تقشر البشرة اسبابه ووصفات طبيعية لعلاجه
مشكلة تقشر البشرة من المشاكل اللي بيعاني منها بنات كتير, والمشكلة دي بتكون عبارة عن ظهور قشور لونها ابيض على البشرة والمشكلة دي بتضايقنا جدا لاننا مش بنعرف نحط مكياج لان القشور بتظهر زيادة مع المكياج وبتتكتل على البشرة وبيكون شكلها مش حلو خالص, احنا هنعرف النهاردة مع بعض اسباب تقشر البشرة وهنقول لكل بنات حوا وصفات طبيعية لعلاجها.
– تعالوا نعرف الاول ايه هي اسباب تقشر البشرة:
1- من اكتر اسباب ظهور المشكلة دي على البشرة هي قلة شرب المية والسوايل في الجسم فبيحصل جفاف لبشرتنا وساعتها بتظهر القشور على البشرة, عشان كده لازم نهتم جدا بشرب كمية مية كافية ميقلش عن 8 كوبايات في اليوم.
2- تغيير الجو حوالينا من الحاجات اللي بتأثر على بشرتنا جدا, عشان كده مع تغيير المناخ لازم نهتم ببشرتنا بشكل زيادة ونرطبها باستمرار عشان نحافظ عليها.
3- ممكن تظهر المشكلة دي بسبب نقص الفيتامينات في الجسم لان المشكلة بتبدأ من جوه جسمنا وبعدين بتظهر على بشرتنا, عشان كده ضروري جدا اننا نهتم باكل الفاكهة والخضار عشان جسمنا ياخد الفيتامينات اللي لزماه, ومن اكتر انواع الفاكهة اللي بيظهر تأثيرها الايجابي على البشرة هو التفاح مليان فيتامينات وبيخلي البشرة دايما نضرة ومنورة, وركزي على الخضروات اللي لونها اخضر زي السبانخ والجرجير والبقدونس والنعناع.
4- من الاسباب اللي ممكن تخلي البشرة تقشر هو التعرض الزيادة للشمس ده بيسبب جفاف البشرة وبيخليها تقشر, عشان كده لازم تستخدموا الصن بلوك قبل التعرض للشمس عشان نحمي بشرتنا.
5- النوم بالمكياج من الحاجات اللي ممكن تسبب تقشر البشرة لانه المكياج بيسد مسام البشرة وبيمنع عنها الاوكسجين ويخليها متعرفش تتنفس وده بيمنع تجدد الخلايا وبالتالي بيخليها تبقى جافة وتتقشر, فضروري جدا انك تغسلي بشرتك كويس بالغسول قبل النوم.
6- ممكن يحصل بسبب استخدام الصابون في غسل الوش لان الصابون بينشف البشرة عشان كده استخدمي غسول للبشرة مناسب لنوع بشرتك, وبعد غسيل البشرة نشفيها كويس لان لو متنشفتش كويس ده بيسبب جفاف البشرة.
– تعالوا نعرف مع بعض وصفات لعلاج مشكلة تقشر البشرة:
1- الوصفة الاولى:
المكونات:
– معلقة صغيرة عصير ليمون.
– معلقة صغيرة فازلين.
– معلقة صغيرة ملح.
طريقة التحضير والاستخدام:
اخلطي المكونات مع بعض كويس وحطيها على البشرة وسيبيها لمدة ساعة وخلال الفترة دي كل شوية دلكي البشرة في حركات دائرية بالراحة لمدة خمس دقايق, وبعدين اغسلي بشرتك بمية دافية ورطبيها بكريم مرطب, الوصفة دي من اسرع الوصفات اللي ممكن تخلصك من مشكلة تقشر البشرة وهتخلي بشرتك طرية.
2- الوصفة التانية:
المكونات:
– معلقة ارز مطحون.
– معلقة مية ورد.
طريقة التحضير والاستخدام:
اخلطي الارز مع مية الورد لحد ما يبقى عندك عجينة سهلة الفرد على البشرة, افردي الخليط على بشرتك وسيبيه لمدة نص ساعة وخلال الفترة دي دلكي البشرة, وبعدين اغسليها بمية دافية وحطي لها كريم مرطب.
3- الوصفة التالتة:
المكونات:
– معلقة كبيرة افوكادو مهروسة.
– معلقة كبيرة عسل نحل.
طريقة التحضير والاستخدام:
اخلطي العسل مع الافوكادو كويس وحطي الخليط على البشرة وسيبيه ربع ساعة وبعدين اغسلي بشرتك بمية دافية ورطبيها.
4- الوصفة الرابعة:
المكونات:
– معلقة كبيرة عسل نحل.
