ادوات الحمام المغربي .. وازاي نعمله في البيت ؟

بقلمريهام محمود فيبشرة visibility14333

الحمام المغربي من الحاجات القديمة جدا اللي كانت من ايام جداتنا وكان بيتعمل في الحمامات الشعبية لانه كان هو يعتبر بديل ال Spa اللي موجود دلوقتي لكن حاليا رجع الحمام المغربي تاني وبيتعمل في ال Spa وده لان ليه فوايد كتير جدا للبشرة والجسم, ولفوايده دي بقى دلوقتي من الحاجات الاساسية لكل عروسة قبل ليلة الفرح, بس المشكلة ان في بنات كتير مش بيحبوا فكرة انهم يعملوا الحمام المغربي بره البيت ده غير انه بيكون غالي جدا في مراكز التجميل, عشان كده احنا جيبنا لكل بنات حوا طريقة الحمام المغربي في البيت والنتيجة هتبقى زي مراكز التجميل بالظبط.

تعالوا نتعرف الاول على فوايد الحمام المغربي:

1- بيخلص البشرة والجسم من الجلد الميت وبيخلي البشرة طرية وناعمة.

2- بيوحد لون البشرة وبيفتح الاماكن الغامقة في الجسم.

3- الاستمرار على الحمام المغربي بيأخر ظهور التجاعيد في البشرة.

4- بيزيل الارهاق والاجهاد من الجسم وده لانه بينشط الدورة الدموية.

5- غير بقى كل الفوايد دي كمان بيساعد على انقاص الوزن لانه عملية التدليك وفتح المسام اللي بتحصل اثناء الحمام بتخلص الجسم من المية الزيادة ومن السموم اللي بتخلي المية والدهون تتراكم تحت البشرة.

المكونات والادوات اللي محتاجينها عشان نعمل الحمام المغربي في البيت:

1- الصابون المغربي.

2- الطين المغربي او الحنة البيضا.

3- مية الورد.

4- الليفة المغربية الخشنة.

5- الحجر الخفاف.

كل المكونات دي هتلاقوها عند اي عطار.

ادوات الحمام المغربي
ادوات الحمام المغربي

نيجي دلوقتي لطريقة عمل الحمام المغربي:

1- اول حاجة قبل ما تبدأي تكوني قافلة شباك الحمام كويس عشان نحبس البخار جوه الحمام ومسام الجسم تتفتح ويجيب النتيجة المطلوبة.

 2- املي البانيو بمية سخنة بالدرجة اللي جسمك يتحملها والحمام كله يتملي بخار واقعدي فيها لمدة متقلش عن عشر دقايق عشان تفتحي مسام الجسم كويس.

3- ادهني جسمك ووشك كله بالصابون المغربي وسيبيه على البشرة لمدة ربع ساعة, وبعدين اغسلي جسمك كويس بالمية السخنة لحد ما تشيلي اي اثار صابون.

4- دلوقتي هنفرك الجسم بالليفة المغربية الخشنة كويس بحركات دائرية من تحت لفوق عشان ننشط الدورة الدموية ونشيل الجلد الميت ونقشر البشرة وننضفها, وانتي بتفركي الجسم ركزي على المناطق الغامقة في الجسم والمناطق الخشنة زي الكوعين والركبتين, وبالنسبة للوش ممكن نفركه بسفنجة ناعمة بحركات دائرية بالراحة جدا من غير فرك قوي او ضغط على البشرة متفركيش الوش ابدا بالليفة الخشنة لان ده هيضر البشرة خلي الليفة الخشنة للجسم بس.

5- بعد عملية التنضيف والتقشير دي هنعمل ماسك للجسم كله من الطين المغربي او الحنة البيضا باننا هنخلط الطين او الحنة “اللي متوفر عندك” مع مية الورد وندهن بيه الجسم كله ونسيبه لحد ما ينشف وبعد كده نفركه كويس من على جسمنا ونغسله بالمية السخنة, وانتي مستنية الماسك ينشف على جسمك ممكن تستغلي الوقت ده بانك تفركي كعوب رجلك بالحجر الخفاف عشان نتخلص من الخشونة ومن كل الجلد الميت.

6- اخر خطوة هنقفل مسام البشرة باننا هنغسل جسمنا بمية باردة, وممكن في الاخر بعد ما ننشف جسمنا ندهنة بقطنة فيها مية ورد عشان مية الورد بتساعد على قفل مسام البشرة وكمان هتدي انتعاش وريحة حلوة لجسمنا.

والحمام المغربي ممكن في البداية يتكرر كل اسبوع لمدة شهرين وبعد كده ممكن تعمليه كل اسبوعين او كل شهر مره.