نصايح ووصفات لشد ترهلات البطن بعد الحمل والولادة
الجسم اثناء فترة الحمل وبعد الولادة بيحصل له تغييرات كتير ومن اكتر المشاكل اللي بتقابل اي ام بعد الولادة هي ترهلات البطن ومشكلة الترهلات انها بتاخد وقت طويل على ما تروح والبطن تتشد وترجع زي الاول وده لان البطن بتتمدد اثناء فترة الحمل وده اللي بيسبب الترهل, وكمان الترهلات فترة علاجها بيتوقف على حجم البطن اثناء فترة الحمل لو بطن الام كانت كبيرة يبقى ساعتها الترهلات هتاخد وقت اطول في العلاج ولو البطن كانت صغيرة هتاخد وقت اقل, وطبعا المشكلة دي بتسبب ازعاج لاي ام بسبب تغيير شكل الجسم, احنا النهاردة جيبنا لكل الامهات اللي بيعانوا من المشكلة دي نصايح ووصفات لشد ترهلات البطن.
تعالوا نعرف الاول شوية نصايح هتساعد على شد ترهلات البطن:
1- حاولي تتجنبي الاكلات اللي فيها دهون وسكريات كتير.
2- اتجنبي شرب المشروبات الغازية بعد الاكل على طول.
3- اندغي الاكل كويس اوي عشان تتفادي انتفاخ البطن زيادة.
4- اشربي كمية مية كافية لانها بتساعد في عملية الهضم.
5- اتجنبي لبس الكعب العالي لان ده بيعمل تقوس في الضهر وبيسبب ارتخاء عضلات البطن.
6- وانتي ماشية او قعدة عودي نفسك على تمرين بسيط اوي يتعمل وهو انك تشدي عضلات البطن لجوه لان ده بيساعد على تقوية عضلات البطن وشدها.
7- في تمرين تاني ممكن تعمليه وهو تمرين كتم النفس لثواني مع شد البطن لجوه, والتمرين ده ممكن يتعمل في اي مكان يعني كل ما تفتكري اعمليه ده بيساعد جدا على شد البطن.
8- ممكن تحاولي تواظبي على تمارين البطن, نامي على ضهرك واتني ركبتك مع الشهيق وانتي بترفعي نصك اللي فوق من على الارض لحد ما يخبط في ركبتك واعملي زفير وانتي بتنزلي جسمك تاني على الارض, كرري الحركة 10 مرات, مرتين في اليوم, بس ملحوظة مهمة جدا بالنسبة للرياضة لو الولادة طبيعية ابدأي اعملي رياضة بعد الولادة باربعين يوم, ولو الولادة قيصرية ابدأي مارسي رياضة بعد شهرين من الولادة.
9- ممكن بعد الولادة باسبوعين تبدأي تمارسي رياضة المشي يوميا لمدة ساعة.
10- ممكن تستخدمي مشدات البطن من تاني يوم من الولادة لو الولادة طبيعية لانها بتساعد جدا في شد الترهلات وهتلاحظي النتيجة خلال اربعين يوم, ولو الولادة قيصرية البسي المشد بعد شهر ونص من الولادة.
– دلوقتي هنعرف مع بعض مجموعة وصفات طبيعية لشد ترهلات البطن:
1- الوصفة الاولى:
المكونات:
معلقة زيت ياسمين.
معلقتين زيت لوز مر.
معلقتين زيت زيتون.
معلقة خل تفاح.
طريقة التحضير والاستخدام:
هنخلط المكونات كلها مع بعض كويس, وادهني بطنك بالخلطة واثناء وانتي دهناها اعملي مجهود يعني ممكن تدهنيها واعملي مثلا شغل البيت, او مارسي اي رياضة.
2- الوصفة التانية:
المكونات:
شبة ناعمة.
زيت زيتون.
نشا.
مية.
طريقة التحضير والاستخدام:
اخلطي زيت الزيتون والنشا والشبة مع شوية مية لحد ما يتكون عندك خليط متجانس, ادهني الخليط على منطقة البطن وسيبيه لحد ما ينشف وبعدين اغسليه بمية دافية, مع الاستمرار على الوصفة هتلاحظي النتيجة.
3- الوصفة التالتة:
المكونات:
زيت ياسمين.
زيت قرنفل.
طريقة التحضير والاستخدام:
اخلطي الزيوت مع بعض بكميات متساوية, ادهني منطقة البطن بالخليط مع التدليك, وممكن كمان تستخدمي كل زيت لوحده من غير ما تخلطيهم مع بعض.
4- الوصفة الرابعة:
المكونات:
2 معلقة كبيرة بن مطحون.
مية دافية.
