11 وصفة من الكركم لجمال البشرة
الكركم مش مجرد نوع من التوابل اللي بتدي طعم حلو ومختلف للاكل بس لكن الكركم ليه فوايد جمالية كتير جدا للبشرة, حتى انه معروف من زمان ان الكركم من العادات الاساسية للعروسة الهندية قبل فرحها بتفرك بشرتها وجسمها كلها بالكركم وده لان فيه مواد مضادة للاكسدة ودي من الحاجات المهمة جدا اللي بتحافظ على صحة البشرة وبتحميها من التلف والالتهابات, ومن حب الشباب, وبتحميها من بقع البشرة وبتوحد لونها وبتفتحها, وبيساعد على تقليل التجاعيد, عشان كده احنا النهاردة هنقولكم ازاي تدخلوا الكركم في روتينكم اليومي من خلال وصفات كلها من الكركم.
تعالوا نعرف مع بعض 11 وصفة من الكركم لجمال بشرتك:
1- وصفة الكركم لتبييض البشرة:
المكونات:
– 2 معلقة كبيرة دقيق “ممكن نستخدم دقيق عادي, او دقيق ارز, او دقيق شوفان لو بشرتك جافة”.
– معلقة صغيرة كركم.
– 3 معالق كبيرة لبن.
– كام نقطة عسل نحل.
طريقة التحضير والاستخدام:
هنخلط المكونات كلها مع بعض كويس ونفرد الخليط على البشرة ونسيبه 20 دقيقة لحد ما ينشف وبعدين تغسلي البشرة بمية دافية وتدهني بشرتك بكريم مرطب.
2- لتغذية البشرة والحفاظ على نضارتها:
المكونات:
– ربع معلقة صغيرة كركم.
– 5 معالق كبيرة زبادي.
طريقة التحضير والاستخدام:
اخلطي الكركم والزبادي مع بعض كويس وادهني الخليط على بشرتك بفرشة او بايدك وسيبيه على البشرة 20 دقيقة لحد ما ينشف وبعدين اغسلي بشرتك بمية دافية.
3- صابونة الكركم لتوحيد لون البشرة وتبييضها وعلاج الحبوب:
– 3 معالق كبيرة كركم.
– معلقة كبيرة مية ورد.
– معلقة كبيرة زيت لوز حلو.
– معلقة كبيرة جلسرين.
– صابونة زيت زيتون ” من عند العطار”.
– كوباية صغيرة بقدونس مغلي.
طريقة التحضير والاستخدام:
اول حاجة هنحضر مغلي البقدونس هنحط حزمة بقدونس مع تلات كوبايات مية على النار ونسيبه يغلي شوية لحد ما يتركز ويبقى عندك كوباية صغيرة بعد ما تصفية, بعد كده هنجيب صابونة زيت الزيتون نبشرها ونحطها على عصير البقدونس اللي احنا عملناه ونحطهم مع بعض على نار هادية ونفضل نقلب فيهم لحد ما الصابون يدوب خالص, وبعد كده هنضيف علي الخليط الجلسرين وزيت اللوز ونقلبهم كويس وبعدين هنضيف الكركم ونفضل نقلب فيهم لحد ما يبقى عندنا خليط سميك نرفعه من على النار ونسيبه 3 دقايق كده يهدى شوية وبعدين نصبه في قالب بلاستيك او اي حاجة عندك بلاستيك علبة مثلا صغيرة, ونسيبه شويه لحد ما يمسك نفسه كويس ويتجمد ويبقى شبه الصابون بالظبط ونستعملها عادي نغسل بيها وشنا وجسمنا.
4- وصفة الكركم لعلاج التجاعيد:
المكونات:
– معلقة كبيرة لبن رايب او ممكن نستبدله بالزبادي.
– نص معلقة صغيرة كركم.
طريقة التحضير والاستخدام:
اخلطي اللبن الرايب مع الكركم وافردي الخليط على الوش والرقبة وسيبيه 10 دقايق, وبعدين اغسلي بشرتك بمية باردة, الوصفة دي مش بس مفيدة في علاج التجاعيد كمان بتساعد في علاج النمش.
5- لعلاج احمرار والتهاب البشرة:
المكونات:
– 2 معلقة صغيرة كركم.
– من معلقة لمعلقتين لبن الكمية حسب مايبقى عندك خليط متجانس.
طريقة التحضير والاستخدام:
اخلطي الكركم مع اللبن واحدة واحدة لحد ما يبقى عندك خليط قوامة معقول مش سايل اوي ولا سميك اوي وافرديه على البشرة وسيبيه لحد ما ينشف وبعدين اغسلي بشرتك بمية دافية.
