ازاي تفرقي بين الحب والاعجاب بشخص ؟

الحب والاعجاب كتير من البنات مش بيعرفوا يفرقوا بينهم وبيتسرعوا في العلاقات العاطفية ويفتكروها حب وهو بيكون اعجاب بس ويمكن التسرع ده بيكون بسبب انهم بيخافوا من الوحدة وعايزين يحسوا باحساس الامان مع شخص او نفسهم يعيشوا قصة حب وده بيخلينا نرتبط او نستمر مع الشخص الغلط وبنخلط دايما بين اننا نكون بنحب شخص بجد او بس مجرد اننا معجبين بيه, لكن في فرق كبير جدا بين الحب والاعجاب وده اللي هنقولكم عليه النهاردة هو ازاي تفرقوا بين الحب والاعجاب.

تعالوا نعرف مع بعض ازاي نفرق بين الحب والاعجاب ؟

– في حالة الحب:

1- الحب هو شعور مرتبط بالسعادة يعني مجرد انك تشوفي الشخص ده تبقي مبسوطة جدا ومش بس كده انتي انبساطك بيكون مرتبط بانبساطه هو يعني لما تلاقيه هو سعيد ومبسوط انتي هتكوني سعيدة على سعادته هو, وكمان هتقدمي سعادته هو على سعادتك انتي يعني هتكتفي يكون هو مبسوط ده هيرضيكي انتي ويخليكي مبسوطة, وبتزعلي لزعله وبتفرحي لفرحه.

2- لو اللي بتحسي بيه ناحية شخص هو حب هتلاقي نفسك بتدي ومش مستنيه مقابل من الشخص ده, يعني صفة الانانية دي هتلاقيها اختفت من عندك خالص وبتبديه هو على نفسك وهيبقى في تضحيات من ناحيتك ليه.

3- لو بتحبيه هتتقبلي عيوبه ومش هتبقي حاسة انك عايزة تغيريها لان اللي بيحب حد بجد بيحبه بعيوبه قبل مميزاته لان حب المميزات ده مش حب لكن انك تحبي شخص رغم عيوبه هو ده الحب الحقيقي.

4- هتحسي انك عايزة تقضي وقت اطول مع الشخص ده وانك عايزة تبقي قريبة منه باستمرار وتشوفيه على طول.

5- لما تدخلي في حوار او حديث مع شخص وتحسي ان الوقت عدى بسرعة معاه وبيمر وقت طويل من غير ما تحسي بيه معاه  يبقى انتي في حالة حب مع الشخص ده.

6- دايما الحب بيدفعنا اننا نكون اشخاص احسن وننجح في حياتنا لو انتي لقيتي علاقتك مع شخص معين بتحفزك دايما تبقي احسن وتنجي ده اكيد شعور حب.

7- هتبقي حابة تتعرفي على اهله والاشخاص القريبين منه عشان تتعرفي على حياته الشخصية وتقدري تعرفي كل حاجة عنه.

8- هتبقي دايما متسامحة اكتر مع الشخص اللي بتحبيه يعني لو عمل اي حاجة غلط هتلاقي نفسك بتسامحيه وكمان ممكن تبرري له الغلط.

9- لو بتحبي شخص هتلاقي نفسك بتفكري فيه دايما وواخد اهتمامك بشكل مستمر وبتبقي عايزة تعرفي دايما اخباره وكل حاجة تخصه.

10- لو بتحبي شخص لما يغيب هتحسي انك متضايقة ووجوده فارق معاكي, وهتحسي ان يومك ناقص حاجة من غيره.

– في حالة الاعجاب:

1- الاعجاب بقى مختلف عن الحب بتكوني معجبة بس بصفات معينة في الشخص ده او بتصرفاته او مثلا بطريقته في الكلام, او اسلوبه في حل المشاكل مش اكتر من كده.

2- ادام الشخص اللي انتي معجبه بيه هتتصرفي عادي من غير خجل او انك تحاسبي على تصرفاتك قدامه لانه مش هيفرق معاكي اوي رايه فيكي وفي تصرفاتك, ومش هتكوني مرتبكه في وجوده هتتعاملي بطبيعتك اكتر.

3- لو فكرتي في الشخص اللي انتي معجبه بيه او جيه في بالك ده مش معناه حب بيكون بس انك افتكرتي موقف معين هو عمله وعجبك لكن مش بتفكري فيه هو شخصيا.

4- الشخص اللي معجبه بيه مش هتفكري بيه باستمرار او هيبقى مسيطر على اهتمامك, ولما يغيب مش هتحسي انه عدم وجوده فارق معاكي او مضايقك.

5- الاعجاب بشخص بيبدأ لما تسمعي الشخص وتتعرفي عليه  بعكس الحب اللي ممكن بنظره تحبي شخص من غير ما تعرفيه كويس من غير سبب كده, لكن الاعجاب بيبدأ لما تسمعي الشخص ده وتعرفيه اكتر هتعجبك طريقة تفكيره او شخصيته او نجاحه بس مش اكتر وممكن تحسي انك عايزة مثلا تبقي زيه في نجاحه.

6- الشخص اللي انتي معجبه بيه هيبقى مجال الخلاف بينكم اكبر يعني عكس الحب بتكوني متسامحة وممكن تعدي الاخطاء لكن الشخص اللي معجبة بيه بس هيبقى الخلاف بينكم اكتر.

7- لما بتكوني معجبة بشخص لو هو زعلان او في حاجة مضيقاه مثلا هتشاركيه شعوره اكيد وتواسيه لكن الموضوع بالنسبة لك هيبقى عادي يعني مش هتكوني زعلانة على زعله.

 نتمنى دلوقتي انكم تكونوا عرفتوا تفرقوا بين الحب والاعجاب وتعيدوا الحسابات في علاقاتكم ومتتسرعوش في الحكم على العلاقة انها حب عشان مندخلش في علاقة حب مع الشخص الغلط, ممكن في بعض الحالات الاعجاب بيتحول لحب مع الوقت يعني الحاجات اللي احنا قولنا عليها في حالة الحب هتبدأي تحسي بيها مع الشخص اللي انتي معجبه بيه ساعتها بس يكون الاعجاب اتحول لحب غير كده يبقى مجرد اعجاب بس مش اكتر.

اعرفوا معانا 12 علامة تبين انه معجب بيكي.