طريقة التحضير والاستخدام:
اخلطي البن مع شوية مية دافية لحد ما يبقى عندك خليط قوامه معقول, دلكي منطقة البطن بالخليط لمدة خمس دقايق وبعدين دلكيها لمدة خمس دقايق تانية في الاتجاه التاني واستمري في التدليك في الاتجاهين لمدة نص ساعة وبعدين اغسلي الخليط بمية دافية.
5- الوصفة الخامسة:
المكونات:
2 معلقة كبيرة من اي كريم مغذي للبشرة.
3 معالق جلسرين.
3 معالق زيت زيتون.
معلقة صغيرة مية ورد.
عصير نص ليمونة.
طريقة التحضير والاستخدام:
اخلطي المكونات كلها مع بعض, ادهني بيها منطقة البطن مع التدليك وسيبيها لمدة ساعة وبعدها اغسليها بمية دافية, واستمري عليها يوميا.
6- الوصفة السادسة:
المكونات:
زيت الهندباء.
زيت زيتون.
زيت الشاي الاخضر.
زيت المرمرية.
زيت الروز ماري “اكليل الجبل”.
زيت البابونج.
زيت الزعتر.
زيت الحلبة.
طريقة التحضير والاستخدام:
اخلطي الزيوت مع بعض بكميات متساوية وحطيها في اي ازازة عندك ودلكي منطقة البطن في حركات دائرية بخليط الزيوت ده لمدة ربع ساعة يوميا, بعد شهر من استخدامه هتحسي بالفرق وهتلاحظي ان الترهلات خفت كتير.
7- الوصفة السابعة:
المكونات:
زيت الليمون.
زيت النعناع.
زيت الزنجبيل.
خل التفاح.
طريقة التحضير والاستخدام:
اخلطي كل المكونات مع بعض بكميات متساوية, ادهني بيهم منطقة البطن يوميا.
8- الوصفة التامنة:
المكونات:
زيت اللوز.
زيت الخردل.
طريقة التحضير والاستخدام:
اخلطي الزيوت مع بعض وادهني بيهم منطقة البطن مع التدليك, واستمري على الوصفة يوميا.
9- الوصفة التاسعة:
اخلطي زيت فيتامين E مع اي مرطب للبشرة ودلكي بيها منطقة البطن يوميا.
10- الوصفة العاشرة:
ادهني منطقة البطن يوميا ببياض البيض لانه غني جدا بالبروتينات وده بيساعد على علاج الترهلات وترميم البشرة.
11- الوصفة الحادية عشر:
ادهني منطقة البطن بزيت الخروع وبعدين لفيها بغطا بلاستيك واملي البانيو مية سخنة واقعدي فيه لمدة 45 دقيقة وبعدين اغسلي منطقة البطن بالمية, مع الاستمرار على الطريقة دي هتلاحظي الفرق وان الترهلات بدأت تتشد.
12- الوصفة الثانية عشر:
من الحاجات المفيدة جدا في شد الترهلات جل الصبار, ادهني منطقة البطن بجل الصبار يوميا.
13- الوصفة الثالثة عشر:
سخني ورقة كرنب على النار او حتى بالمكوى وحطيها على منطقة البطن ولفي عليها شاش طبي وسيبيها طول اليوم, وكرري الوصفة دي يوميا.
– مشروبات لشد ترهلات البطن:
1- الوصفة الاولى:
المكونات:
3 معالق من عشبة المرمرية.
كوباية مية مغلية.
طريقة التحضير والاستخدام:
انقعي المرمرية في كوباية المية المغلية وسيبيها لمدة ساعة وبعدين صفيها واشربيها مره في اليوم, وتتكرر يوميا.
2- الوصفة التانية:
المكونات:
معلقة شاي اخضر.
معلقة زنجبيل.
نعناع طازة.
قشر رمان.
طريقة التحضير والاستخدام:
هنخلط كل المكونات دي مع بعضها ونغليها كويس, وتشربي كوباية من الخليط ده من غير سكر تلات مرات في اليوم, وتكرريها كل يوم.
3- الوصفة التالتة:
المكونات:
كمون.
ليمون.
طريقة التحضير والاستخدام:
انقعي شوية كمون في كوباية مية مغليه وحطي معاهم شرايح ليمون وسيبيه منقوع طول الليل واشربيه الصبح على الريق, وكرري الوصفة يوميا.
4- الوصفة الرابعة:
اشربي كل يوم 3 كوبايات من مغلي الشمر وتكون كوباية منهم على الريق والاتنين التانين قسميهم على باقي اليوم.
5- الوصفة الخامسة:
حطي معلقة من بذر الكتان مع السلطة او اللبن مره في اليوم, وبذر الكتان يكون صحيح مش مطحون, واستمري عليها يوميا.
