عادة قضم الاظافر اسبابها وطرق علاجها

عادة قضم الاظافر من العادات السيئة جدا اللي موجودة عند بنات كتير والعادة دي في الغالب بتبدأ من سن الطفولة وبتستمر في بعض الحالات لحد سن المراهقة وفي بتستمر معاهم لحد ما يكبروا ومش بيعرفوا يتخلصوا منها, وللاسف ان المشكلة دي لو متخلصناش منها ممكن تتطور لحاجات تانية تضر صحتنا, احنا النهاردة هنقول لكل بنات حوا ازاي نتخلص من عادة قضم الاظافر.

– تعالوا نعرف الاول اسباب عادة قضم الاظافر:

1- واحدة من اسباب العادة دي هو القلق والتوتر نكون قلقانين او بنفكر في حاجة عشان نقلل من التوتر نقضم ضوافرنا, او بسبب الملل نبقى قعدين فاضيين منلقيش حاجة نعملها نقعد نقرقض في ضوافرنا.

2- ممكن تكوني بتمري بمشكلة وبتفرغي طاقتك السلبية في انك تقضمي ضوافرك.

3- الحالة النفسية من اكتر الحاجات اللي بتأثر علينا بشكل سلبي ومن اكتر اسباب وجود العادة دي يعني الاحباط والاكتئاب ممكن يسببوا زيادة العادة دي عندنا.

5- احيانا يكون في جلد زيادة حوالين الضوافر او جزء زيادة في ضوافرنا بنستسهل ونشيلها بسنانا بدل ما نشيلها بالقصافة.

6- ممكن يكون مبرد الضوافر اللي بتستخدميه مش حلو ومش بيبرد الضوافر كويس وطبعا ده بيخلي الضوافر فيها زيادات بتضايقنا بنقضمها بسنانا, عشان كده ضروري تبردي ضوافرك بطريقة صح وبمبرد خشب عشان يكونوا ناعمين وشكلهم صحي.

– ايه الاضرار اللي ممكن تسببها عادة قضم الاظافر؟

اضرار العادة دي مش بتقف بس عند ضرر الضوافر وانها بتخلي شكلها مش حلو لكن ممكن تتطور وتضر صحتنا.

1- لما بنستمر في قضم الاظافر زيادة عن اللزوم ممكن نجرح نفسنا ويحصل نزيف في الجلد اللي حوالين الضوافر والجرح يبقى معرض للالتهاب, وده هينقل جراثيم وبكتيريا من الضوافر للفم وهيتسبب لينا في مخاطر صحية.

2- المشكلة التانية اللي ممكن تسببها عادة قضم الاظافر انها بتأثر على شكل السنان, لما نستمر في اننا نمارس العادة دي هتغير شكل السنان مع الوقت ويخليها مش منتظمة.

– تعالوا نعرف دلوقتي ازاي نتخلص من عادة قضم الاظافر:

1- اول حاجة عشان نحل المشكلة دي اننا نعرف سببها يعني لو انتي بتمري بمشكلة او بازمة نفسية بسبب اي حاجة بتمري بيها في حياتك حاولي تحليها يعني حلي اساس المشكلة هتلاقي لما المشكلة اتحلت انك بطلتي العادة دي من نفسك.

2- لو لقيتي نفسك هتبدأي تقضمي ضوافرك امسكي قبضة ايدك لمدة تلات دقايق في كل مره هتلاقي نفسك هتعملي كده, او ممكن تستخدمي الكورة المطاطية الخاصة بالتوتر خليها دايما جنبك واستخدميها اول ما تلاقي نفسك هتقضمي ضوافرك.

3- حافظي دايما على انك تبردي ضوافرك بشكل منتظم  ساعتها وتخلي شكلهم حلو لما هتلاقي شكلهم حلو اول ما تفكري تقضمي ضوافرك هتتراجعي عشان متشوهيش شكلهم هيصعبوا عليكي يعني انك تشوهيهم بعد ما تعبتي فيهم وبقوا شكلهم حلو :) .

4- في انواع مانيكير ومقوي اظافر مخصوص لوقف عادة قضم الاظافر بيكون طعمها مش حلو وطبعا اول ما هتبدأي تقضمي ضوافرك هتلاقي طعمها مش حلو مع الوقت هتلاقي نفسك بطلتيها, او ممكن تدهني ضوافرك بالصبار وطبعا كلنا عارفين الصبار طعمه مر قد ايه فاول ما هتبدأي تقضمي الضوافر هتلاقي طعمهم مر مع الوقت هتتخلصي من العادة دي, او ممكن تدهنيهم فازلين هيعمل نفس النتيجة معاكي.

5- لو عندك ملل ووقت فراغ كتير بيخليكي تمارسي العادة دي ممكن تملي وقت الفراغ ده بحاجة مفيدة ارسمي او اكتبي اي حاجة, او استخدمي كورة الضغط, يعني خلي ايدك مشغولة بحاجة تبعدك عن العادة دي.

6- ممكن تحطي قدامك جزر او خيار متقطع لما تلاقي نفسك هتقضمي ضوافرك كلي الخضار المتقطع ده, او اندغي لبان يعني اي حاجة تلهيكي انك تمارسي العادة دي.

7- ممكن تحطي على الضوافر لزق من بتاع الجروح عشان لما تيجي تقضمي ضوافرك هتلاقي اللزق موجود هيفكرك بالمشكلة ويخليكي تتراجعي على طول.

8- لو الموضوع صعب اوي بالنسبة لك ممكن تلبسي جوانتي لفترة لحد ما تلاقي نفسك نسيتي العادة دي.

9- في النهاية لازم يكون في ارادة قوية عندك عشان تقدري تبطلي العادة دي اي حاجة سلبية فينا اكيد محتاجة ارادة عشان نبطلها عشان كده خلي ارادتك قوية وافتكري دايما انها بتشوه شكل ضوافرك وممكن تضر بصحتك وتسبب لك امراض.