فوايد الموز واستخداماته للبشرة والشعر

بقلمريهام محمود فيشعر visibility7780

فوايد الموز الصحية والجمالية كتير جدا وده لانه مليان فيتامينات زي فيتامين E , A , B , C وكمان فيه مجموعة من المعادن المهمة للجسم زي البوتاسيوم, والحديد, والزنك, والمنجنيز, غير كل فوايده الصحية دي للجسم ليه فوايد كمان للبشرة والشعر هنعرفها مع بعض بالتفصيل.

فوايد الموز للبشرة
فوايد الموز للبشرة

– تعالوا نتعرف الاول على فوايد الموز واستخداماته للبشرة:

الموز ليه فوايد كتير للبشرة لانه غني بالفيتامينات اللي محتاجاها البشرة زي فيتامين C , B6 اللي يعتبروا من اهم الفيتامينات اللي بتحافظ على صحة ومرونة البشرة والجلد, ده غير انه فيه كمية كبيرة جدا من المواد المضادة للاكسدة, والمنجنيز الموجود في الموز بيحمي البشرة من اعراض اليشخوخة المبكرة وبيحافظ على شباب البشرة, كمان الموز بيحافظ على رطوبة الجلد جدا وبيحميها من الجفاف والتقشير لان فيه حوالي 75% من وزنه مية.

1- الموز كمرطب طبيعي:

الموز يعتبر مرطب طبيعي للبشرة لان فيه فيتامين A اللي بيعيد رطوبة البشرة وبيعالج جفاف وتلف الجلد.

– ممكن نستخدمة لترطيب البشرة باكتر من طريقة اول طريقة نجيب موزة نهرسها ونفردها على بشرتنا ونسيبها من 20 ل 25 دقيقة وبعدين نغسل البشرة بمية دافية, ولو بشرتك جافة اوي وبتعاني من القشور في بشرتك ضيفي على الموزة المهروسة معلقة عسل نحل الماسك ده نتيجته هايلة جدا بيرطب البشرة اوي وبينعمها وبشكل فوري من اول استخدام.

– الطريقة التانية هنهرس موزة ونضيف عليها معلقة كبيرة زبادي ومعلقة صغيرة فيتامين E ونقلبهم المكونات مع بعض كويس ونفرد الخليط على البشرة ونسيبه نص ساعة وبعدين نغسله بمية دافية.

2- للحفاظ على نضارة وشباب البشرة:

الموز غني جدا بفيتامين C اللي بيحافظ على توهج وشباب البشرة وبيخليها صحية ومنورة.

– ممكن تهرسي نص موزة وتضيفي عليها نص معلقة كبيرة خشب صندل مطحون “من عند العطار” وعليهم نص معلقة صغيرة عسل نحل نخلط المكونات مع بعض كويس ونحط الخليط على البشرة ونسيبه من 20 ل 25 دقيقة وبعدين نغسل بشرتنا بمية دافية, الماسك ده مفيد جدا للبشرة الدهنية بشكل خاص لان خشب الصندل بينضف البشرة الدهنية من الزيوت الزايدة على البشرة وفي نفس الوقت الموز بيحافظ عليها رطبة وبيعالج جفافها.

– ممكن تهرسي موزة وتضيفي عليها من 2 ل 3 معالق كبيرة عصير ليمون وتفردي الخليط على بشرتك وتسيبيه لمدة 25 دقيقة وبعدين تغسلي بشرتك بمية دافية, الماسك ده بيعالج البشرة من الجفاف ومن اي بقع غامقة او شوائب على البشرة.

3- الموز كمقشر للبشرة:

بيحافظ على شباب البشرة وبيخلصها من الجلد الميت لانه غني بالمواد المضادة للاكسدة.

– جيبي موزة اهرسيها وضيفي عليها معلقة كبيرة سكر اخلطيهم مع بعض وحطي الخليط على بشرتك وافركي البشرة بالراحة قي حركات دائرية لمدة دقايق وبعدين اغسلي بشرتك بمية دافية, السكر هيخلصك من الجلد الميت والموز هيرطب البشرة.

– اهرسي موزة وضيفي عليها من 2 ل 3 معالق كبيرة شوفان مطحون ومعلقة كبيرة عسل نحل ومعلقة كبيرة لبن اخلطي المكونات مع بعض كويس وافردي الخليط على البشرة وسيبيه لمدة 5 دقايق وبعدين شيليه بطريقة الفرك واغسلي بشرتك بمية باردة, ولو بشرتك جافة اوي ممكن تستبدلي اللبن بالكريمة.

– اهرسي نص موزة وضيفي عليها معلقة كبيرة حليب جوز هند و2 معلقة كبيرة ارز واخلطي المكونات كويس مع بعض هيبقى عندك خليط سميك شوية دلكي بشرتك بالخليط ده لمدة دقايق وبعدين اغسليه بمية باردة.

