ازاي تتعاملي مع صاحبتك اللي خارجة من تجربة حب فاشلة ؟

ريهام محمود
ريهام محمود
5814

الحب كلنا منقدرش نستغنى عنه في حياتنا ولما بنكون مرتبطين بيكون شكل الحياة مختلف وبنحس دايما بسعادة واحنا مع الشخص اللي بنحبه وعلى قد حلاوة الحب ده بيكون صعوبة الانفصال …

لما بيحصل انفصال بين اي اتنين مرتبطين لاي سبب الانفصال بيكون صعب جدا على الطرفين بس بيكون على البنت اكتر كمان لان هي بطبيعتها حساسة اكتر وبتتأثر اسرع وبتدخل في حالة حزن واكتئاب, وهنا يجي دور الاصحاب اللي لازم يساندوا بعض في الظروف الصعبة دي لان هيكون صعب عليها تواجه ده لوحدها وهتكون في الوقت ده محتاجاكي جنبها, عشان كده هنعرف مع بعض النهاردة ازاي ممكن تساعدي صاحبتك اللي خارجة من تجربة حب فاشلة وتهوني عليها وتحاولي تخرجيها من حزنها وتغيري لها حالتها النفسية.

ازاي تتعاملي مع صاحبتك اللي خارجة من تجربة حب فاشلة ؟
ازاي تتعاملي مع صاحبتك اللي خارجة من تجربة حب فاشلة ؟

تعالوا نشوف كده مع بعض ايه الحاجات اللي ممكن تعمليها لصاحبتك اللي خارجة من تجربة حب فاشلة عشان تساعديها:

1- اسمعيها:

اول حاجة لازم تعمليها مع صاحبتك انك تسمعيها دي اول خطوة في انك تخرجيها من الحالة اللي هي فيها وتهوني عليها لان الفضفضة مع شخص قريب مننا بتريح جدا وهي في الوقت ده هتكون محتاجة تتكلم وتشتكي وانتي عليكي انك تسمعيها.

2- خليكي صبورة:

اكيد الاصحاب مش دورهم يكونوا مع بعض بس في الاوقات الحلوة والفسح والخروجات بس لا الاهم من ده اننا نكون مع بعض في الاوقات الصعبة ونساند بعض وفكري نفسك دايما ان انتي صاحبتها ومالهاش غيرك وده دورك انك تكوني جنبها في الوقت ده, وتسمعيها من غير ملل او تحسسيها انك متضايقة من شكوتها حتى لو كررت الشكوى كتير وقعدت تحكيلك نفسك الحاجات اكتر من مره خليكي صبورة معاها وواسيها.

3- حسسيها بالاهتمام وانك فهماها:

لما تحكي لك اي حاجة حسسيها انك مهتمة باللي بتقوله وبكل التفاصيل اللي بتحكيها وانك مركزة معاها ومهتمة تسمعيها واتفاعلي معاها في الكلام, ولما تردي على كلامها حاولي متقوليش الكلام المكرر يعني معلش ومتزعليش وخليكي ايجابية والكلام ده لان هي في حالة دي اخر حاجة هتكون محتاجة تسمعها لكن حاولي تطمنيها وتقولي لها انك فاهمة مشاعرها اوي وحاسه بيها, واتجنبي خالص النصايح في التوقيت ده الا لو هي طلبت منك ده انتي بس افهميها وحسسيها انك حاسه بيها وبمشاعرها.

4- متقارنيش تجربتها بتجربة سابقة ليكي:

اتجنبي خالص وهي بتحكيلك انك تقولي لها ما انا حصلي كذا وكذا وتبدأي تقارني بين تجربة انفصال سابقة ليكي وبين تجربتها هي محتاجة في الوقت ده الاهتمام يكون ليها هي بس, اديها هي فرصتها وخليها تقول تجربتها.

5- امنعيها من الاتصال بالشخص اللي انفصلت عنه:

في وقت الانفصال ده البنت بتكون ضعيفة وبيجي وقت تفكر ترجع للانسان اللي بتحبه او تكلمه لكن لازم تمنعيها انها تعمل كده او تراجع تتواصل معاه تاني لانها ممكن تتسبب في نتايج اسوأ.

