21 تسريحة شعر بالبنس تعمليهم في دقايق
كل بنات حوا بيحبوا يجددوا في تسريحات شعرهم ويغيروا اللوك وفي نفس الوقت بيبقوا عايزين تسريحات سهلة وسريعة احنا النهاردة جايبين لكل بنات حوا اللي زهقوا من تسريحات الشعر التقليدية ومش عارفين يغيروا اللوك بتاعهم 21 تسريحة شعر بالبنس سهلة جدا مش هتاخد منكم دقايق في تنفيذها.
– تعالوا نشوف مع بعض 21 تسريحة شعر بالبنس مش هتاخد منكم دقايق:
1- لو عايزة تلمي شعرك من جنب واحد وفي نفس الوقت البنسة متكونش باينة في الشعر ممكن تعمليه بالطريقة دي انك تبرمي خصلة الشعر وتحطي البنسة تحت الشعر هتبقى متدارية ومش باينة في الشعر.
2- ممكن تعملي ضفيرة جانبية وتثبتيها ببنستين وتخلي بردوا البنس جوه الشعر عشان متبقاش باينة من بره وممكن تسيبي باقي الشعر سايب او لو حابة ترفعيه لميه مع الضفيرة واعمليه ديل حصان.
3- ممكن بقى تلوني البنس نفسها بطريقة مبتكرة عشان لما يتحطوا على الشعر يبقى شكلهم مختلف يعني ممكن نعملها زي الصورة كده اشبكي البنس في ورقة ولونيهم باي لون مانيكيرانتي تحبيه لونيهم على شكل مثلثين عكس بعض عشان لما يتحطوا على الشعر يدوا شكل حلو, ممكن تعملي ضفيرة جانبية وتحطي البنس تحتها.
4- ممكن تلمي الشعر من ورا بالبنس بشكل فوضوي مش مترتب يعني والطريقة دي طالعة موضة اوي ممكن ترفعيه كله او ترفعي جنب وتسيبي جنب وممكن من قدام تعملي ضفيرة او تبرميه او تسيبي القوصة يعني مرة تلميها ومره تسيبيها تقدري تنوعي زي ما انتي عايزة.
5- لو حابة تلمي القوصة بطريقة مختلفة ممكن تاخدي الجزء بتاع القوصة تضفيريه وتثبتيه بالبنس وتسيبي باقي الشعر سايب.
6- التسريحة دي بقى للشعر الكيرلي ممكن تلمي جنب واحد من الشعر بالبنس تحطيهم تحت بعض بشكل عشوائي, او ممكن تلمي الشعر وتعمليه كحكة مرتفعة وتحطي البنس زي الصورة كده تحت بعض وكل بنستين قصاد بعض.
7- ممكن نعمل الشعر خصلات عكس بعض ناخد خصلة من كل جنب ونلمهم على ورا عكس بعض ونثبتهم بالبنس.
8- ممكن تعملي كحكة منخفضة تسيبي القوصة من قدام وتلمي الشعر من ورا كحكة وتثبتيها بالبنس, او تحطي البنس جنب بعض في جنب من الكحكة ومتدخليهمش للاخر يعني خلي نصهم في الشعر والنص التاني يبقى باين من الشعر هيبقى شكلهم زي المروحة على الكحكة.
9- لو انتي شعرك خفيف وحابة تعملي ديل حصان ويبان مرفوع ممكن تعملي حيلة بالبنس عشان تخلي ديل الحصان بتاعك مرفوع لفوق انك تحطي بنستين من تحت ديل الحصان تخليهم واقفين وتنزلي عليهم الشعر.
10- ممكن تعملي شعرك كحكة جانبية وفي الجنب التاني حطي البنس تحت بعض وكل بنستين قصاد بعض على شكل تمانية او v مقلوبة.
11- ممكن نعمل تسريحة عادية جدا نلم الشعر من الجنب او لورا بس نحط البنس بطريقة مختلفة على الشعر ونستخدم بنس ملونة بالوان مختلفة تكون ماشية مع لبسنا مثلا.
