كل اللي محتاجة تعرفيه عن زراعة الشعر

في حالات كتير من تساقط الشعر اللي بتسبب فراغات كبيرة في الشعر بيكون العلاجات العادية مش كافية لعلاجها وبيكونوا محتاجين زراعة شعر.

 في البداية لازم نتأكد ان حالة تساقط الشعر محتاجة فعلا زرع يعني نجرب كل العلاجات العادية الاول ونخليها تاخد وقتها ولو مجبتش نتيجة ساعتها نتجه للزرع.

تاني حاجة ان يكون حالة الشعر ينفع معاها زراعة وده طبعا بنعرفه لما نكشف عند الدكتور هو بيحدد ده على حسب كثافة الشعر في المنطقة اللي بياخد منها الشعر في فروة الراس ويزرعها في الفراغات اللي محتاجة زراعة ودايما بتكون الاماكن اللي فيها فراغات ياما في الشعر من قدام او الجزء اللي فوق من الراس.

ايه هي طرق زراعة الشعر ؟

في طريقتين لزراعة الشعر هما زراعة الشعر بطريقة الشريحة, وزراعة الشعر بطريقة الاقتطاف.

1- زراعة الشعر بطريقة الشريحة:

بتاخدي فيها تخدير موضعي يعني بتكوني شايفة كل حاجة بتحصل حواليكي لكن التخدير بيكون في المنطقة اللي هياخد منها الشعر بس, الدكتور بياخد شريحة من فروة الراس من ورا بعرض من 1 ل 2 سم وبطول من 20 ل 25 سم وبعدين يخيط الجرح خياطة عادية او يقفله بطريقة الدبابيس, وبيبدأ يقطع الشريحة اللي اخدها من فروة الراس ويقطعها لبصيلات وبعدين يبدأ يعمل ثقوب بابرة رفيعة جدا في المنطقة اللي هيزرع فيها الشعر ويبدأ يزرع البصيلات واحدة واحدة بشكل يبان طبيعي وبطريقة تكون في فراغات بين البصيلات عشان يخلي الدم يوصل بكمية كافية لكل البصيلات المزروعة, وبعدها يغطي مكان الجرح بشاش طبي وبيفكه بعد ساعة واحدة مش اكتر.

– مميزات زراعة الشعر بطريقة الشريحة:

الطريقة دي بتدي كمية كبيرة من البصيلات, وفي نفس الوقت من غير ما تأذي البصيلات وهو بيقطعها ويفصلها عن بعض, وتقريبا الطريقة دي هي المنتشرة اكتر يعني بنسبة 90% هي المستخدمة لانها بتاخد وقت اقل في الزراعة وكمان مجهود اقل.

– عيوب زراعة الشعر بطريقة الشريحة:

من عيوب الطريقة دي انها لازم يتعمل لها جرح في فروة الراس من ورا اللي هي المنطقة اللي هيتاخد منها البوصيلات اللي هتتزرع, عشان كده الطريقة دي مفضلة لما يكون في مساحات كبيرة محتاجة تتزرع.

2- زراعة الشعر بطريقة الاقتطاف:

الطريقة دي الدكتور بياخد بصيلات الشعر واحدة واحدة باداة دقيقة جدا عكس الطريقة اللي فاتت بيقطع الشريحة كاملة وبعدين يقطع البصيلات, وبعدين بيبدأ يزرع البصيلات واحدة واحدة.

– مميزات طريقة الاقتطاف:

ميزة الطريقة دي انها مش محتاجة جرح لانه بياخد بصيلة بصيلة ومش محتاج يفتح جرح في الراس.

– عيوب طريقة الاقتطاف:

الطريقة دي من عيوبها انه ممكن يأذي البصيلة وهو بياخدها, ده غير انها بتحتاج وقت طويل في الزراعة, وتكلفتها كمان اعلى, عشان كده استخدامها اقل في مراكز التجميل من الطريقة الاولى بتستخدم دايما في الحالات اللي مش محتاجة زراعة كمية شعر كبيرة.

ومدة العملية في الطريقتين بتختلف من حالة للتانية حسب عدد البصيلات اللي هتتزرع, ونتيجة الزرع بتظهر بعد شهر تقريبا وده بيتوقف على سرعة نمو الشعر.

بالنسبة للاثار الجانبية:

1- لو انتي استخدمتي طريقة الشريحة ممكن تحسي بشد في مكان الجرح, بس ده بيروح بعد اسبوع تقريبا من الزراعة.

2- بعد العملية هتحسي بتنميل في الراس من ورا وده احساس طبيعي بسبب تأثير التخدير الموضعي والاحساس ده هيروح لما ينتهي اثر التخدير.

3- ممكن في بعض الحالات يحسوا بحكة بسيطة جدا في المنطقة اللي اتاخدت منها الشريحة وبتاخد وقتها وبتروح.

4- وفي نسبة قليلة جدا ممكن يحصلهم تورم بسيط اوي في منطقة الجبهة بعد العملية وده ممكن يقعد كام يوم وبعدها هيروح لوحده.

5- وممكن نوعية الشعر المزروع تختلف شوية عن فتلة شعرك الطبيعية يعني يكون اخشن او انعم من شعرك الطبيعي بس بيكون الاختلاف بنسبة بسيطة اوي.

 غير الحاجات دي مافيش اي اثار جانبية تانية يعني تقدري تمارسي حياتك طبيعي جدا بعد الزراعة مباشرة يعني تاكلي وتشربي كل حاجة وتتفرجي على التليفزيون وتتكلمي في الموبايل يعني مافيش ممنوعات بعد عملية الزرع, وحتى مالهاش تحضيرات قبل عملية الزراعة انتي بتروحي تعمليها وتمشي بعدها تمارسي حياتك بشكل طبيعي.