فوايد زبدة الشيا واستخداماتها للبشرة والشعر
زبدة الشيا من الحاجات اللي انتشر استخدامها اوي الفترة الاخيرة وبقت تدخل تقريبا في اغلب منتجات البشرة والشعر وده لان ليها فوايد كتير جدا للبشرة والشعر والجسم لانها مليانة فيتامينات واحماض دهنية مفيدة جدا منها فيتامين A وفيتامين E وفيتامين D و F, واحماض امينية اساسية, وكمان مواد مضادة للاكسدة اللي بتحمي الجلد من الضرر وبتمنع التجاعيد وبتخلي الجلد صحي, احنا هنعرف النهاردة مع بعض فوايد زبدة الشيا للبشرة والشعر وازاي ممكن نستخدمها.
– تعالوا نعرف الاول فوايد زبدة الشيا للبشرة:
1- زبدة الشيا تعتبر مرطب طبيعي للبشرة بتخليها ناعمة وبتحميها من التجاعيد والخطوط الدقيقة لانها بتحفز انتاج الكولاجين اللي بيحافظ على نضارة وشباب الجلد.
2- بتنعم وتفتح المناطق الخشنة في الجسم زي الكوعين والركبتين.
3-ممكن نستخدم زبدة الشيا للجسم كله كمرطب للجسم.
4- بتساعد في تقشير الجسم وبتخلصك من الجلد الميت وتخلي البشرة والجسم صحي وناعم.
5- بتعالج حب الشباب والندبات والبقع اللي بيسببها حب الشباب بعد ما بيروح, وفيها خصائص مضادة للالتهابات.
6- مفيدة جدا في علاج حروق الشمس, ومش بس كده هي بتحمي البشرة من اضرار اشعة الشمس, وبتعالج الهالات السودا.
7- بتساعد في علاج علامات تمدد الجلد.
8- وفايدتها هايلة جدا للشفايف بترطبها وبتخليها ناعمة لانها تعتبر بلسم طبيعي للشفايف.
9- حتى كمان مفيدة للاطفال لو دهنتي بشرة الطفل بيها هتخليها دايما رطبة وناعمة.
– فوايد زبدة الشيا للشعر:
1- لان زبدة الشيا غنية بفيتامين A و E زي ما قولنا فهي من الحاجات الهايلة جدا للشعر وتعتبر بلسم طبيعي للشعر, بتساعد في علاج تقصف وتكسر وجفاف الشعر وبتنعمه وتخليه طري وصحي من غير ما تسيب رواسب دهنية على فروة الراس, وبتساعد كمان في تمليس الشعر المجعد.
2- بتعالج فروة الراس الجافة, وقشرة الشعر, وبتعالج التهاب الجلد لان فيها مواد مضادة للالتهابات والجلد بيمتصها بسرعة من غير ما تسد مسام فروة الراس.
3- بتحمي الشعر من الضرر اللي ممكن يسببه عوامل الجو زي التراب والرطوبة والحرارة, وبتحمي الشعر من ضرر اشعة الشمس لان فيها نسبة SPF , وبتحميه كمان من تأثير الملح والكلور لو حطتيها قبل السباحة بتعمل طبقة عازلة على الشعر وبتحميه.
– وصفات للبشرة من زبدة الشيا:
1- وصفة لتنعيم البشرة:
تستخدمي بس زبدة الشيا من غير اي اضافات تدلكي بيها بشرتك كويس لحد ما البشرة تتشربها خالص وتكرري ده يوميا قبل ما تنامي هتلاقي بشرتك بقت ناعمة وطرية جدا.
2- وصفة لتفتيح البشرة:
اخلطي زبدة الشيا مع شوية زيت زيتون ودلكي بيها البشرة لمدة خمس دقايق وبعد كده تمسحي بشرتك بحتة قطن بس من غير ما تغسليها.
3- وصفة لتقشير الجسم وتبييضه وتنعيمه:
المكونات:
معلقة زبدة الشيا.
معلقة زبدة الفسدق.
معلقة زيت جوز الهند.
معلقة زيت البرقوق.
معلقة سكر ناعم.
معلقة زيت اللوز.
معلقة نشا.
كام نقطة زيت اللافندر.
الزيوت كلها نجيبها من عند العطار.
طريقة التحضير والاستخدام:
هنسيح الزبدة في حمام مية وبعدين ضيفي باقي المكونات ماعدا السكر والنشا وزيت اللافندر واخلطيهم كويس مع بعض, وبعدين ضيفي السكر والنشا وزيت اللافندر واخلطي كل المكونات, وافركي جسمك بالخليط في حركات دائرية, الوصفة دي بتخلص الجسم من الجلد الميت وبتنعمه وتبييضه وكمان بتخلي ريحته حلوة بسبب زيت اللافندر.