12- التسريحة دي هتبقى حلوة جدا للشعر المجعد اوي والتقيل هتقسمي الشعر من قدام جزئين وتخلي جزء اكبر من جزء وتلمي الجزء الاكبر للجنب وتثبتيه ببنسة وبعدين تبرميه وتثبتيه بالبنس هنيجي للجزء اللي ورا هنلمه ناحية الجنب بالبنس وبعدين نبرمه زي ما عملنا في الجزء اللي قدام ونيجي على الجزء الصغير اللي سيبناه في الشعر من قدام نرجعه على ورا ونثبته بالبنس وبردوا نبرمه ونثبته كويس بالبنس.
13- ممكن تلمي شعرك كله على ورا وتبرميه وتثبتيه بالبنس.
14- ابرمي الشعر من الجنب وحطي عليه بنستين ملونين ولمي الجنبين لورا مع باقي الشعر واعملي ديل حصان.
15- لمي الشعر من الجنين لورا وثبتيهم بتلات بنس على شكل مثلث عشان تديهم شكل مختلف.
16- لمي شعرك ديل حصان عادي وحطي البنس فوق ديل الحصان على شكل شمس يعني حطي بنسه تحت وبنسه تانية فوقيها بشوية ونوعي ما بين البنس السودا والملونة عشان الشكل يبان احلى.
17- لو شعرك طويل وعايزة تجربي تخليه قصير من غير ما تقصيه ممكن تعملي حيلة بالبنس قسمي الشعر من ورا لجزئين ولمي كل جزء منهم بتوكة استك وبعدين ابرمي كل جزء لتحت وثبتيه بالبنس.
18- الطريقة دي بردوا لو حابة تلمي شعرك من قدام بس بطريقة مبتكرة هتخدي جزء من الشعر من قدام وبالمشط سرحيه بالعكس لتحت يعني عشان تنفشي الشعروبعدين جيبيه للجنب وقسميه خصلتين واعملي الخصلتين عكس بعض جيبي الخصلة اللي قدام على الخصلة اللي ورا وثبتيهم بالبنس وخدي باقي الخصلة اللي من ورا طلعيها على الشعر من قدام وكرري الخطوة تاني خدي الخصلة اللي تحتها واعمليها فوق الخصلة اللي ورا وثبتيها وهكذا لحد ما خصلة الشعر تخلص وثبتيها في الاخر ببنسه.
19- الطريقة دي كمان للشعر الكيرلي ممكن تلمي الشعر من جنب واحد وتحطي البنس فوق بعض بطريقة عشوائية مش مترتبة وممكن تستخدمي بنس بالوان مختلفة هتدي شكل حلو على الشعر.
20- ممكن تلمي جزء من الشعر من الجنب بمجموعة بنس تحت بعض بالوان مختلفة يعني حطي مجموعة بنس باللون الاحمر بعدها مجموعة باللون الازرق او اي الوان انتي تختاريها حسب ما تحبي او حسب الوان لبسك.
21- زي ما اتكلمنا قبل كده على استخدام المانيكير لتلوين بنس الشعر ممكن تجيبي مجموعة الوان مانيكير عادي وجليتر وتلوني بيهم البنس وتستخدميهم على شعرك باي طريقة من اللي احنا قولناها.
– هنقولكم كام نصيحة سريعة للبنس:
1- اول حاجة هي مشكلة بتحصلتنا كتير اوي ان البنس بتتفتح وبتبوظ من كتر الاستخدام ولما بتتفتح مش بتثبت الشعر كويس عشان تصلحيها هتجيبي الكماشة وتدوسي على البنسة من تحت هتتقفل تاني وترجع زي الاول.
2- الحاجة التانية طريقة وضع البنس في الشعر طول عمرنا بنحطها الناحية المموجة لفوق لكن الصح ان الناحية المموجة بتكون هي اللي ناحية الشعر والناحية المستقيمة هي اللي بتبقى من بره لان بالطريقة دي بتثبت في الشعر اكتر.
3- بتقابلنا دايما مشكلة ان البنس بتتزحلق وتقع من الشعر عشان تثبتيهم كويس في الشعر ممكن ترشي عليهم مثبت شعر وتسيبيهم ينشفوا وبعدين تستخدميهم هيثبتوا في شعرك ومش هيقعوا.