– معلقة صغيرة جل صبار الالوفيرا.
– معلقة صغير لبن مجفف.
– نقطتين من اي زيت عطري.
طريقة التحضير والاستخدام:
اخلطي المكونات كلها مع بعض كويس وحطيها على بشرتك وسيبيها ربع ساعة وبعدين اغسليه بمية باردة.
5- الوصفة الخامسة:
المكونات:
– نص ثمرة افوكادو.
– نص ثمرة موز.
– معلقة صغيرة زيت زيتون.
– 2 معلقة كبيرة زبادي.
طريقة التحضير والاستخدام:
اهرسي الافوكادو والموز كويس وحطي عليهم باقي المكونات واخلطيهم كويس, حطي الخليط على بشرتك وسيبيه نص ساعة وبعدين اغسلي بشرتك بمية دافية ورطبيها.
6- الوصفة السادسة:
المكونات:
صفار بيضة.
معلقة صغيرة زيت زيتون.
معلقة صغيرة عسل نحل.
كبسولة فيتامين E.
طريقة التحضير والاستخدام:
اخلطي المكونات كلها مع بعض كويس وحطيها على بشرتك وسيبيها 20 دقيقة وبعدين اغسليه بمية دافية ورطبي بشرتك.
7- الوصفة السابعة:
المكونات:
– نص معلقة كبيرة مية ورد.
– نص معلقة صغيرة كركم.
– معلقة كبيرة من اي كريم مرطب بس يكون سمكه كثيف شوية.
طريقة التحضير والاستخدام:
اخلطي الكريم مع الكركم ومية الورد وحطي الخليط على بشرتك وسيبيه نص ساعة وبعدين اغسلي البشرة بمية دافية.
8- الوصفة التامنة:
المكونات:
– معلقة كبيرة من زبدة الشيا.
– معلقة كبيرة من زيت جوز الهند.
– معلقة كبيرة من جل صبار الالوفيرا.
طريقة التحضير والاستخدام:
اخلطي المكونات كلها مع بعض وحطي الخليط على البشرة وسيبيه ربع ساعة وبعدين اغسلي بشرتك بمية دافية.
9- الوصفة التاسعة:
المكونات:
– كوباية مية دافية.
– معلقة شاي اخضر.
– كبسولة فيتامين E.
طريقة التحضير والاستخدام:
فرغي محتويات فيتامين E في كوباية المية الدافية وقلبيهم كويس وبعدين ضيفي عليهم معلقة الشاي الاخضر حطي الخليط في التلاجة لمدة ربع ساعة قبل الاستخدام وبعدين تصفية كويس وبحتة قطنة تدهني بيه بشرتك بالليل وتسيبيه للصبح وتغسليه بمية دافية, وحطي باقي الخليط في التلاجة وكرريها كل يوم.
10- الوصفة العاشرة:
المكونات:
– معلقة لوز مطحون.
– معلقة زيت ذرة او زيت لوز حلو او كريم مرطب من اللي بتستخدميه لبشرتك.
طريقة التحضير والاستخدام:
اخلطي اللوز المطحون مع الزيت او الكريم اللي انتي هتختاريه ادهني بشرتك بالخليط وسيبيه عشر دقايق, وبعدين تمسحي بشرتك بحتة قماشة ناعمة مع ضغط خفيف وانتي بتمسحيه وبعدين اغسليه بعد عشر دقايق بمية دافية, الماسك ده مش بس بيرطب البشرة وبيعالج التقشر كمان بيفتحها وبيعالج البقع الغامقة.
11- الوصفة الحادية عشر:
المكونات:
– كوباية زيت زيتون.
– ثمرة خيار.
طريقة والاستخدام:
حطي زيت الزيتون في كوباية ودفية في حمام مية يعني سخني مية وشيليها من على النار وبعدين حطي فيها كوباية زيت الزيتون لحد ما يدفى وبعدين قطعي الخيارة شرايح وحطيها في كوباية زيت الزيتون وقلبيهم كويس وسيبي الخيار منقوع في الزيت ليلة كاملة, وبعدين بحتة قطنة ادهني بشرتك بالزيت بحركات دائرية, باقي الخليط حطيه في اي علبة او برطمان واستخدميه يوميا.
12- الوصفة الثانية عشر:
اعصري اوراق النعناع وخدي العصير بتاعها ادهني بيها بشرتك, النعناع من الحاجات اللي بتساعد اوي في ترطيب البشرة وبتخلصها من التقشر.
اعرفوا معانا كمان اسباب اسمرار حول الفم ووصفات طبيعية لعلاجه.