6- اديها وقتها تحزن:

ادي صاحبتك وقتها انها تاخد فترة حزن لان ده طبيعي جدا هي في حالة نفسية سيئة واكيد هتاخد وقتها وكمان حالة الحزن بتتوقف على وقت الارتباط  لو كان طويل اكيد هتاخد فترة حزن اطول لان كل واحد بيحزن بطريقة وبدرجة مختلفة عن التاني, لكن ممكن تحاولي تقترحي عليها تخرجوا بره البيت تروحوا اي مكان تغيروا جو, خديها مثلا وروحوا اي مكان مفتوح الهوا والمناظر الطبيعية بتريح الاعصاب ممكن تاخديها تشتري معاكي حاجة عشان تحاولي تساعديها تخرج من حالة الحزن والاكتئاب واحدة واحدة.

7- تابعيها يوميا:

خلي سؤالك عليها بشكل يومي واسأليها على تفاصيل يومها وحسسيها انك مهتمة, ممكن تساعديها انك مثلا تعملي لها اي حاجة هي مش قادة تعملها او تشتري حاجة انتي عارفة انها عايزاها وفجأيها بيها الحاجات دي بتفرق كتير اوي وهتحس انك بتعملي حاجة كبيرة عشانها مهما كانت الحاجة بسيطة.

8- قضوا وقت حلو مع بعض:

طبعا هي في الوقت ده مش هيكون نفسها تعمل اي حاجة لكن حاولي بعد ما تديها وقتها طبعا زي ماقولنا انك تحاولي ترجعيها لحياتها الطبيعية يعني لو كانت مأجلة حاجة شجعيها انها تعملها, او خديها مثلا واتغدوا بره وقضوا وقت حلو يساعدها تخرج من حالتها النفسيه وهتبدأ واحدة واحدة ترجع لحياتها الطبيعية.

9- حولي المشاعر السلبيه لحاجات ايجابية:

ممكن تحولي المشاعر السلبية اللي عندها دي في اي انشطة ايجابية تساعدها انها تغير من حالتها النفسية يعني تعملوا حاجة تخليها تشغل وقتها عشان متفكرش كتير في حالة الحزن اللي هي فيها وتتعب زيادة, يعني لو بتمارسوا اي نشاط خيري في اي مكان, لو هي عندها هواية مثلا شجعيها تمارسها, او ممكن تشجعيها تروحوا تلعبوا رياضة لانها مفيدة جدا في تحسين الحالة النفسية وبتخلصنا من كل المشاعر السلبية.

10- اتحمليها في غضبها:

حالة الغضب دي بتكون المرحلة التانية في حالة الحزن وانها هتشوف ان كل الرجالة اشرار ومخاينين ومالهمش امان وده طبيعي جدا ولكن حاولي تخرجي منها المشاعر السلبية دي وتوصلي لها ان مش كل الرجالة وحشين ومش عشان قابلت شخص مش كويس يبقوا كلهم مش كويسين.

11- انصحيها بعدم التسرع في علاقة تانية:

احيانا الاشخاص بعد الانفصال بيتسرعوا انها يدخلوا علاقة تانية عشان تخرجهم من العلاقة الاولانية وتخليهم ينسوا ودي اكبر غلطة لان ده ممكن يعرضنا لحالة انفصال تانية, عشان كده انصحيها متتسرعش انها تدخل في علاقة تانية غير لما تكون فعلا مستعدة ليها مش مجرد بديل بس للشخص الاولاني او مجرد انها تغيظه او تنتقم منه وتعرفه بس انها عاشت حياتها الطبيعي.

نتمنى النصايح تكون فادتكوا والصحبات كلهم يقفوا جنب صاحباتهم في الظروف الصعبة, وقولوا لنا مين سبق وعملت الحاجات دي مع صاحبتها ؟ ونتمنى لكل بنات حوا انهم ميعيشوش تجربة الانفصال او الحزن.

مقالات متعلقه

علامات تقولك انك لسه بتحبي الاكس بتاعك

علامات تقولك انك لسه بتحبي الاكس بتاعك

ايه اللي بيحصل لجسمك لما قلبك يتكسر عاطفيا حسب كلام العلماء والمتخصصين

ايه اللي بيحصل لجسمك لما قلبك يتكسر عاطفيا حسب كلام العلماء والمتخصصين

10 علامات تحددي بيها الخيانة العاطفية وتعرفي منها شريكك بيخونك عاطفياً ولا لاء

10 علامات تحددي بيها الخيانة العاطفية وتعرفي منها شريكك بيخونك عاطفياً ولا لاء