اتعرفي معانا على طرق صبغ الشعر الاسود

بقلمريهام محمود فيشعر visibility1

كلنا عارفين ان الشعر الاسود من اصعب الوان الشعر اللي ممكن نغير لونه غير الوان الشعر الفاتحة اللي بتبقى اسهل انها تلقط لون الصبغة بسهولة, وبنفضل نصبغ شعرنا اكتر من مره عشان نغير لونه وبنهلك شعرنا وفي الاخر بردوا مش بيتغير لونه ,والشعر الاسود بردوا فيه درجات وكل ما يكون الشعر اسود غامق اوي بيكون اصعب في الصبغة وكل ما كان افتح بيون صبغة اسهل, عشان كده احنا جيبنا لكل بنات حوا النهاردة طرق صبغ الشعر الاسود وازاي نخلي الصبغة تدينا اللون اللي احنا عايزينه.

طرق صبغ الشعر الاسود
طرق صبغ الشعر الاسود

تعالوا نتعرف مع بعض على طرق صبغ الشعر الاسود:

لو الشعر اسود اوي اللي هو اغمق درجة يبقى لازم نضاعف كمية الاكسجين عن كمية الصبغة يعني مثلا لو كمية الصبغة 100 مل يبقي تحطي كمية الاكسجين 200 ملل بنسبة 30%.

عشان تصبغي الشعر الاسود للون البني:

– في طريقتين اول طريقة انك تستخدمي لون صبغة افتح بدرجتين من اللون اللي انتي عايزاه ونضاعف كمية الاكسجين زي ما قولنا ونضيف مع الاكسجين معلقة كبيرة بودرة زرقا “بودرة التفتيح”.

– والطريقة التانية هي سحب لون شعرك الاصلي الاول بانك تستخدمي بودرة التفتيح وتضيفي عليها كمية من الاكسجين بنسبة 30% وتحطيهم على الشعر وتسيبهم لمدة عشر دقايق وبعدين تغسلي شعرك كويس وتسيبيه لما ينشف وبعدها تعملي لون الصبغة اللي انتي مختاراه على شعرك بالطريقة العادية وبردوا تحطي مع الصبغة اكسجين ضعف كمية الصبغة.

صبغ الشعر الاسود للون اشقر غامق او متوسط:

نختار لون الصبغة افتح من اللون اللي انتي عايزاه بدرجتين ونضيف كمية اكسجين ضعف كمية الصبغة مع معلقة بودرة تفتيح.

صبغ الشعر الاسود للون اشقر فاتح اوي او دهبي:

هنشقر الشعر الاول بالاكسجين وبودرة التفتيح ونسيبها عشر دقايق وبعدها نغسله كويس ونسيب الشعر لحد ما ينشف, وبعدين هنحط على الشعر لون الصبغة اللي احنا اخترناه بعد ما نضيف عليها كمية اكسجين ضعف كمية الصبغة.

صبغ الشعر للون احمر ناري:

بردوا هنشقر الشعر الاول بنفس طريقة الالوان اللي فاتت وبعد كده هنغسله كويس من بودرة التفتيح, ونسيبه لما ينشف وبعدين هنخلط الصبغة مع ضعف الكمية من الاكسجين بنسبة 30% ونضيف عليهم معلقة كبيرة بودرة زرقا ومعلقة كبيرة بودرة حمرا ونصبغ الشعر.

صبغ الشعر للون احمر غامق “الباذنجاني”:

بعد ما نشقر الشعر نختار لون صبغة افتح بدرجتين من اللون اللي احنا عايزينه ونضيف كمية اكسجين ضعف كمية الصبغة بنسبة 30% ونضيف عليها معلقة كبيرة بودرة حمرا.

عشان نثبت لون الصبغة على الشعر بعد ما نغسل الشعر من الصبغة نشطفه بكوبايه خل ابيض وبعدين نغسله بالشامبو والبلسم, ولو عايزين اللون يقعد معانا اطول فترة ممكنة ممكن نغسل الشعر كل اسبوع بالبودرة الزرقا للشعر المصبوغ اشقر وبني وبالبودرة الحمرا للشعر المصبوغ احمر فاتح او غامق.

– في طرق طبيعية لتفتيح الشعر قبل الصبغة عشان يجيب اللون اللي احنا عايزينه ويبقى اسهل في الصبغة:

الطرق دي بتعتمد على تفتيح الشعر قبل الصبغة بفترة عشان يكون اسهل في الصبغة وياخد اللون اسرع ودي طرق طبيعية غير اللي احنا قولناها فوق بتعتمد كلها على البودرة الزرقا “بودرة التفتيح”.

1- الطريقة الاولى:

هنعمل خليط من الحنة مع اعشاب البابونج “من عند العطار” ونعجنهم بمية مغلية لحد ما تبقى عندنا عجينة قوامها معقول ونحط الخليط ده على الشعر كله من الجذور لحد الاطراف ونغطيه ونسيبه على شعرنا من نص ساعة لساعتين على حسب درجة غمقان شعرك وبعدين نغسله بالشامبو.

2- الطريقة التانية:

اغلي شوية من عشبة الراوند المفروم “من عند العطار” في اربع اضعاف الكمية مية وسيبيه يبرد وبعدين اشطفي بيه شعرك.

3- الطريقة التالتة:

الطريقة دي سهلة جدا هي انك تجيبي عصير الليمون وتحطية في ازازة ببخاخ وترشي على شعرك منه وتقعدي بيه في الشمس, وتكرريها اكتر من مره خلال اليوم, الطريقة دي مع الاستمرار عليها بتفتح الشعر بشكل طبيعي.

– في كمان دلوقتي في كل ماركات الصبغة تقريبا صبغات مخصوص للشعر الاسود, وفي شامبوهات تفتيح واسبراي لتفتيح الشعر موجودة في محلات مستحضرات التجميل معمولة مخصوص للي شعرهم غامق اوي وبتكون الصبغة فيه صعبة.

احنا تقريبا قولنا لكم كل طرق تفتيح الشعر الاسود سواء الكيميائية او الطبيعية وطبعا الطرق الطبيعية افيد للشعر عشان الطرق الكيميائية بتتلف الشعر وبتجهده بس احنا قولنا لكم الطرق كلها وكل واحدة تختار اللي يناسبها.

 بس نصيحتنا الاخيرة سواء فتحتي شعرك بشكل كيميائي او طبيعي بعد الصبغة لازم تهتمي بشعرك وتعملي له دايما حمامات كريم وترطبيه لان الصبغة طبيعي بتنشف الشعر وبتجهده فلازم نهتم بيه جدا بعد الصبغة سواء بالحاجات والوصفات الطبيعية او بمنتجات الشعر الخاصة بالشعر المصبوغ.

أعرفوا معانا كمان  طريقة صبغ الشعر في البيت بالخطوات.