7 نصايح للتعامل مع الشريك العصبي
مافيش حد مننا خالي من العيوب، وزي ما احنا شايفين العيب اللي في غيرنا اكيد غيرنا كمان شايف عيوبنا، لكن السؤال هنا هو اد ايه الانسان بيكون مستعد يتحمل عيوب غيره ومتقبل طباعه واد ايه احنا مستعدين نحافظ على حياتنا ونحاول نتعامل مع عيوب الاشخاص اللي بيهمنا امرهم ونلاقي طريقة للتواصل ما بينا وبينهم، من اكتر الطباع الصعبة اللي بتهدد اي علاقة هو طبع العصبية ولو انتي في حياتك شخص عصبي فبنات حوا جايبالك نصايح للتعامل مع الشريك العصبي
نصايح للتعامل مع الشريك العصبي
1- اتعلمي تتحاوري معاه
اول غلطة بتقع فيها اي واحدة في حياتها شخص عصبي هي انها بتتجنب العصبية بتاعته وبتضطر تسكت وتعدي المواقف عشان تهديه وبس وبتفضل تشيل من ناحيته وتتغير بالتدريج لغاية ما بتوصل للحظة ما بتقدرش تتحمل فإما انها بتبعد او بتنهار وبتتحول هي كمان لشخصية عصبية، عشان كده مهم جدا ان بعد ما تنتهي نوبة عصبيته وتكوني في لحظة هدوء مع شريكك انك تطلبي منه مايجرحكيش مرة تانية وتقوليله بالظبط ايه اللي ضايقك منه عشان العتاب بيصفي المواقف وبينهيها من جوانا
2- احتويه وخليكي صديقته
الانسان العصبي بيكون حساس اكتر من غيره، يعني مثلا ممكن يكون مضغوط جدا في حاجة تخص شغله ومش عارف يعبر عن ده غير بطريقة العصبية، المطلوب منك هنا انك تحتويه بس مش زي احتواء الام لأ حاولي تكلميه زي الاصدقاء، اكيد تنضيف البيت وتحضير الهدوم والفطار والعشا مهم وبيفرق معاه لكن حيفرق معاه اكتر لو حاولتي براحة تسأليه ايه اللي مضايقه وحاولتي تلاقيه معاه حلول مفيده لمشكلته
3- قدريه وارفعي معنوياته
اكيد الانسان العصبي بيحس بنفسه وعارف ان طبعه صعب وده بيحطه تحت ضغط اكبر لأنه بيحاول يسيطر على عصبيته وده في حد ذاته بيخليه يحس بضغط، حيفيده اوي لو سمعتيه طول الوقت كلام تشجعيه بيه عن اد ايه انتي مقدرة تعبه ومجهوده في شغله، وكلميه كتير عن صفاته التانية الكويسة، وصارحية بأنك متقبلاه زي ما هو ومش بتتمنى ان حاجة فيه تتغير الكلام ده مع الوقت حيخليه يسيطر على غضبه عشان يفضل بالصورة المثالية دي ادامك من غير ما تهتز
4- انصحيه من غير توجيه
لما تحسي ان شريكك بيتصرف بشكل مش صح او بياخد خطوة مش مفيدة في حياته مثلا ابعدي عن طريقة الصح والغلط في الكلام عشان دي اكبر غلطة ممكن تعمليها، ممكن تقوليله مثلا ليه مجربتش تتصرف بالشكل الفلاني؟ او فكر معايا كدا لو عملت كذا حتكون النتيجة ايه؟، لكن طريقة افعل ولا تفعل دي مش مناسبة للشخصية العصبية خالص
5- شجعيه من غير ما تضغطي عليه
اكيد العلاقة بالشريك بيكون فيها كلام كتير يخص الماديات سواء تجهيز للزواج او مصاريف البيت او غيره من الامور المادية، وطبعا احساس الزوج بأن المسئولية المادية دي تخصه في المقام الاول بتضغط عليه جدا وبتزود من عصبيته، واكيد كمان انتي بتيجي عليكي مواقف لازم تطالبيه بماديات معينة، حاولي بس لما تفتحي معاه المواضيع دي تجيبها بشكل مشجع زي مثلا انك تقوليله انا واثقة انك حتقدر توصل لهدفنا قريب، او انت عندك كفاءة والتزام انك توصل للهدف ده في الوقت المحدد، بدل ما تقوليله علينا قسط الشهر الجاي او حنقدر نتجوز امتى او غيرها من الكلمات اللي بتحسسه انك واقفة على البر التاني ومستنياه يحقق كل حاجة لوحده.
6- اديله مساحة من الحرية
زي ما قلنا قبل كده الانسان العصبي بيكون عارف الطبع ده عن نفسه، وغالبا لما بيحس ان هو مضغوط او ان حالته النفسيه حتخليه يتعصب عليكي حتلاقيه بدأ ينطوي وياخد جنب شوية عشان يتجنب الجدال وفتح المواضيع اللي ممكن تنتهي بعصبية، اسوأ حاجة ممكن تعمليها ساعتها هي انك تسأليه انت ليه بعيد او واخد جنب، الافضل انك تقوليله انا حاسة انك مضغوط ومتضايق وانا مستعدة اسمعك ونتناقش ونلاقي حل سوا لكل اللي مضايقك، لو اتكلم معاكي يبقى تمام اما لو رفض يبقى بلاش تصري انك تعرفي ماله وتضغطي عليه اتراجعي وسيبيه ياخد مساحته من التفكير والهدوء
7- بلاش المساومة
اسوأ حاجة ممكن تعمليها لما تلاقي شريكك متعصب هي انك تساوميه يعني مثلا تقوليله مافيش غدا غير لما تبطل عصبية، او مش حخرج معاك غير لما تهدأ، كل دي اساليب غلط لأن العكس هو الصحيح زي انك تقوليه مثلا تعالى نخرج وتغير جو عشان نتناقش بهدوء، او انك تعمليله الاكل اللي بيحبه وتقوليله استمتع دلوقتي بالاكل ونتناقش بعدين
لو شريكك طبعه عصبي قوليلنا بتتعاملي معاه ازاي وايه النصايح اللي ممكن تقدميها للتعامل مع الشريك العصبي
