:
قلم الكونسيلر: بيكون سميك, ونص مات يعني في لمعة بسيطة, وده بنستخدمة عشان نحدد مناطق معينة في الوش ونظهرها ونعمل بيه كونتور للوش.
– تغطية متوسطة:
الكونسيلر السايل: بيداري الهالات السودا تحت العين, وبيوحد لون البشرة, ودمجه سهل على البشرة.
الكونسيلر السايل مع فرشة خاصة: بيداري الهالات السودا تحت العين, بيوحد لون البشرة, وبيستخدم لعمل هايلايت لو عايزين نبرز مناطق معينة في الوش زي عضمة الخد وعضمة الحاجب, دمجه سهل على البشرة.
تغطية خفيفة:
قلم مع راس معدنية: نص شفاف يعني مش خفيف اوي ولا سميك اوي, بيداري الهالات السودا وبيدي اضاءة لمنطقة تحت العين, والراس المعدنية بتعمل تبريد لمنطقة تحت العين وبتقلل الانتفاخات.
قلم مع راس على شكل فرشة: نص شفاف, بيداري الهالات السودا وبيدي اضاءة لمنطقة تحت العين, والفرشة متركبة فيه عشان يسهل عليكي دمج الكونسيلر على البشرة من غير ما تحتاجي فرشة.
شوفي معانا أفضل انواع وماركات كريم الاساس والكونسيلر
