استعمالات مبتكرة للمانيكير مكنتيش تعرفيها قبل كده !

ريهام محمود
ريهام محمود
10276

كلنا تقريبا بنحب المانيكير وبندور دايما على جديد في رسومات المانيكير عشان نخلي ضوافرنا شكلها حلو ومختلف بس المانيكير استخداماته مش بس عشان نرسم بيه ضوافرنا لكن ليه استخدامات تانية كتير مفيدة, احنا النهاردة جايبين لكل بنات حوا استعمالات مبتكرة للمانيكير غير رسم الضوافر.

تعالوا نشوف مع بعض مجموعة استعمالات مبتكرة للمانيكير:

1- عشان نحافظ على الشراب من القطع:

تقريبا معظمنا بيقع في المشكلة دي الشرابات الفيليه يادوب نلبسه لبسه واحدة ونلاقيه اتنسل او اتقطع منه حته المانيكير ممكن يحل لك المشكلة دي انك تجيبي مقوي الاظافر وتحطيه على الجزء اللي اتنسل عشان توقفي القطع وميطلعش على باقي الشراب وخصوصا لو معنديش مثلا وقت تشتري واحد جديد الحيلة دي ممكن تنقذلك الموقف.

عشان نحافظ على الشراب من القطع
عشان نحافظ على الشراب من القطع

2- تلوين المفاتيح:

لو عندك مجموعة مفاتيح شبه بعض ممكن تلوينهم بالمانيكير كل مفتاح بلون عشان تعرفي تفرقي بينهم, او حتى تلوينهم عشان تديهم شكل حلو ومختلف وشكل بناتي يعني عشان احنا بنحب ندلع كل حاجة ونديها لوك بناتي مختلف :).

تلوين المفاتيح
تلوين المفاتيح

3- تلوين بنس الشعر:

ممكن بقى تعملي بالمانيكير لوك مختلف لبنس الشعر لو زهقتي من شكلهم التقليدي او لو عايزة تعملي لون البنس زي لون لبسك او لون الميكب بتاعك تقدري تلوينهم بالمانيكير باي لون انتي عايزاة وتديهم لوك حلو ومختلف وهيبقى شكلهم حلو جدا على الشعر, وممكن تلوني التوك الكلبس كمان مش بس البنس.

 وممكن تبتكري حاجة جديدة خالص بالبنس بعد ما تلوينهم اعملي بيهم حلق زي كده.

اعملي حلق من بنس الشعر
اعملي حلق من بنس الشعر

4- تصميم الخواتم والبنس:

ممكن انتي تصممي خاتم بنفسك وتلوينيه بالمانيكير لوعندك قواقع بحر ممكن تجيبيها وتلونيها اي لون مانيكير وتلزقيها على البنس او على اي حلقة عندك ممكن تتعمل خاتم او لو عندك خاتم اتكسر مثلا ممكن تعملي فيه الطريقة دي, او على توكة الشعر الطوق.

تصميم الخواتم والبنس
تصميم الخواتم والبنس

5- تلوين الاكسسوارات:

لو عندك اسورة حابة تغيري في شكلها وتديها شكل جديد ومختلف ممكن تلوينها بالمانيكير الجليتر او بالمانيكير العادي باي لون انتي تحبيه.

ممكن بردوا تستخدمي المانيكير في تلوين اي عقد عندك حابة تغيري في شكله او الخواتم والحلقان يعني المانيكير تقريبا هيغيرلك شكل الاكسسوارات بتاعتك كلها تقدري تلوينهم باي الوان انتي عايزاها وتجدديهم وتغيري في شكلهم خالص بدل ما تشتري اكسسوارات جديدة يعني هيبقى تغيير على ذوقك وفي نفس الوقت توفير في الميزانية لان تقريبا كلنا ميزانيتنا بتخرب على شرا الاكسسوارات اهو نوفر شوية :).

6- تصليح كعب الشوز:

مشكلة بتقابلنا كتير مع الشوزات اللي بتكون بكعب ان الكعب بتاعها بيقشر وبيكون شكله مش حلو خالص وبنبقى متضايقين منه وعشان تحلي المشكلة دي بطريقة بسيطة جدا هتجيبي مانيكير بنفس لون الشوز وتدهني بيه مكان التقشير هيخفيه خالص وكانها جديدة.

تصليح كعب الشوز
تصليح كعب الشوز

7- تلوين كفر الموبايل:

ممكن تدي الموبايل بتاعك لوك مختلف انك تلوني الكفر بتاعة بالمانيكير ممكن تختاري مجموعة الوان مانيكير من اللي انتي بتحبيها وتعمليها على شكل خطوط تحت بعض بالوان مختلفة وممكن تستخدمي مانيكير عادي وجليتر مع بعض وتعملي خط مانيكير عادي وخط جليتر مثلا, او تعملي عليه نقط بالوان مختلفة, او تبتكري انتي اي تصميم تحبيه.

