كل اللي محتاجه تعرفيه عن “ماسك الفحم”
واحدة من اجدد و احسن الطرق الفعالة فى تنضيف و العناية بالبشرة اللى موجودة دلوقتى و منتشرة بسرعة جداهى وصفات و طرق استخدام ” ماسك الفحم ” ، ولانه ” بنات حوا ” بتهتم بأنها تجيبلك كل جديد يفيدك فى الاهتمام بجمالك و بشرتك ، فى المقال ده هتلاقى كل اللى محتاجة تعرفيه عن ماسك الفحم ، ايه هو و ايه هى فوايده و طريقة استخدامه و كمان ازاى تعمليه لنفسك فى البيت من غيرما تضطرى تشتريه ..
ايه هو ماسك الفحم ؟
هو ماسك بيتكون من الفحم النشط و نوع من الطين اسمه ” طين البينتونيت ” و ، الطين ده مفيد جدا فى انه بينضف مسام البشرة بعمق و بيمتص السموم من البشرة ، كمان بيقضى على البكتيريا اللى بتسبب حب الشباب . الماسك متكون كمان من نسب متساوية من المياة، الزيوت و مواد كيميائية تانية ، و متوافر دلوقتى فى محلات مستحضرات التجميل ومراكز التجميل.
فوايد ماسك الفحم :
1- تنظيف مسامات البشرة بعمق .
2- ازالة المواد السامة و البكتيريا من البشرة .
3- تقليل ظهور الحبوب الناتجة عن الالتهابات .
4- تقليل و القضاء على حب الشباب .
5- توحيد لون البشرة .
6- نضارة البشرة و نعومتها .
طريقة الاستخدام :
لو هتستخدمى الماسك الجاهز زى اللى فى الصورة ، فطريقة استخدامه هى انك تفرديه على وشك وتسيبيه حوالى 15 دقيقة و بعدين تشيليه او تفركى وشك وتشطفيه بمياة دافية .
“ماسك الفحم” كمان ليه وصفات تقدرى تعمليها لنفسك فى البيت من غير ما تضطرى تشتريه ، اعرفى معانا وصفات “ماسك الفحم” :
الوصفة الاولى : ماسك الفحم و العسل لسنفرة البشرة :
المكونات :
2 ملعقة من حبوب الفحم النشط المطحونة ” موجود فى الصيدلية ” .
– 2 ملعقة من عسل النحل .
– مقدار مناسب من عصير الليمون .
الطريقة :
اخلطى المكونات دى مع بعضها و بعدين افرديها على وشك و سيبيها حوالى 5 دقايق ، بعد مرور الوقت افركى الماسك عن وشك و بعيدن اغسلى وشك بمياة دافية .
الوصفة الثانية : “ماسك الفحم” والشاى الاخضر :
المكونات :
- – مقدار من حبوب الفحم النشط ” من 3 الى 4 حبات ”
- – مقدار مناسب من النعناع المجفف .
- – مقدار مناسب من الشاى الاخضر المجفف .
- – مقدار من العسل الابيض .
- الطريقة :
- امزجى المكونات مع بعضها كويس اوى لحد ما يكونوا زى عجينة متجانسة ، وبعدين افردى الخليط ده على وشك ” وممكن تستخدميه لجسمك كله ماعدا منطقة العينين ” . سيبيه على وشك من 30 دقيقة لـ ساعة و بعدين اغسليه بمياة دافية . ومع الاستخدام المتكرر هتلاحظى انه بشرتك بقت ناعمة و صحية اكتر واكتر نضارة .