– ممكن كمان نستخدم الموز كسكراب او مقشر للجسم كله جيبي موزتين وضيفي عليهم من 4 ل 5 ثمرات فراولة وحطيهم في الخلاط واهرسيهم مع بعض كويس لحد ما يبقوا ناعمين وبعدين ضيفي عليهم 3 معالق كبيرة سكر وافركي جسمك كله بالخليط, الماسك ده بينعم الجسم جدا وبيرطبه وبيخلصك من الجلد الميت.

4- لمكافحة الشيخوخة:

المواد المغذية والفيتامينات الموجودة في الموز زي فيتامين E , A بتساعد على الحفاظ على شباب البشرة وبتحميها من الشيخوخة.

– عشان نعمل ماسك الموز المضاد للشيخوخة هنهرس موزة مع ثمرة افوكادو ونفرد الخليط على البشرة ونسيبه لمدة 25 دقيقة وبعدين نغسل البشرة بمية دافية, الماسك ده بيحافظ على شباب البشرة وبيرطبها جدا وبيحمي البشرة من الجذور الحرة اللي بتسبب شيخوخة البشرة وبيعالج تلف البشرةز

– ماسك تاني لمكافحة الشيخوخة هنهرس موزة ونضيف عليها معلقة مية ورد ونفرد الخليط على البشرة والرقبة ونسيبه نص ساعة وبعدين نغسل بشرتنا بمية دافية.

5- للعناية بالقدم:

الموز مفيد جدا للقدمين وبيعالج خشونة وتشققات القدم.

اهرسي موزتين وادهني بيهم القدم بعد ما تغسليها وتنشفيها كويس وسيبيه عشر دقايق وبعدين اغسليه, الموز بيخترق الجلد وبيرطبه وبيعالج الجفاف والتشققات.

6- لعلاج انتفاخات العين:

– اهرسي نص موزة وادهنيها تحت منطقة العين وسيبيها من 15 ل 20 دقيقة وبعدين اغسليها بمية باردة, هتلاقي الانتفاخات اللي تحت العين اختفت في ساعتها, وده لان الموز غني جدا بالبوتاسيوم وده بيخلص البشرة من السوايل الزايدة تحت الجلد وبيقلل من التورم والانتفاخات.

– ممكن كمان تستخدمي قشر الموز بدل الموز المهروس حطي قشر الموز على منطقة تحت العين لعلاج الانتفاخات.

فوايد قشر الموز للبشرة
فوايد قشر الموز للبشرة

– فوايد قشر الموز للبشرة:

زي ما الموز مفيد للبشرة كمان قشر الموز مفيد جدا للبشرة لانه غني بالمواد المضادة للاكسدة, وليه استخدامات كتير ويعتبر علاج طبيعي وفعال لكتير من مشاكل البشرة.

1- لعلاج حب الشباب:

هنجيب قشر الموز وبالناحية اللي جوه من القشر اللي بيكون لونها ابيض نفرك المنطقة اللي فيها حب الشباب على البشرة لمدة خمس دقايق او لحد ما اللون الابيض اللي في القشر يبقى لونه بني وبعدين سيبيه على بشرتك لحد ما ينشف وبعدين اغسليها بمية دافية, كرريها تلات مرات في اليوم على الاقل هتلاقي حب الشباب والبثور خفت كتير من البشرة خلال اسبوع واحد بس.

2- لعلاج حكة وتورم الجلد:

فعال جدا في علاج الحكة والتورم, افركي قشر الموز على مكان التورم والحكة لمدة دقايق هتلاقيها خفت جدا وهدت بشرتك اوي.

3- للتخلص من التجاعيد:

قشر الموز مفيد جدا في التخلص من التجاعيد, حطي قشر الموز على بشرتك وسيبيه لمدة ربع ساعة وبعدين اغسلي البشرة, بعد اسابيع قليلة هتلاحظي تغيير كبير في بشرتك  وهتحسي بفرق وان التجاعيد قلت كتير على البشرة.

4- لعلاج الصدفية والثآليل:

حطي قشر الموز على المناطق المصابة وافركي بيه بشرتك لمدة من 10 ل 12 دقيقة مرتين في اليوم, يمكن هياخد وقت شوية في العلاج بس مع الاستمرار هيجيب نتيجة فعالة على البشرة اكتر من اي كريم او اي منتج صناعي تاني بيتباع لعلاج المشاكل الجلدية.

فوايد الموز للشعر
فوايد الموز للشعر

– فوايد الموز واستخداماته للشعر:

الموز مفيد للشعر لانه غني جدا بالبوتاسيوم, والزيوت الطبيعية, والكربوهيدرات, والفيتامينات اللي بتساعد على ترطيب الشعر وبتحميه من التقصف والتكسر وبيساعد على نمو الشعر وبيحسن الشعر بشكل كبير جدا وبيخليه صحي وبيلمع.

