ازاي تختاري البنطلون المناسب لشكل جسمك

بقلمأنجي سليمان فيموضة وأزياء visibility10513

محدش يقدر ينكر ان البنطلون هو قطعة الملابس الاساسية في الدولاب، سواء كان ستايلك كاجوال او كلاسيك او لو كان شغلك فورمال او لأ واحيانا من ضمن اطقم السوارية بتاعتك بتلاقي البنطلون هو القطعة اللي بتعتمدي عليها في اطلالتك النهائية، لكن هل سألتي نفسك لو كان موديل البنطلون اللي بتلبسيه هو الموديل المثالي بالنسبة لشكل جسمك او لأ، تعالي معانا اعرفي ازاي تختاري البنطلون المناسب لشكل جسمك

الجسم القصير

لو كان جسمك بيتميز بأنه صغير وطولك قصير شوية يبقى اكيد مش بتلاقي الموديل اللي يريحك بسهولة لكن الحكاية اسهل من كده، لصاحبات الجسم ده حتلاقي دايما الموديلات اللي بتدي ايحاء بالطول هي الانسب والموديلات دي هي السكيني او البنطلون القصير اللي طوله يادوب على وش الشوز وفي حاجة كمان وهي انك تختاري البنطلونات اللي لها الوان زاهيه او فاقعة

البنطلون المناسب لشكل جسمك

الطويلة النحيفة

بالنسبة للبنت اللي جسمها بالمواصفات دي فهي محتاجة موديل يبين رشاقتها ويخليها تبان متناسقة من غير ما يدي ايحاء بالطول والموديل الانسب للجسم ده هو البنطلون الاسترايت خاصة او الشارلستون البسيط مش الواسع اوي لأنه بيظهر الطول بشكل رشيق، وابعدي تماما عن البنطلون القصير وياريت طول بنطلونك يوصل لبداية كعب الشوز

البنطلون المناسب لشكل جسمك (2)

المقاسات الكبيرة

اما صاحبات المقاس الكبير فهما على عكس المتوقع بيليق معاهم البنطلون الواسع طبعا والالوان المناسبة هي الالوان الغامقة زي الاسود او الكحلي وممكن كمان لو البنطلون قماش تختاري موديل فيه خطوط رفيعة بالطول بدرجة لون افتح بحاجة بسيطة من لون البنطلون عشان تدي ايحاء بالطول، اما الطول فالطول المظبوط هو مناسب ابعدي عن القصير اوي او عن الطويل اوي

البنطلون المناسب لشكل جسمك (6)

صاحبات الوسط العريض

اما لو انتي من البنات اللي وسطهم عريض بمعنى ان حردة الوسط عندك مش ظاهرة اوي وسواء كنت رفيعة او ممتلئة فأكتر موديل مناسب ليكي هو الموديل اللي وسطه مرتفع واللي بيدأ حردته من نص الخصر وبيدي ايحاء بوجود حردة للوسط وبيبقى مناسب اكتر لو لبستي معاه بلوزة او تانك توب ودخلتيه من جوه البنطلون

البنطلون المناسب لشكل جسمك (4)

صاحبات الجناب العريضة

اما لو كنتي على العكس وسطك رفيع ومنطقة الجناب والفخدين عريضة شوية فأنتي حتحتاجي موديل زي الشارلستون عشان يظهر الوسط متناسب اكتر من الجانبين بمعنى ان البنطلون يكون نازل من فوق على واسع شوية عشان يظهر منطقة الوسط بشكل متناسق اكتر

البنطلون المناسب لشكل جسمك (5)