اتعرفوا معانا على موضة البنطلون الواسع .. وازاي نلبسه ؟
موضة البنطلون الواسع انتشرت اوي في الفترة الاخيرة لانه من الحاجات اللي بتليق تقريبا على كل الاجسام بس المهم اننا نعرف ازاي نلبسه وننسقه بطريقة حلوة عشان يطلع شكله شيك وحلو, والميزة في البنطلونات الواسعة خصوصا اللي بيبقى وسطها عالي انها بتدي طول للرجل.
ممكن نلبسه وننسقه باكتر من طريقة وننوع في لبسه يعني ممكن يتلبس على بلوزة أو قميص بالنهار للوك فورمال للشغل, او يتلبس على توب لو عايزين لوك يمشي لبليل اكتر, وطبعا مناسب جدا للمحجبات لانه واسع ومش بيبن تفاصيل الجسم, بالنسبة للشوز انسب شوز على البنطلون الواسع هو اللي يكون بكعب لانه هيطلع اشيك بكتير عليه من الفلات وكمان عشان الرجل واسعة وميضايقكيش في المشي او تدوسي عليه انسب فهيكون انسب حاجة الشوز اللي بكعب عشان يرفعه ويظبطه, وفي افكار كتير للبسه.
تعالوا نعرف الاول شوية نصايح للبس البنطلون الواسع عشان يطلع انيق:
1- لما تختاري التوب او البلوزة اللي هتلبسيها عليه اختاريها تكون واخدة شكل الجسم وابعدي عن الحاجات الواسعة اوي لانه هيطلع شكلها مش حلو.
2- من الافضل انك تدخلي البلوزة جوه البنطلون او تدخلي الجزء اللي قدام بس من البلوزة الشكل هيطلع اشيك.
3- ممكن تلبسي عليه حزام عشان تحددي منطقة الوسط ويطلع شكله شيك.
4- للوك كاجوال للجامعة او لخروجاتك مع اصحابك الصبح ممكن تلبسيه على قميص جينز وبدل ما تدخليه جوه البنطلون ممكن تغيري وتربطي القميص من قدام هيديكي استايل مختلف وحلو.
5- ممكن يتلبس مع الكارديجان واصلا الكارديجان من الحاجات اللي طالعة موضة اوي الفترة دي ونازل في موضة ربيع 2016 باشكال كتير, او تلبسيه على بليزر بيطلع شيك جدا.
6- وزي ما قولنا في البداية انه اشيك حاجة عليه انه يتلبس على كعب عالي بس ممكن بردوا تلبسيه على الشوز الرياضي لخروجات الصبح.
تعالوا نشوف مع بعض افكار للبس موضة 2016 البنطلون الواسع واختاري منها اللي يناسبك:
اتعرفوا معانا كمان على موضة بنطلون ال Boyfriend Jeans وازاي نلبسه.
