استخدامات مبتكرة للفازلين مكونتيش تعرفيها قبل كده
الفازلين من الحاجات الاساسية فى مستحضرات التجميل اللى بتستخدمها اى بنت ، وده لانه مزاياه و فوايده كتيرة جدا من سعره القليل و انه متوافر وانه متوافر بأنواع و ماركات كتيرة جدا ، بس معظمنا مابيعرفش غير استخدام واحد للفازلين و هو الاستخدام التقليدى بتطبيق الفازلين على بشرتنا وخلاص ، بس ده مش صحيح . علشان كده ” بنات حوا ” هتقولك فى المقال ده 13 استخدام جداد و مفيدين جدا للفازلين ماكنتيش تعرفيهم قبل كده ..
استخدامات مبتكرة للفازلين مكونتيش تعرفيها قبل كده
1- علشان البارفان يثبت مدة اطول :
الفازلين حلو جدا فى اه يساعدك لبارفان يثبت مدة اطول حتى لو مش اصلى او لو مش غالى اوى ، ادهنى طبقة خفيفة جدا من الفازلين مكان ما هترشى البارفان و هتلاحظى انه ريحته فضلت معاكى مدة اطول من الاول .
2- لشعر ناعم :
الفازلين مفيد جدا لتنعيم الشعر و علشان يمنعه من انه يهيش و كمان علشان تثبتى اطراف شعرك المقصفة و ماتخليهاش تهيش ، ادهنى طبة بسيطة اوى من الفازلين على شعرك ولاحظى الفرق ، وممكن كمان تستخدميه لو شعر الحواجب عندك من النوع اللى بيتنعكش او يتطاير .
3- نضارة الوجه :
كتير بنحتاج نستخدم highlighter علشان يدى تألق و نضارة لوشنا خصوصا لو بنعمل ماكياج لافراح او خروجات بالليل ، بديل تانى سهل لكريمات الhighlighter هو الفازلين ، ادهنى طبقة رقيقة اوى من الفازلين على خط الجبهة و خط الانف و هيديى لبشرتك لوك بلمعان ونضارة طبيعية .
4- ازالة بقع الماكياج من الهدوم :
واحد من استخدامات الفازلين هو ازالة بقع الماكياج من الملابس ، باستخدام ودانة ” قطن تنظيف الودان ” . افردى طبقة خفيفة من الفازلين على البقعة و ابدأى امسحيها بالودانة ، هتلاقى ازالتها بقى اسهل بكتير
5- علشان تظبطى المانيكير :
علشان تتجنبى انه المانيكير يبقع المنطقة حوالين الضافر او انه يلطش على صوابعك ، ادهنى طبقة من الفازلين حوالين الضافر قبل ما تحطى المانيكير وهتلاقى المانيكير مابيسيبش اى بقع على صوابعك خالص .
6- تنعيم البشرة :
طبعا واحد من اهم استخدامات الفازلين التقليدية هى تنعيم البشرة و تغذيتها ، خصوصا لو بشرتك جافة او لو بتعانى من وجود تشقات فى الكعبين .ادهنى طبقة من الفازاين على رجليكى و البسى فوقيها شراب و نامى ، مع الاستخدام و الانتظام على العادة دى هتلاحظى فرق كبير فى بشرتك
7- صلحى الماكياج المتكسر :
مفيش بنت فينا معندهاش علبة آي شادو او بودرة غالية و ماتكسرتش منها وزعلت عليها ، الفازلين بيحل المشكلة دى خالص ، بدل ما ترميها هاتى علبة الآى شادو المتفتتة و ضيفى عليها كمية من الفازلين وهتلقيها اتصلحت و تقدرى تستخدميها تانى ، و ممكن كمان بنفس الطيقة تستخدميها ك روج .
8- للماسكارا :
الفازلين حلو جدا قبل استخدام الماسكارا خصوصا لو هتعملى ماكياج النو ميكب، باستخدام فرشاة ماسكارا قديمة حطى طبقة رقيقة اوى على رموشك قبل ماتحطى الماسكارا و هتلاحظى انه رموشك بتفضل رطبه و مابتنشفش من الماسكارا و كمان باينة اطول و اتقل . اعرفى معانا كمان اعرفوا معانا مكياج ال 3 وال 5 وال 10 دقايق !
9- تلميع الاحذية :
استخدمى الفازلين علشان تلمعى الشوز الجلد و حميه من التشققات و التقشير اللى ممكن يحصله مع الاستخدام ، الفازلين بيخليكى تحافظى على احذيتك الجلد جديدة لمدة اطول .
10- لازالة ماكياج العيون :
استخدمى الفازلين كمزيل لطيف لماكياج العيون ، الفازلين بيعتبر هنا مزيل هايل للماكياج فبتقدرى من خلاله تشيلى الماسكارا و الايلينر و الاى شادو بمنتهى السهولة و من غير ما يسيح على وشك.
11- علشان ثقوب الاذن :
لو مابتلبسيش حلقان كتير و جيتيى تلبسى حلق فلقيتي ” خرم الحلق” او ثقب الاذن بتاعك مسدود او بيوجعك ، ببشاطة ادهنى طبقة من الفازلين على ودنك و طبقة بسيطة اوى اوى على الحلق و هتلاقىه بيتلبس بسهولة و تقريبا من غير وجع ، وممكن كمان باستخدام الفازلين تقلعى الخواتم اللى ممكن تعلق فى صوابعك و تبقى بتخرج بصعوبة .
12- مقشر للشفاة و الجسم :
ممكن تستخدمى الفازلين كمقشر لشفايفك لو شفايفك جافة ، امزجيه مع كمية من السكر و ادعكى بيه شفيفك فى حركة لطيفة . وممكن كمان تخلطيه مع الملح و تستخدميه كمقشر لجسمك كله خلال الاستحمام .