اعرفوا معانا فوايد زيت الجوجوبا للشعر والبشرة

زيت الجوجوبا من انواع الزيوت المفيدة جدا للشعر والبشرة اولا لانه تقريبا الزيت الوحيد اللي يشبه الزيوت الطبيعية اللي بتفرزها البشرة من الغدد الدهنية اللي تحت سطح الجلد عشان كده هو فعال جدا للبشرة والشعر, ده غير انه بيحتوي على كل الفيتامينات والمعادن المفيدة لصحة الشعر والبشرة زي فيتامين B , E المركب, والنحاس, والزنك, والسيلينيوم, واليود, والكروم.

وميزته انه مناسب لكل انواع البشرة حتى اللي بشرتهم حساسة اوي وبتتاثر من اي حاجة زيت الجوجوبا يعتبر انسب زيت ليهم لانه مالوش اي رد فعل عكسي على البشرة, وممكن يستخدم لوحده على البشرة والشعر او ممكن يتخلط مع زيوت تانية عشان نزود من تأثيره وفعاليته, وزيت الجوجوبا ليه استخدامات وفوايد كتير جدا للشعر والبشرة والجسم كله هنعرفها مع بعض بالتفصيل.

تعالوا نعرف فوايد زيت الجوجوبا للشعر:

شعرنا بيتعرض لحاجات كتير بتتلفه زي الرطوبة والحرارة والشمس والصبغة ده غير المواد الكيمائية اللي موجودة في الشامبو ومنتجات الشعر ده كله بيأثر على صحة شعرنا ويقصفه وينشفه ومحتاجين اننا نرجع له الرطوبة تاني ونعالجه وانسب الزيوت لعلاج جفاف وتقصف الشعر هو زيت الجوجوبا بيخلصك من الجفاف وبيرطب ويطري الشعرجدا ومش بس بيعالج الجفاف والتقصف كمان بيمنع قشرة الشعر وتساقط الشعر, والميزة فيه انه مناسب لكل انواع الشعر وبشكل خاص الشعر الجاف واللي بيعاني من التقصف وانقسام الاطراف, وده لانه بيشبه الزيوت الطبيعية اللي بتفرزها فروة الراس عشان كده هو يعتبر انسب الزيوت المعالجة للشعر.

1- زيت الجوجوبا كبلسم للشعر:

ممكن نستخدم زيت الجوجوبا كبلسم الشعر هيغذي ويرطب الشعر جدا وبيحسن ملمسه اوي وينعمه, ادهني فروة الراس واطراف الشعر بزيت الجوجوبا كل يوم او يوم ويوم حسب شعرك ما يكون شعرك محتاج ده هيرطب بصيلات الشعر ويحميه من التلف يعني مش بس مجرد بلسم لا هو بيحمي الشعر كمان من اي اضرار.

2- لتنظيف فروة الراس:

مفيد جدا في تنضيف فروة الراس من الدهون الزيادة اللي بتسبب انسداد المسام وبيخلي الشعر يتساقط وبتسبب تلف الشعر لو دهنتي زيت الجوجوبا على فروة الراس هتنظف فروة الراس وبالتالي هتمنع تساقط وتلف الشعر, ده غير انه فيه خصائص مضادة للجراثيم والالتهابات وده بيحافظ على فروة الراس نضيفة وصحية, وبيخلي الشعر صحي وبيلمع.

3- لتلميع الشعر:

زيت الجوجوبا يعتبر مصل طبيعي للشعر بيخلي شكله بيلمع وصحي, ممكن تدهني شعرك بكام نقطة بس من الزيت من الجذور لحد الاطراف هيرطب الشعر جدا وخصوصا الشعر الجاف اللي بيكون تالف من المواد الكيميائية في الشامبو ومنتجات تصفيف الشعر او بسبب الجو والرطوبة.

4- لزيادة نمو الشعر:

بيساعد جدا في زيادة نمو الشعر ومنع تساقطه, دلكي فروة الراس بالزيت ده هيحفز تدفق الدم لفروة الراس وهيزود نمو الشعر, وممكن تخلطي زيت الجوجوبا مع زيوت تانية زي زيت جوز الهند او زيت الزيتون او زيت اللوز وتعملي بيه حمام زيت لشعرك قبل ما تغسليه تدفيه شوية وتدهني بيه الشعر وتسيبيه على شعرك نص ساعة او ساعة وبعدين تغسليه بالشامبو.