1- لتنعيم الشعر :

– اهرسي موزة مع ثمرة افوكادو وضيفي عليهم شوية من حليب جوز الهند لحد ما يبقى عندك خليط قوامة متوسط وحطي الخليط على شعرك وسيبيه من 15 ل 20 دقيقة وبعدين اغسليه عادي بالشامبو والبلسم, الماسك ده بينعم الشعر جدا, ممكن تستخدمي بدل الافوكادو كاكاو لان الكاكاو كمان بيبرز اللون الطبيعي للشعر.

– حطي الموز في الخلاط وضيفي عليه ربع كوباية زيت زيتون وبيضة واضربيهم كويس مع بعض وبعدين حطي الخليط على شعرك وسيبيه ربع ساعة وبعدين اغسليه بالشامبو والبلسم.

 2- لعلاج تساقط الشعر:

 اهرسي موزة وضيفي عليها زبادي واخلطيهم مع بعض كويس هيبقى عندك خليط شبه الكريم حطي الخليط على شعرك وسيبيه من 15 ل 20 دقيقة وبعدين اغسليه بمية باردة.

3- لتغذية وعلاج الشعر الجاف:

اهرسي موزة وضيفي عليها 3 معالق كبيرة عسل نحل اخلطيهم كويس وحطي الخليط على شعرك وسيبيه من 15 ل 20 دقيقة وبعدين اغسلي شعرك بالشامبو والبلسم.

4- لاصلاح الشعر الجاف والتالف:

اهرسي موزة وضيفي عليها كام نقطة زيت لوز اخلطيهم كويس وحطي الخليط على شعرك وسيبيه من 10 ل 15 دقيقة, فيتامين C , A الموجودين في الموز مع فيتامين E الموجود في زيت اللوز هيعالجوا تلف الشعر وينعمه ويرطبه.

لما نعمل اقنعة الشعر لازم ناخد بالنا من حاجتين.

– نهرس الموز كويس جدا ونتاكد انه ناعم زي الكريم ومافيش فيه اي قطع, وامزجي كل مكونات الماسك مع بعضها كويس.

– تاني حاجة متسيبيش الماسك على شعرك لحد ما ينشف اوي يعني يكون رطب شوية عشان تقدري تغسليه بسهولة وميلزقش في شعرك.

فوايد اكل الموز
فوايد اكل الموز

– فوايد اكل الموز الصحية والجمالية:

فوايد الموز مش بس في ماسكات الشعر والبشرة لا كمان اكله مفيد جدا من الناحية الصحية والجمالية لان زي ما كلنا عارفين ان الجمال بيبدأ من جوه الاول وده بينعكس بشكل ايجابي على البشرة والشعر, وخبراء التجميل دايما يقولوا كلي موزة واحدة في اليوم تخلي المشاكل الجمالية بعيد عنك.

1- من فوايد الموز انه بيساعد على النوم بشكل احسن, طبعا كلنا عارفين ان النوم ساعات كافية في اليوم مهم جدا وبينعكس بشكل ايجابي على صحة بشرتنا وشعرنا, والموز بيوفر لجسمنا العناصر اللي بيحتاجها عشان ننام بشكل احسن, احنا جسمنا بيحتاج عنصر اسمه التربتوفان وده حمضي اميني ضروري لانتاج هرمون الميلاتونين اللي هو هرمون النوم, الموز بقى بيحتوي على كميات كبيرة جدا من التربتوفان والسيروتونين وكمان نسبة كبيرة من الكربوهيدرات اللي بتخلي المخ يستفاد من التربتوفان والسيروتونين بشكل اكبر وده بيساعد على انتاج هرمون النوم اللي هو الميلاتونين بشكل احسن وبالتالي بيخليكي تاخدي كفايتك من النوم وتكون النتيجة بشرة صحية وشعر صحي, كل يوم قبل ما تنامي بكام ساعة كلي موزة واحدة بس ده هيساعدك تنامي بشكل احسن.

2- اكل الموز بيساعد على زيادة الدورة الدموية في الجسم لانه غني جدا بالبوتاسيوم زي ما قولنا وده بالتالي بيخلي البشرة منورة وصحية وبيزود من نمو الشعر.

3- من الحاجات اللي بتأثر على شعرنا وبشرتنا بشكل سلبي التدخين وشرب القهوة لو عايزة تتخلصي من العادات السيئة دي  زودي من اكل الموز ده هيساعدك جدا تتخلصي منها بسهولة, لان الدراسات اثبتت ان الموز بيساعد من تقليل الرغبة في النيكوتين والكافيين وبيرفع الحالة المزاجية وبيحافظ على مستويات الطاقة في الجسم وبالتالي هو مفيد جدا لكل الناس اللي عايزة تبطل تدخين او شرب قهوة.

بعد مع عرفنا فوايد الموز دي كلها اكيد هنحرص اننا ناكل الموز كل يوم ويبقى جزء من نظامنا الغذائي اليومي خصوصا انه متوفر وسعره رخيص يعني متاح لاي حد وكده نحافظ على جمال بشرتنا وشعرنا بشكل طبيعي من غير استخدام حاجات ومنتجات فيها مواد كيميائية تضرنا.