اعرفي معانا شخصيتك من شكل حواجبك !

كلنا عارفين ان شكل ورسمة الحواجب مهمة جدا لانها بتحدد شكل الوش وبتظهر جمال العيون لكن احنا مش هنتكلم عن رسمة الحواجب ولا ازاي ترسميهم احنا موضوعنا النهاردة مختلف هنقولك شخصيتك من شكل حواجبك, اتعملت دراسة في امريكا عن شكل الحواجب وعلاقتها بالصفات والشخصية ووصلوا ان كل رسمة حاجب اصحابها بيشتركوا في صفات معينة هنعرفها مع بعض.

تعالي اعرفي معانا شخصيتك من شكل حواجبك:

1- الحواجب اللي بطبيعتهم او اللي مش مترتبة:

صاحبة الحواجب دي شخصيتها بتتميز انها شخصية قوية وبتتصرف على طبيعتها جدا ومش بتهتم اوي بالتفاصيل وعشان كده مش بتهتم اوي بشكل حواجبها او انهم يكونوا شكلهم مترتب لانها بتعتبرها تفاصيل مش مهمة بتحب دايما تكون طبيعية اكتر, بتحب تعيش حياتها بطريقتها الخاصة وانها متكونش شبه حد.

2- الحواجب المدورين او الكيرفي:

صاحبة الحواجب المنحنية او الكيرفي هي شخصية بتتميز انها مبدعة جدا, وتنفعي جدا تكوني سيدة اعمال لان الدراسات اثبتت ان صاحبات الحواجب المقوسة بيتميزوا بثقة عالية في النفس, كمان بتميزوا انهم اجتماعيين جدا واصحاب للكل يعني اي حد يلجأ لهم مش بيخذلوه وقد المسئولية جدا, يعني اصحاب الحواجب الكيرفي هما اشخاص يعتمد عليهم جدا وقد الثقة.

3- الحواجب التخينة الطبيعية:

اصحاب الحواجب السميكة كمان شخصياتهم بتتميز بالثقة بالنفس, وانهم شخصيات جريئة جدا وحازمين في قرارتهم يعني لما بياخدوا قرار مش بيرجعوا فيه, بيحبوا دايما كل حاجة في حياتهم تكون تحت السيطرة ويكونوا متحكمين في امور حياتهم بشكل كامل.

4- الحواجب المستقيمة او المفرودة:

اصحاب الحواجب المستقيمة حياتهم مستقيمة باستقامة حواجبهم يعني بيتميزوا بشخصيات منطقية وعقلانية جدا في التفكير يعني بياخدوا قرارات بعد تفكير كويس جدا وبيحكموا عقلهم زيادة عن اللزوم في كل امور حياتهم وصعب انهم ياخدوا قرارات متهورة لانهم بيفكروا كتير قبل اي قرار, بيحبوا يعملوا لنفسهم روتين يومي يمشوا عليه ومبيحبوش يغيروه, ومن كتر ما الشخصيات دي عقلانية اوي الخبراء اللي عملوا الدراسة دي بينصحوهم انهم يخففوا شوية من العقلانية الزيادة ويجربوا يعملوا حاجة متهورة ولو مرة واحدة في حياتهم حتى لو غلطوا مش مشكلة بس الحياة بنتعلم منها بالاخطاء يعني مش عيب اننا نغلط.

5- الحواجب على شكل قوس:

صاحبة الحواجب المقوسة او اللي واخدة شكل قوس شخصيتها بتتميز انها حساسة جدا, بتحب تحتفظ بتفاصيل حياتها الخاصة بعيد عن الناس مبتحبش حد يدخل في حياتها الشخصية وبتشوف ان دي حاجة خاصة بيها مش من حق حد يدخل فيها.

6- الحواجب الرفيعين:

صاحبة الحواجب الرفيعة هي شخصية مترددة شوية لما بتجي تاخد قرار بتفكر كتير وبتحب تاخد راي كل اللي حواليها في اي قرار هتاخده عشان تقدر تحدد اختيارها, والخبراء بينصحوهم انهم يكونوا اكتر شجاعة من كده في اتخاذ القرارات ويثقوا في قراراتهم واختيارتهم اكتر.