8- تصميم للشنطة:

لو عندك شنطة سادة بلون واحد وزهقتي من شكلها ممكن تجيبي مثلا لونين او تلاتة من المانيكير وتعملي عليها خطوط بشكل عشوائي هتديها لوك مختلف وحلو وهتبقى كانها شنطة جديدة خالص.

9- لاخفاء خدش العربية:

ممكن نستخدم المانيكير في تصليح خدش العربية لو عربيتك اتخدشت ودي بتحصل كتير جدا وطبعا الخدش ده بيسبب لنا ازمة لان كل البنات بيحبوا دايما يحافظوا على حاجتهم وميكونش فيها اي غلطة وعشان متكونيش متضايقة من الخدش ده احنا جيبنالك الحل هاتي مانيكير بنفس لون العربية وادهني بيه الخدش هيختفي تماما.

لاخفاء خدش العربية
لاخفاء خدش العربية

10- تصليح بوز الشوز:

من المشاكل بردوا اللي بتقابلنا تقشير بوز الشوز وبيخلي شكلها مش حلو وطبعا بنبطل نلبسه لكن احنا هنخليكي ترجعي تلبسيه تاني بحيلة المانيكير انك تجيبي مانيكير نفس لون الشوز وتدهني البوز بيه هيرجع جديد تاني.

تصليح بوز الشوز
تصليح بوز الشوز

11- تصميم للمج:

ممكن نعمل بالمانيكير تصميم لمج النسكافية بتاعنا لو عندك مج ابيض سادة وحابة تغيري شكله جيبي لونين او تلاتة من اي الوان مانيكير تختاريها وجيبي طبق ميه وحط فيه كام نقطة من كل لون وبعدين لخبطيهم بخلة سنان بشكل عشوائي وبعدين حطي المج في المانيكير هتلاقي الالوان طلعت عليه وسيبيه ينشف خالص وكده تبقي عملتي تصميم سهل للمج بتاعك.

12- تلوين فرش المكياج:

ممكن نلون فرش المكياج بتاعتنا بنفس طريقة المج اللي احنا قولناها نحط اي الوان مانيكير في طبق فيه ميه ونحط فيه الفرش.

تلوين فرش المكياج
تلوين فرش المكياج

13- تلوين الشوز:

ممكن تدي للصندل او الشوز بتاعك شكل جديد وتلوني اجزاء منه بالوان فاقعة ومطرقعة وتجددي شكله خالص.

تلوين الشوز 1
تلوين الشوز 1

او ممكن بقى نعمل حاجة تانية نلون الشوز من تحت باي لون مانيكير نختاره والطريقة دي مع الجزم اللي بكعب بتبقى تحفة عشان اللون يكون باين من تحت.

تلوين الشوز 2
تلوين الشوز 2

14- تلوين نضارة الشمس:

ممكن تستخدمي المانيكير انك تغيري شكل نضارة الشمس بتاعك وتعملي على الفرام بتاعها نقط بالمانيكير من اي الوان تختاريها عشان تجددي في شكلها.

تلوين نضارة الشمس
تلوين نضارة الشمس

15- تلوين سماعات الودان:

ممكن ندي سماعات الودان بتاعة الموبايل شكل جديد ونلونهم بالمانيكير ممكن نلونها بكذا لون نجيب حتة لزق صغيرة نسيب الجزء اللي نلونه ونلزق الجزء اللي بعديه نلون الجزء اللي احنا عايزينه وبعدين نفك اللزق ننزلة لتحت ونلون مكانه بلون تاني وهكذا لحد ما نخلص سلك السماعات كله لحد الاخر.

تلوين سماعات الودان
تلوين سماعات الودان

16- تصميم برواز الصور:

ممكن تعملي تصميم لبرواز الصور بطريقة مبتكرة جدا جيبي مسدس الشمع واعملي بيه نقط صغيرة وسيبيها تنشف وبعدين لوني نقط الشمع باي الوان مانيكير مختلفة تختاريها ولزقيها على اي برواز عندك عايزة تجددي شكله او تعمليله تصميم.

تصميم برواز الصور
تصميم برواز الصور

مقالات متعلقه

نصايح لتجنب الفقاعات في طلاء الاظافر للحصول على مانيكير مثالي

نصايح لتجنب الفقاعات في طلاء الاظافر للحصول على مانيكير مثالي

12 حاجة كل خبراء العناية بالاظافر بينصحوكي بيها

12 حاجة كل خبراء العناية بالاظافر بينصحوكي بيها

شيلي المانيكير من غير اسيتون في ثانية واحدة !

شيلي المانيكير من غير اسيتون في ثانية واحدة !