4- وصفة لتفتيح البقع الغامقة:
اخلطي معلقة من زبدة الشيا مع معلقة عسل نحل وحطي الخليط على البشرة وسيبيه نص ساعة وبعدين اغسليه.
5- لعلاج الهالات السودا:
خدي كمية صغيرة جدا من زبدة الشيا بحجم راس الدبوس وافركيها بين صوابعك عشان تدوبيها شوية وبعدين حطيها تحت العين بطريقة الطبطبة عشان المنطقة دي حساسة ومحتاجة حركات بسيطة بس وسيبيها ربع ساعة وبعدين امسحي تحت العين بحتة قطنة وبردوا المسح بطريقة الطبطبة يكون بالراحة خالص.
6- وصفة لعمل صنفرة للبشرة:
اخلطي معلقة كبيرة من الملح الخشن مع كمية مناسبة من زبدة الشيا, وبعدين حطي الخليط على بشرتك وسيبيه خمس دقايق وبعدين اغسليه بمية دافية, وممكن تزودي كمية الخلطة شوية وتفركي بيها جسمك كله كصنفرة للجسم.
7- زبدة الشيا كلوشن للجسم:
اللوشن ده بينعم الجسم وبيوحد لونه ويفتحه, وبيغذي البشرة, وبيأخر التجاعيد.
المكونات:
25 جرام من زبدة الشيا.
معلقة كبيرة زيت جنين القمح.
3 معالق من اي نوع كريم مرطب انتي بتستخدميه.
كام نقطة من زيت الورد.
8- وصفة لعلاج تشققات الجسم والخطوط البيضا وعلامات تمدد الجلد بعد الحمل والولادة:
المكونات:
3 معالق كبيرة زبدة شيا.
وشوية زيت زيتون.
بنسبة 20% فيتامين E و C مع بعض.
طريقة التحضير والاستخدام:
اخلطي المكونات مع بعض كويس وحطيهم في علبة نضيفة واستخدميهم يوميا في تدليك الجسم ومكان التشققات وعلامات التمدد, وممكن ندهن زبدة الشيا لوحدها لعلاج علامات التمدد والخطوط البيضا, ندهن بيها الجلد كويس في حركات دائرية مرتين في اليوم مره الصبح ومره بالليل يوميا.
9- علاج تشققات الايدين والرجلين وتنعيمهم وتبييضهم:
دوبي معلقتين كبار زبدة شيا وبعدين حطي ايدك ورجلك في مية دافية لمدة من 10 ل 20 دقيقة وبعدين نشفيهم كويس وادهني ايدك ورجلك بالزبدة والبسي شراب في رجلك وجوانتي في ايدك يكونوا قطن, اعملي الوصفة دي يوميا قبل ما تنامي ونامي بالشراب والجوانتي لحد الصبح.
– وصفات للشعر من زبدة الشيا:
1- وصفة لنمو الشعر وعلاج التساقط :
اخلطي كمية مناسبة من زبدة الشيا مع شوية زيت ثوم وحطي على الشعر وفروة الراس وسيبيه ساعتين وبعدين اغسليه عادي بالشامبو والبلسم, كرري الوصفة مرتين في الاسبوع.
2- لعلاج تلف وجفاف الشعر:
دوبي الزبدة في حمام مية ونخلي بالنا ندوبها في درجة حرارة منخفضة, دلكي بيها الشعر وفروة الراس كويس وسيبيها على الشعر نص ساعة وممكن نلف الشعر بفوطة سخنة عشان تجيب نتيجة احسن, وبعدين اغسلي الشعر بالشامبو والبلسم.
3- لتنعيم الشعر:
دوبي كمية مناسبة من زبدة الشيا مع زبدة عادية وضيفي عليهم معلقة زيت جوز الهند وسيبي الخليط يبرد, وبعدين ادهني بيه شعرك وسيبيه لمدة ساعة وبعدين اغسليه بالشامبو والبلسم.
4- كبلسم للشعر:
المكونات:
نص كوباية زبدة الشيا.
نص كوباية بلسم من اي نوع بتستخدميه بس متستخدميش انواع البلسم اللي فيها بروتينات او سيليكون.
ربع كوباية من زيت الجوجوبا.
كام نقطة من اي زيت عطري.
طريقة التحضير والاستخدام:
دوبي زبدة الشيا وسيبيها تبرد وبعدين ضيفي عليها باقي المكونات واخلطيهم مع بعض كويس, واستعمليه كبلسم للشعر بعد الشامبو.
5- وصفة لتكثيف وتقوية الشعر:
دوبي معلقة كبيرة من زبدة الشيا في حمام مية وضيفي عليها معلقة كبيرة من زيت جوز الهند وسيبيه لحد ما يبرد وبعدين ادهني بيه شعرك وسيبيه ساعتين, وكرري الوصفة تلات مرات في الاسبوع بعد شهر هتلاحظوا الفرق على شعركم.
شوفوا معانا كمان فوايد الموز للبشرة والشعر.
