ازاي تقصي شعرك بنفسك في البيت ؟

ريهام محمود
ريهام محمود
في
شعر
18492

كتير مننا بنحب نغير في اللوك ونقص شعرنا لكن ساعات مش بيكون عندنا وقت نروح للكوافير وبنكون محتاجين نظبط شعرنا بنفسنا, عشان كده زي مابنجبلكم تسريحات كتيرة ومختلفة  للشعر النهرده هنقول لكل بنات حوا ازاي تقصي شعرك بنفسك في البيت وجيبنالكم اكتر من قصة بالخطوات بالفيديو تقدروا تختاروا منها القصة اللي تحبوها وتنفذوها بنفسكم.

– تعالوا نشوف مع بعض بالفيديوهات ازاي تقصي شعرك بنفسك في البيت خطوة بخطوة:

1- نبدأ مع اول قصة وهي تدريج الشعر من الجناب للشعر الطويل:

القصة دي بيكون الشعر من ورا نفس الطول والتدريج من الجناب بس, في البداية طبعا نحضر الادوات اللي هنستخدمها وهي المقص, ومشط رفيع بسنان رفيعة عشان نقسم بيه الشعر خصل, ومشط عريض عشان نسرح بيه الشعر, وتوكة كلبس عشان نلم بيها الشعر واحنا بنقص.

الاول هنسرح شعرنا بالمشط العريض ونسلكه كويس من اي كعبلة عشان القصة تطلع مظبوطة, هنقسم الشعر بالمشط الرفيع من النص نصين وبعدين النص الاول نقسمه نصين نلم النص اللي قدام بالتوكة والنص اللي ورا نمسكه ونبدأ نقص الاطراف بتاعته وبعدين ناخد الجزء اللي قدام ونقسمه نصين ونشد الشعر لفوق ونقص والنص التاني هنعمله بنفس الطريقة نشد الشعر لفوق ونقص وطبعا تقصي على حسب ما انتي عايزة تقصري قد ايه وفي الاخر تاخدي الجزء بتاع القوصه ويتقص بنفس الطريقة, وتعملي نفس الخطوات مع الجنب التاني من الشعر, وطبعا نشوف الجانبين زي بعض ولا لا عشان ميبقاش جنب اقصر او اطول من جنب, اخر حاجة هناخد الجزء اللي فوق من الشعر اللي بعد القوصه ونشده لفوق ونقص عشان نضمن ان الجانبين هيكونوا بنفس الطول, في الاخر هي استخدمت مقص نصه شكله مقص عادي والنص تاني شبه المشط ده فايدته انها بتشيل بيه الشعر المقصف.

تدريج الشعر من الجناب للشعر الطويل 1
تدريج الشعر من الجناب للشعر الطويل 1

فيديو للخطوات.

– في طريقة تانية لتدريج الشعر الطويل بطريقة سهلة انك تلمي الشعر كله على قدام بتوكة وتبدأي تقصي الطول اللي انتي عايزاة وتساوي الاطراف بتاعته كويس وبعدين تفكي التوكة هتلاقي الشعر بقى مدرج من الجناب.

تدريج الشعر من الجناب للشعر الطويل 2
تدريج الشعر من الجناب للشعر الطويل 2

2- طريقة قص الشعر مدرج للشعر القصير:

هنقص بنفس الطريقة اللي فاتت للشعر الطويل بس الفرق ان الشعر هنا قصير.

قص الشعر مدرج للشعر القصير 1
قص الشعر مدرج للشعر القصير 1

فيديو للخطوات.

– ودي طريقة تانية لتدريج الشعر القصير بنفس طريقة الشعر الطويل بردوا اللي قولنا عليها فوق بانك تلمي الشعر كله على قدام وتقصيه.

