ادوات رسم الاظافر وازاي تستخدميها

من اشهر تقاليع الموضة اللي انتشرت السنين اللي فاتت هي موضة رسم الاظافر، واكيد كلنا كبنات بنحب نتفرج على الفيديوهات والصور اللي بتقدملنا افكار وتصاميم لرسم الاظافر وطبعا بيلفت نظرنا الادوات اللي بتستخدم في الفديوهات دي عشان كده بنات حوا حتساعدكم تتعرفوا على اسماء ادوات رسم الاظافر ازاي تستخدميها عشان تقدروا تنفذوا التصاميم اللي بتعجبكم

ادوات رسم الاظافر

1- ادوات العناية

قبل ما بنبدأ في تنفيذ التصميمات اللي بتعجبنا لازم الاول نتأكد ان الاظافر نفسها في حالة استعداد للمانيكير ومقصوصة ومبرودة وتمت ازالة الجلد الميت من حواليها وده نفسه له ادوات وهي

• القصافة

طبعا معروفة واغلبنا بيستخدمها لكن لازم تعرفي ان القصافة هي الافضل في تقليم وقص الاظافر عشان المقص بيخلي طرف الاظفر متقصف حتى لو اتبرد مش بيبقى مظبوط زي القصافة.

• بنز التنضيف

اكيد بنشوفه عند الكوافيرة لما بنعمل مانيكير واغلنا فاكر ان استخدامه صعب ومحتاج خبرة لكن في الحقيقة هو مش صعب ولا حاجة، انتي بس محتاجة تكوني مبوشة ايدك كويس وتستخدميه براحة لكن خطوة تنضيف الجلد الميت من حوالين الضوافر هي خطوة مهمة جدا قبل ما نبدأ تزيين الاظافر.

• المبرد

برضه واحدة من الخطوات اللي مش ممكن نستغنى عنها عشان بتدي الشكل المظبوط للضوافر ابردي ضوافرك بعد ماتقصيها واختاري الشكل المناسب لضوافرك واظبطيه على الضوافر كلها وكمان اظبطي طول الضوافر بالمبرد خليهم كلهم طول واحد.

• اسفنجة التلميع

هي مش بتبقى سفنجة بالظبط لكن هي اداة بتبقى شبة الاسفنج بكون مخصوص لتلميع الاظافر بعد بردها بالمبرد، وبتخلي النتيجة النهئية للمانيكير ممتازة.

2- ادوات الرسم 

بعد ما اتكلمنا عن ادوات العناية واستخدماتها حنتكلم دلوقتي عن ادوات التزيين وهي كتيرة ومتنوعة لكن حنذكر لكم هنا الاساسيات.

• المانيكير الملون

اكيد ده الاداة الاساسية في تزيين الاظافر اختاري الالوان اللي تليق على شكل ايدك ولون بشرتك واستايل لبسك، وياريت تبعدي عن الانواع الرخيصة لأنها بتدي مظهر متكتل مش حلو وكمان مش بتكون نتيجتها لامعة وشكلها جذاب.

• المانيكير الشفاف

ده كمان اداة مهمة في تزيين الاظافر لازم بعد ما تنتهي من تنفيذ التصميم اللي انتي عايزاه تستخدمي طبقة من مقوي الاافر او المانيكير الشفاف عشان تظهر جمال التصميم وتخليه متساوي وكمان عشان يحافظ عليه وعلى شكله النهائي.

• سائل الحماية

ده عبارة عن طبقة من السائل بتتحط  حوالين الاظفر وتتساب تنشف خالص وبعد ما تخلصي التصميم بتاعك بتقشريها من على الجلد بسهولة والفكرة انها تحافظ على الجلد من ان المانكير يلطش فيه وكمان بيحافظ على التصميم عشان لو المانيكير طلع منه شوية على الجلد وحاولتي تمسحيه ممكن الاسيتون يشيل حاجة من الرسمة بتاعتك، وده بيتباع في المحلات عادي تحت اسم المانيكير الاسلامي، او في فكرة تانية ممكن تعمليها بنفسك في البيت وهي عبارة عن معلقة صغيرة من الغراء الابيض وربع معلقة ماية بتخلطيهم كويس جدا جدا مع بعض وباستخدام فرشاة مانيكير نضيفة تماما بتحطي منه طبقة جوالين الضوافر وتسيبيها لغاية ماتنشف وبعدين تبدأي في تنفيذ التصميم بتاعك.

• الجليتر

وهو عبارة عن جليتر على شكل بودر مش مضغوط وبتستخدميه في بعض التصميمات بتاخدي منه بالفرشاة وتحطي على الاظفر على حسب شكل التصميم.

• مجموعة الفرش

دي مجموعة من الفرش بتستخدم في الرسم منها الرفيعة والرفيعة جدا عشان رسم الخطوط، والمتوسطة اللي بتتحط في الاسيتون وبيتمسح بيها حوالين الاظفر والعريضة والمجنحة اللي بتستخدم في الفرنش، وغالبا على حسب التصميم بتاعك بيبقى مذكور فيه نوع الفرش اللي حتستخدميها.

• الملقاط

بتستخدميه في انك تحطي او تنزعي الشريط اللاصق او الاستيكر من الرسمة بتاعتك.

• ادوات التنقيط

ودي لما كون في تميم فيه نقط بتستخدميها وبتختاري الرفع والتخن بتاعها على حسب التصميم.

• شريط اللصق الرفيع

له طريقتين في الاستخدام اما انك تحطيه على اللون الاساسي وتدهني من لون تانني وبعدين تشيلي الشريط، او انك تستخدمي الشريط نفسه في التصميم فوق اللون الاساسي وتدهني فوقه مقوي الاظافر.

• الاستيكر

عبارة عن مجموعة متنوعة من الرسومات بتحطيها على الرسمة بتاعتك وبعدين بتدهني فوقه مقوي الاظافر.

• طابعة الرسومات

بتتكون من 3 قطع الاولى بتبقى عليها الرسومات بندهنها بالمانيكير وبنشيل الزيادة بالقطعة التانية اللي هي المكشط بحيث ان الرسمة تبقى مظبوطة وبعدين بناخد الرسمة بالجزأ التالت اللي شبه الختامة وبنحطها على الضوافر، المميز فيها ان سعرها مش غالي اوي وان الرسمة بتطلع معاها مظبوطة زي الاستيكر بالظبط.

شوفي كمان طريقة عمل المانيكير للايدين في البيت بالخطوات