6- لتنضيف البشرة:
المكونات:
– كبسولة فحم او حبوب فحم “موجود في الصيدلية”.
– معلقتين صغيرين كركم.
– معلقتين صغيرين عسل نحل.
– نص معلقة صغيرة زيت جوز هند.
– من نص لربع معلقة مية كمية مناسبة لحد مايبقى الخليط متجانس.
طريقة التحضير والاستخدام:
نفرغ محتويات كبسولة الفحم ولو مش موجود كبسولات ممكن نطحن حباية فحم وهتلاقوه موجود في الصيدلية ونضيف على الفحم الكركم والعسل وزيت جوز الهند والمية واحدة واحدة لعجن الخليط مع بعضه وبعدين نفرد الخليط على البشرة ونسيبه نص ساعة وبعدين نغسله بمية دافية.
7- لعلاج حب الشباب وتحسين مظهر الجلد:
المكونات:
– خل تفاح.
– نص معلقة صغيرة كركم.
– معلقة كبيرة عسل نحل.
– لبن.
طريقة التحضير والاستخدام:
هنجيب قطنة نغمسها في خل التفاح ونمسح بيها بشرتنا ونسيبه حوالي خمس دقايق وبعدين نخلط الكركم والعسل ونحطه على البشرة من غير ما نغسلها من خل التفاح يعني نحط الماسك عليه وبعدين نسيبه الخليط على البشرة 20 دقيقة وبعدين نغسله بمية دافية, وبعدين نمسح بشرتنا بقطنة فيها لبن عشان لو في اي لون اصفر باقي من الكركم على البشرة يشيله, ونكرر الوصفة مرتين في الاسبوع.
8- لعلاج الحبوب الحمرا في البشرة وتنضيف المسام وترطيب الجلد:
المكونات:
– معلقة صغيرة كركم.
– معلقة صغيرة عسل نحل.
– معلقة صغيرة زيت جوز هند “اختياري” لكن هو مفيد جدا لترطيب الجلد وفيه خصائص مضادة للجراثيم.
طريقة التحضير والاستخدام:
اخلطي المكونات كلها مع بعض كويس وافردي الخليط على البشرة وسيبيه لمدة 20 دقيقة, وبعدين اغسلي البشرة بمية دافية, وكرري الوصفة مره في الاسبوع.
9- لتبييض السنان:
هتجيبي فرشة السنان وتبليها وتحطي عليها تمن معلقة كركم وتدعكي سنانك بالطريقة العادية جدا زي ما بتعملها بالمعجون وبعدين تسيبي الكركم على سنانك 5 دقايق وبعدين اشطفي سنانك بالمية كويس, وممكن تعملي سنانك بعدها بالمعجون لو لقيتي اي لون اصفر على السنان او اللثه وبعدين تغسليها بالمية والصابون, وهتلاحظوا الفرق في بياض السنان من اول استخدام للوصفة, وممكن نضيف على الكركم تمن معلقة زيت جوز الهند.
10- لترطيب البشرة:
المكونات:
– صفار بيضة.
– نص معلقة صغيرة كركم.
– 1 معلقة صغيرة زيت زيتون.
طريقة التحضير والاستخدام:
نخلط المكونات كلها مع بعض كويس وبعدين نفرد الخليط على البشرة ونسيبه 20 دقيقة وبعدين نغسل البشرة بمية دافية, الوصفة دي مفيدة جدا للبشرة الجافة لان صفار البيض فيه فيتامين B وده بيساعد على ترطيب وتجديد البشرة, وزيت الزيتون بيحافظ على رطوبة البشرة.
11- ازالة الشعر الزائد وتقليل نموه:
المكونات:
– نص فنجان كركم.
– لبن.
طريقة التحضير والاستخدام:
هنجيب الكركم ونحط عليه كمية لبن مناسبة للعجن لحد ما يبقى عندنا خليط سميك شوية, وبعدين حطي عجينة الكركم على الاماكن اللي عايزة تشيلي منها الشعر وسيبيها لحد ما تنشف, وبعدين جيبي فوطة وافركي بيها الكركم من على بشرتك لحد ما تشيليه كله وبعدين اغسلي بشرتك بمية باردة, وكرري الوصفة كل ما تحتاجي تشيلي اي شعر زيادة من البشرة ومع الوقت هتلاقي الشعر نموه بيقل على البشرة.
