غلطات كلنا بنعملها فى غسيل الشعر.. احذريهم

آية حسان
آية حسان
في
شعر
13565

الشعر من اهم الحاجات اللى ممكن نكون بنهتم بيها علشان هو جزء اساسى من مظهرنا و جمالنا ، و لانه مفيش بنت فينا مابتهتمش بشعرها و جماله و صحته و على طول بنغسله و بنستخدم الشامبو و البلسم ، حمامات الكريم و الزيت و غيرها ، “بنات حوا”  حبت النهاردة انها تعرفك على الدليل الكامل لغسيل الشعر و الاهتمام بيه . فى المقال ده هنقولك على 9 غلطات كلنا بنعملها فى غسيل الشعر.

9 غلطات في غسيل الشعر يلا نتعرف عليهم:

1- بتجمعي شعرك علي شكل كعكة لفوق وتفضلي تدلكي بايديك؟

كل اعلانات غسيل الشعر تقريبا بتجيب الموديل اللي بتغسل شعرها وهي لمه لفوق وتفضل تدعك فروة الراس, الموضوع ده غلط جدا وكل اللي هيسببه انه هيخلي الشعر يتكلكع ويتعقد في بعضه ويتعبك فين في تسريحه ويسبب تساقطه.. الطريقة الصح إنك تغسليه وهو مفرود وتمشي صوابعك من خلاله.

غسيل الشعر بطريقة صحيحة
غسيل الشعر بطريقة صحيحة

2- بتستني كتير بين مرات غسيل شعرك؟!

فيه نصايح تقولك اغسلي شعرك كل اسبوع مرة أو مرتين وفيه نصايح بتقول للشعر الدهني الغسيل كل يوم.. بس الصح هو إنك تغسلى شعرك كل مرة تحسي انك محتاجة تغسليه علي حسب نوع شعرك ايه وعلي حسب إنتي شايفه انه محتاج غسيل دلوقتي ولا لأ، واحدة من اكبر الغلطات اللى بنعملها اننا بنستنى كتير بين كل غسلة وغسلة أو نحط جدول معين لغسيل الشعر.

3- بتستخدمى الشامبو كل يوم؟

لو هتغسلى شعرك كل يوم خصوصا في فترة الصيف والعرق الكتير، يبقى لازم تجربى ماتستخدميش الشامبو مع كل غسلة لانه الاستخدام المتكرر للشامبو هيخلص فروة راسك من الزيوت الطبيعية اللى بتفرزها علشان ترطب الجذور وده هيخلى شعرك يبقى جاف .

4- بتدلكى فروة راسك؟

تدليك فروة راسك بشكل مستمر كل غسلة ممكن يبقى اجهاد على فروة راسك ، بدل من تدليك راسك كل مرة تغسلى فيها شعرك جربى تمررى صوابعك خلال شعرك، الحركة دى كمان هتحسن من الدورة الدموية لشعرك وهتلاقى التشابك و التقصيف بيقل مرة بعد مرة. بس لو لقيتي إن شعرك بينزل مع الحركة ديه يبقي إنتي شعرك ضعيف وبلاش منها.

5- بتستخدمى المياة السخنة؟ 

محدش فينا ما بيحبش الحمامات السخنة فى الشتاء و بنستمتع بالمياة السخنة ونطول فى الحمام . بس ده من الغلطات اللي ممكن تكون بتأثر علي الشعر حتى لو بتستخدمى المياة السخنة أثناء غسيل الشعر وده مطلوب بس متكونش سخنة اوي يفضل تكون دافية عشان تفتح المسام وتطلع كل الزيوت وتنضف الشعر كويس وممكن وقت الشطف ماتستخدميهاش لانها هتسبب التهابات و جفاف لفروة راسك وكمان المية السخنة بتسبب تجعد الشعر ممكن تستعملي المية الساقعة بدالها للشطف لانها هتقفل المسام وكمان ليها تأثير قوي إنها تلمع الشعر وتفرده.

تجنبي المية السخنة في غسيل الشعر
تجنبي المية السخنة في غسيل الشعر

6- بتستخدمى انواع شامبو كتير : 

فيه ناس بتقول إنك لما تجربى انواع شامبو كتيرة ده مفيد للشعر ومطلوب بس الصح إنك لما تلاقي نوع شامبو معين شعرك بيبقي حلو معاه يبقي هو ده الاختيار الامثل ليكي وكملي عليه عشان هيفيد شعرك اكتر .

7- بتسخدمى كمية كبيرة من الشامبو ؟

استخدام كمية كبيرة من الشامبو كل غسلة مش هيخلى شعرك ينضف احسن ، بالعكس ده هيجهد شعرك بشكل كبير و هيزيل كل الزيوت الطبيعية اللى بتفرزها فروة راسك و ده ممكن يسببلك جفاف فروة الراس و كمان القشرة . استخدمى كمية قليلة مناسبة لحجم و طول شعرك و اكتفى بانك تستخدمى الشامبو مرة واحدة بس لكل غسلة ، يعنى متغسليش شعرك بالشامبو مرتين فى حمام واحد .

8- تنشيف الشعر بالفوطة: 

شعرك و هو مبلول بيبقى جاف و حساس جدا ، علشان كده تنشيف الشعر بالفوطة الناشفة إنك تدعكيها في شعرك وفروة راسك هيخلى شعرك يقصف و يتكسر ، جففى شعرك بانك بتمشى الفوطة بلطف على شعرك من الاطراف للجذور .

تجفيف الشعر
تجفيف الشعر

9- بتستخدمى الشامبو على شعرك كله؟ 

من اكتر الغلطات المنتشرة اللى بنعملها هى اننا بنستدم الشامبو على مساحة شعرنا كلها و بعدين نشطف و نستخدم البلسم بنفس الطريقة . الصح هو اننا نستخدم الشامبو على الجذور بس و البلسم على الاطراف. لان فروة الراس بتنتج زيوت طبيعية بشكل يومي ومش محتاج يتحط عليها اي مرطبات الطريقة الصح للبلسم انه يتحط من تحت الجذور على 3/4 الشعر من تحت بس لحد الاطراف ونركز على الاطراف كويس ونبعد عن الجذور خالص. .الاطراف بتحتاج للبلسم أكتر لأنها بتبقي هي الجزء المعرض للتلف و الجفاف من الشعر ، بس وضع البلسم علي الجذور ممكن يسد المسام و يبطئ عملية نمو الشعر.

اماكن-وضع-الشامبو-والبلسم
اماكن-وضع-الشامبو-والبلسم

مقالات متعلقه

مكونات طبيعية اساسية ومتعددة الاستخدامات للبشرة والشعر

مكونات طبيعية اساسية ومتعددة الاستخدامات للبشرة والشعر

افضل زيوت للشعر الخفيف هتساعدك على تكثيفه

افضل زيوت للشعر الخفيف هتساعدك على تكثيفه

كل اللي محتاجة تعرفيه عن علاج الشعر بالسيليكون

كل اللي محتاجة تعرفيه عن علاج الشعر بالسيليكون