قص الشعر مدرج للشعر القصير 2
قص الشعر مدرج للشعر القصير 2

3- طريقة القوصة الجانبية:

هنسرح شعرنا ونلمه كله بتوكة ونخلي بس الجزء بتاع القوصة, عشان نفصل الجزء بتاع القوصة صح من الشعر نجيب مشط رفيع ونحطه عند منطقة نص الحاجب وناخد الخصل اللي بتبدأ من المنطقة دي الطريقة دي هتخليكي تفصلي القوصة بشكل مظبوط, هنسرح القوصه بالمشط كويس وبعدين نبرمها وتمسكيها بايدك الشمال عشان تعرفي تتحكمي في القصة بايدك اليمين وتبداي تقصي القوصة بميل وتساوي اطرافها كويس, كده هتبقي عملتي قوصة بطريقة سهلة جدا وبسيطة.

القوصة الجانبية
القوصة الجانبية

فيديو للخطوات.

4- طريقة قص القوصة اللي من قدام:

طبعا ادواتنا الاساسية زي القصات اللي فاتت مشط رفيع او فرشة بايد رفيعة عشان نقسم بيها الشعر خصلات وطبعا المقص, هناخد الجزء بتاع القوصة زي ما شرحناه في الطريقة اللي فاتت الخصل من منطقة نص الحاجب, هنبرم القوصة ونمسكها بايدنا ونبدأ نقص بالايد التانية ونقص الشعر بشكل متساوي, في الاخر لو هتعمليها سيشوار بعد القص ممكن تستخدمي فرشة كبيرة عشان تخلي شكل القوصة منفوخ ومقوص وتديها شكل حلو, ممكن تساوي القوصة كل اسبوعين كل ما تطول بنفس الطريقة.

قص القوصة اللي من قدام
قص القوصة اللي من قدام

فيديو للخطوات.

5- عشان تساوي اطراف الشعر:

عشان تساوي اطراف شعرك او تشيلي الشعر المقصف اللي بيكون في الاطراف تمسكي خصلة الشعر وتشديها بين صوابعك لحد الجزء اللي هتلاقيه مش متساوي وتبدأي تقصي وتساوية والشعر يا يكون مبلول او معمول سيشوار يعني يكون مفرود عشان القصه تطلع مظبوطة, وتتأكدي ان الجنبين زي بعض بعد القص, ممكن تكرري القص ده كل شهرين عشان تساوي الاطراف والشعر المقصف.

عشان تساوي اطراف الشعر
عشان تساوي اطراف الشعر

فيديو للخطوات.

6- قصة الكارية الطويل:

في البداية نبل شعرنا عشان القصة تطلع مظبوطة زي ما قولنا وتقدري تتحكمي في الشعر, هتلمي شعرك كله على ورا بتوكة استك وبعدين ترخيها شوية وتنزليها لتحت شوية على الشعر وبعدين تحطي استك تاني تحت الاول وتنزليه على الشعر بنفس الطريقة لحد الجزء اللي انتي عايزة تقصيه وتجيبي شعرك من الجناب على ودانك وتبدأي تقصي الشعر وبعدين تفكي التوك وتقسمي شعرك نصين وتجيبيهم على قدام وتساوي الاطراف اللي مش مظبوطة كويس بالمقص.

قصة الكارية الطويل
قصة الكارية الطويل

فيديو للخطوات.

7- قصة الكارية القصير:

هنعمل نفس الطريقة اللي فاتت بالظبط بس هنقص من الشعر اكتر حسب طول الكارية اللي انتي عايزاه, وبعدين نساوي الاطراف من تحت كويس لو فيها اي حاجة مش مظبوطة.

قصة الكارية القصير
قصة الكارية القصير

فيديو للخطوات.

مقالات متعلقه

9 طرق تقصي بيهم القوصة ال Curtain لكل اطوال الشعر

9 طرق تقصي بيهم القوصة ال Curtain لكل اطوال الشعر

كام مرة محتاجة تقصي شعرك للحصول على مظهر مثالي..على حسب نوع شعرك

كام مرة محتاجة تقصي شعرك للحصول على مظهر مثالي..على حسب نوع شعرك

ازاي تقصي شعرك بنفسك في البيت زي المحترفين..اعرفي معانا 7 نصايح هتساعدك

ازاي تقصي شعرك بنفسك في البيت زي المحترفين..اعرفي معانا 7 نصايح هتساعدك