5- لعلاج فروة الراس الجافة:

زيت الجوجوبا مفيد جدا لفروة الراس الجافة اللي بتسبب ظهور قشرة الشعر بيرطب فروة الراس بشكل مكثف وبيخترق المسام وبالتالي بيرطب الشعر من الجذور وبيحافظ عليه, ولانه كمان فيه عناصر مضادة للبكتيريا والجراثيم فهو فعال جدا في علاج قشرة الشعر.

 فوايد زيت الجوجوبا للبشرة:

زيت الجوجوبا ليه فوايد كتير جدا للبشرة بيحفز البشرة على انتاج الكولاجين الطبيعي, بيحمي من الشمس, بيمنع اعراض الشيخوخة المبكرة زي الخطوط الدقيقة وتجاعيد البشرة.

1- مرطب للبشرة:

بيرطب البشرة جدا وممكن تستخدميه على البشرة وعلى كل الجسم, ممكن تستخدميه على البشرة كمرطب يومي بيساعد على توازن البشرة, وفيه خصائص مضادة للالتهابات بتحمي الجلد من الجفاف, ممكن تحطي منه من 4 ل 6 قطرات كمرطب نهاري, ممكن تدهني بيه بشرتك كل يوم قبل ما تناميوتخليه على بشرتك لحد الصبح عشان بشرتك تستفيد منه طول الليل, وممكن تدهنيه على شفايفك كمان لانه مرطب هايل للشفايف.

2- منظف للوجه:

منظف ومطهر هايل للوش, ومش بس كده ممكن استخدامه كمزيل مكياج طبيعي بلي قطنة بزيت الجوجوبا وامسحي بيها المكياج هيشيله كله فورا ويزيل اي شوائب من على البشرة وهو مزيل للمكياج كله حتى مكياج العيون والرموش ممكن نشيل بيه الماسكارا لانه مالوش اي تأثير سلبي على العيون يعني امن جدا.

3- لعلاج لحب الشباب:

يعتبر زيت الجوجوبا من العلاجات الفعالة جدا لحب الشباب لان فيه خصائص مضادة للبكتيريا وبيحتوي على اليود اللي بيمنع نمو البكتيريا الضارة اللي بتسبب البثور والرؤوس السودا وحب الشباب, والميزة في زيت الجوجوبا انه مش دهني غير اي منتج تاني للبشرة يعني مش هيسبب انسداد المسام اللي ممكن تسبب ظهور حب الشباب, عشان كده هو يعتبر علاج فعال جدا لحب الشباب لو دهنتي بشرتك بيه يوميا.

4- لعلاج تجاعيد البشرة:

مفيد جدا في علاج تجاعيد البشرة لانه غني جدا بفيتامين E , وفعال جدا في التخلص من الجذور اللي بتكون مسئولة عن شيخوخة البشرة يعني استخدامه بشكل منتظم هيخلصك من التجاعيد وكمان من الخطوط الدقيقة على البشرة, ده غير انه فيه مواد مضادة للاكسدة اللي بتساعد في تجديد خلايا الجلد.

5- مرطب للجسم:

زيت الجوجوبا مش بس مفيد للبشرة لا كمان للجسم كله هو مرطب هايل جدا للجسم, ممكن تدهني بيه جسمك كله بعد الحمام عشان تكون مسامات الجسم متفتحة ويتشرب الزيت كويس هيرطب الجسم ويخلي ملسمه ناعم اوي, وهيمنع تشقق الجلد, وهيحمي بشرتك من الجفاف والتهيج بسبب العناصر المضادة للالتهابات اللي بيحتوي عليها, ممكن بردوا تدلكي بيه جسمك كله قبل الحمام ده بيساعد على تنشيط الدورة الدموية وهيخلي جلدك صحي ومنور ده غير ان ريحته حلوة يعني هيدي ريحة حلوة لجسمك ومش دهني يعني مش هيخلي جسمك مزيت وكمان مهديء يعني هتحسي انك بقيتي ريلاكس بعد ما تدهنيه.