ازاي توسعي وسط البنطلون الجينز بخدعة ذكية ؟

بقلمريهام محمود فيمنوعات visibility20885

ساعات كتير بيحصل ان الهدوم بتاعتنا بتضيق علينا لو زدنا شوية في الوزن وبنزعل اوي لانه مبنعرفش نلبسها وخصوصا لو كانت حاجة بنحبها زي البنطلونات الجينز احنا مبنقدرش نستغنى عنها يوميا ولو في بنطلون احنا بنحبه ضاق علينا بنزعل ونضايق, لكن من النهاردة هنقدر نلبس البنطلون الجينز اللي ضاق علينا لما ننفذ الحيلة اللي احنا جايبنها النهاردة لكل بنات حوا هي حيلة ذكية جدا وبسيطة هتخليكي تقدري توسعي وسط البنطلون الجينز بتاعك بطريقة مش ملحوظة وهتعرفي تلبسيه.

ازاي توسعي وسط البنطلون الجينز
ازاي توسعي وسط البنطلون الجينز

تعالوا نعرف مع بعض ازاي توسعي وسط البنطلون:

– الحاجات اللي احنا محتاجينها:

1- مازورة.

2- مقص حاد.

3- حتة قماش جينز يكون نفس لون البنطلون بتاعك.

4- مكنة خياطة.

5- دبابيس.

6- مكوى.

ازاي توسعي وسط البنطلون الجينز
ازاي توسعي وسط البنطلون الجينز

– نيجي دلوقتي نعرف الطريقة بالخطوات:

في البداية كده لو ملقناش حتة قماش نضيفها نفس لون البنطلون بالظبط ممكن نحط حتة اغمق درجة او افتح درجة من لون البنطلون لانها اصلا مش هتبقى باينة وهيبقى الجزء ده مدراي تحت الحزام.

1- الخطوة الاولى:

اول حاجة هنشيل الجزء اللي بيتحط فيه الحزام في البنطلون من ورا ونفك الخيوط بابرة او بدبوس اي حاجة حادة متوفرة عندكم.

الخطوة الاولى
الخطوة الاولى

2- الخطوة التانية:

تاني حاجة هنعملها هنستخدم المازورة ونقيس بيها وسط البنطلون ونكتبه عشان مننسهوش, وبعدين بالمقص هنبدأ نقص البنطلون من ورا ونعمله فتحة لحد الخياطة اللي قبل جيب البنطلون, ولو عايزة توسيع اكتر عند منطقة الوركين يبقى تنزلي بالقص لتحت اكتر, حسب انتي عايزة توسعي قد ايه.

الخطوة التانية
الخطوة التانية

3- الخطوة التالتة:

قيسي محيط الوسط بتاعك واطرحي مقاس الوسط من مقاس وسط البنطلون اللي انتي اخدتيه في الخطوة اللي فاتت والرقم اللي هيطلع يبقى هو ده مقاس حتة القماش اللي انتي محتاجاها عشان تضيفيها للبنطلون بتاعك, وبعد ما تحددي مقاس حتة القماش ضيفي عليها بوصة كمان يعني جزء صغير كده زيادة عشان تعملي حساب الخياطة عشان مش بعد ما نحطها نلاقيها صغيرة وتضطري انك تفكيها وتعملي واحدة تانية ويبوظ منك.

يعني هنقول مثال عشان نوصلكم الفكرة اكتر لو مقاس وسطك مثلا 30 بوصة ومقاس وسط البنطلون 28 بوصة يبقى هنطرح 30 – 28 = 2 بوصة ونزود زي ما قولنا بوصة كمان هيبقى 2 + 1 = 3 بوصة يعني الجزء اللي احنا محتاجين نزوده هو 3 بوصة للتوسيع.

الخطوة التالتة
الخطوة التالتة

4- الخطوة الرابعة:

هنيجي لخطوة الخياطة هنظبط الاول المكنة على غرزة قصيرة وغرزة طويلة متعرجة او زجزاج.

الخطوة الرابعة
الخطوة الرابعة
الخطوة الرابعة
الخطوة الرابعة

5- الخطوة الخامسة:

بعد ما ظبطنا المكنة هنبدأ نخيط حتة القماش اللي هنضيفها للبنطلون من فوق.

الخطوة الخامسة
الخطوة الخامسة

6- الخطوة السادسة:

هنتني بوصة من حتة القماش بعد ما خيطاناها ناحية جوه ونكويها بالمكوى وندوس عليها كويس واحنا بنكويها, وبعد كده نفردها لان الحركة دي بتدي عرض اكتر لحتة القماش.

الخطوة السادسة
الخطوة السادسة
الخطوة السادسة
الخطوة السادسة

7- الخطوة السابعة:

دلوقتي هنحط حتة القماش بتاعتنا تحت الجزء اللي احنا قصناه من البنطلون, ونعلم بالقلم الجزء اللي احنا محتاجينه على قد الفتحة اللي في البنطلون وبعدين نقص بالمقص بعد العلامة بتاعتنا اللي احنا حددناها بالقلم بنص بوصة ونخيطها من الجناب زي ما خيطناها من فوق في الخطوة اللي قبل كده.

الخطوة السابعة
الخطوة السابعة
الخطوة السابعة
الخطوة السابعة
الخطوة السابعة
الخطوة السابعة

8- الخطوة التامنة:

هنجيب حتة القماش بعد ما ظبطناها وخيطناها ونحطها عند الجزء اللي احنا قاصينه في البنطلون ونثبتها بالدبابيس.

الخطوة التامنة
الخطوة التامنة

9- الخطوة التاسعة:

هنظبط المكنة على غرزة واسعة متعرجة, ونبدأ نخيط حتة القماش في البنطلون بتاعنا.

الخطوة التاسعة
الخطوة التاسعة

10- الخطوة العاشرة:

اخر خطوة هنرجع نظبط المكنة تاني على غرزة ضيقة متعرجة وقصيرة عشان نرجع الجزء اللي بيتحط فيه الحزام اللي احنا شيلناه في البداية هنخيطة تاني في البنطلون ونرجعه مكانه.

الخطوة العاشرة
الخطوة العاشرة

كده نكون خلصنا كل الخطوات بتاعتنا ووسعنا البنطلون.

توسيع وسط البنطلون الجينز
توسيع وسط البنطلون الجينز

شوفي كمان خدع للملابس لازم كل بنت تعرفها

خدع للملابس لازم كل بنت تعرفها
خدع للملابس لازم كل بنت تعرفها