7 طرق عشان تتخلصي من التعب بسبب قلة النوم

قلة النوم او الارق في كتير مننا بيعانوا منه سواء بسبب الدراسة او بسبب الشغل ومسئوليات وضغوط الحياة عموما اول ما بنيجي ننام بنبدأ نفكر في كل مشاكلنا ومش بنعرف ننام واكيد قلة النوم دي بتسبب لنا تعب وارهاق ذهني وجسدي وبنقوم تعبانين ومش بنقدر نواصل يومنا او نشتغل بكل طاقتنا لاننا بنبقى مرهقين, احنا النهاردة هنقول لكل بنات حوا 7 طرق تخليكي تقدري تتخلصي بيها من التعب بسبب قلة النوم عشان تقدري تواصلي وتكملي يومك بكل نشاط.

تعالوا نعرف مع بعض ايه هي الطرق اللي هتخليكي تتخلصي من التعب بسبب قلة النوم:

1- اتجنبي شرب القهوة:

طبعا كل اللي بيعانوا من قلة النوم والارهاق بسبب الارق عندهم معتقد ان فنجان القهوة الصبح هو اللي هيظبط الدنيا وهيخليهم يقدروا يكملوا يومهم ولو مشربوش القهوة يحسوا بصداع  لكن ده بيكون مجرد تعود بس,  لكن الحقيقة لو عايزة تقدري تكملي يومك وانتي مش مرهقة متشربيش قهوة لانها بتزود هرمونات الاجهاد مش بتقللها وبتخلي المشكلة تزيد بدل ما تحلها, ده غير ان القهوة بتسد الشهية وبتخليكي مش عايزة تاكلي, وبتوهمك انك عندك طاقة كافية ومش محتاجة للاكل الاساسي اللي هو هيفدنا اكتر في حالة الاجهاد, لكن لو انتي من النوع اللي مش بتقدري تستغني عن القهوة ممكن تحطيلها اضافات من الدهون الصحية والبروتين زي اللوز او جوز الهند.

2- اشربي اعشاب مفيدة:

ممكن نشرب حاجة مفيدة بالليل تساعدنا على النوم ممكن تعملي شاي اخضر او اي نوع اعشاب تفضليه زي اليانسون مثلا لانه بيهدي الاعصاب وبيساعد على النوم وتعصري عليه نص ليمونة وتشربيه قبل ما تنامي, المشروبات دي هتساعدك على النوم وهتخليكي تقومي الصبح نشيطة, وفي مشروبات غير القهوة ممكن تشربيها الصبح بتساعد على تنشيط الجسم زي الزنجبيل, والعرق السوس الدراسات اثبتت انه بيجدد الغدة الكظرية ودي المسئولة عن زيادة الطاقة في الجسم وبالتالي هينشط جسمك لما تشربي منه كوباية الصبح.

3- اقفلي تليفونك بالليل وشغلي موسيقى الصبح:

اولا قبل ما ننام نعمل تليفونا على وضع الطائرة ده المفروض عشان نعرف ننام لكن احنا طبعا اول ما بنروح على السرير بنمسك الموبايل ودي اكتر حاجة ممكن تسبب لنا الارق وقلة النوم لان المخ مش بياخد امر النوم وبيفضل شغال لان المفروض اننا نقفل كل الاجهزة سواء اللاب توب او الموبايل قبل النوم بساعة على الاقل عشان نهيء مخنا للنوم, اول ما تقومي من النوم الصبح بقى غيريه على الوضع العادي, وشغلي موسيقتك المفضلة  او اي اغنية  انتي بتحبيها لان الموسيقى بتغير المود وهتحسي بالطاقة.

4- خدي شاور بارد:

اول ما تقومي من النوم الصبح خدي شاور بارد لمدة 30 ثانية بس لان ده بيساعد على زيادة تدفق الدم وبيزود طاقة الجسم, وبيحسن حالة الجسم عموما وبيخفف الاجهاد والارهاق وبيزود الدورة الدموية.

5- افطري في خلال ساعة بعد ما تقومي من النوم:

الجسم لما بيكون في حالة ارهاق واجهاد بيضخ بشكل تلقائي هرمون الكورتيزول والادرينالين عشان يعوض نقص الطاقة في الجسم, ولو اتأخرتي في وجبة الفطار زيادة عن اللزوم ده هيخلي الهرمونات دي تشتغل بشكل اصعب, وده هيخلي حالتك المزاجية سيئة وحاسة بالارهاق طول اليوم, ده غير انه هيخليكي عايزة تاكلي حاجات فيها كربوهيدرات عشان تزودي جسمك بالطاقة لان هي المصدر الرئيسي للطاقة والكربوهيدرات لو نسبتها زادت في الجسم بتتسبب في زيادة الوزن لانها بتتحول في الجسم لسكريات وموجودة في ” المكرونة, والعيش, والارز, والبطاطس”, عشان كده وجبة الفطار لازم تكون خلال ساعة بعد ما تقومي من النوم ومتتأخريش فيها عن كده.

6- افطري فطار متوازن:

– لازم نكون حريصين اننا ناخد نسبة سكر معقولة منزودش ف نسبة السكر في الاكل.

– نضيف الدهون الصحية لوجية الفطار زي الافوكادو, وجوز الهند, او الزبدة النباتية.

– لازم وجبة الفطار يكون فيها بروتين زي البيض, وزبدة البندق او الفول السوداني, واللحوم الخالية من الدهون تختاري اي نوع بروتين تضيفيه لفطارك.

– افكار لوجبة الفطار:

ممكن تختاروا من الحاجات دي في وجبة الفطار عشان تدي جسمك طاقة طول اليوم.

1- ممكن تعملي في الفطار بيض مقلي بزبدة نباتية ومعاها خضار.

2- ممكن تعملي بيض مقلي على شريحة توست اسمر, وطبعا العيش الاسمر هو صحي اكتر.

3- جيبي شريحتين توست اسمر وتحطي فيهم جبنة بيضا مع خضار زي الطماطم والفلفل.

4- ممكن تحطي على التوست تونة معاها خس.

5- ادهني توست بالشيكولاتة او بزبدة الفول السوداني وتحطي عليه فاكهة.

6- جيبي شريحتين توست واعملي ساندوتش لانشون وجبنة رومي ومعاهم خضار خس مثلا وطماطم.

7- ممكن تاكلي التوست بعسل النحل, او المربى.

7- اهتمي بنفسك الصبح:

طبعا كلنا بنقوم الصبح كسلانين اننا نعمل حاجة في وشنا او شعرنا بس اهتمي بشكل شعرك او لفة الطرحة بتاعتك وحطي الميكب الخفيف بتاع الصبح, الحاجات دي هتشوفيها بسيطة لكن هتفرق معاكي لما تبصي في المرايا وتلاقي شكلك حلو يعني اعملي الصبح الحاجات اللي ترفع معنوياتك وتحسسك انك منتعشة وتديكي طاقة.