فوايد انواع المكسرات مكنتيش تعرفيها قبل كده !
طبعا مافيش حد مننا مش بيحب المكسرات بكل انواعها لكن معظمنا بياكلها لان طعمها حلو ولذيذة وبناكلها كتسالي بس لكن هي ليها فوايد صحية كتير جدا لانها غنية بالفيتامينات والمعادن والكالسيوم وبتوفر البروتين للجسم, احنا النهاردة هنقولكم على فوايد انواع المكسرات كلها للجسم, ولكل البنات اللي هيخافوا ياكلوا المكسرات عشان زيادة الوزن هنقولكم كمان على الكمية اللي المفروض ناكلها من كل نوع عشان نحافظ على وزننا.
تعالوا نعرف مع بعض فوايد انواع المكسرات:
1- اللوز:
لو انتي مش بتحبي اللبن او منتجات اللبن احسن بديل ليكي هو اللوز لانه غني جدا بالكالسيوم وطبعا ده مهم لبناء العظام والحماية من هشاشة العظام, ده غير ان فيه نسبة عالية جدا من فيتامين E , وعناصر غذائية بتساعد على تحسين البشرة وبتخليها صحية ومافيهاش اي شوائب, واللوز بيحتوي على مادة فلافونيدات المفيدة جدا للقلب وبتحمي من امراض القلب, اللوز ممكن ناكل منه يوميا 20 حبة لوز.
2- البندق:
البندق من المسكرات المفيدة جدا للقلب وفي الحماية من مرض الشلل الرعاش لانه بيحتوي على نسبة عالية من حمض الفوليك وده الحمض المسئول عن ظبط مستوى الاحماض الامينية في الجسم وبيحافظ على مستواها معتدل ويخليها مترتفعش في الجسم لان الاحماض الامينية لو ارتفعت بتسبب امراض القلب والشلل الرعاش وبالتالي لما يحافظ عليها معتدلة في الجسم هيحميكي من الامراض دي, ناكل منه يوميا 20 حبة بندق.
3- الكاجو:
الكاجو بيحتوي على نسبة عالية جدا من البروتين, والمعادن زي الزنك والحديد, ولو انتي بتعملي رجيم ومتبعة نظام غذائي نباتي يبقى احسن اختيار ليكي عشان تدخليه في نظامك الغذائي, كمان غني بالمغنسيوم المعدني وده مفيد جدا في تحسين الذاكرة وتأخير فقدان الذاكرة اللي بيجي مع التقدم في العمر, ممكن ناكله كده زي ما هو او نحطه على الاكلات بتاعتنا, ناكل منه يوميا 15 حبة كاجو.
4- الفسدق:
الفسدق غني جدا بفيتامين B6 وده مهم جدا لانه بيحافظ على توازن هرمونات الجسم بشكل صحي, ومفيد جدا للبنات اللي عندهم مشاكل في عدم انتظام الدورة الشهرية, والفسدق هو نوع المكسرات الوحيد اللي في مستويات معقولة من اللوتين و الزياكسانثين ودول اتنين من اهم مضادات الاكسدة اللي بتحمي العين, وبيحتوي كمان على البوتاسيوم والالياف, ممكن ناكل منه يوميا لحد 30 حبة.
5- عين الجمل:
عين الجمل غني جدا بمضادات الاكسدة اللي بتحمي الجسم من السرطان, ده غير مصدر جيد جدا للعناصر الاحادية غير المشبعة, والدهون المفيدة او الصديقة للقلب, والدراسات اثبتت ان عين الجمل بيساعد على خفض نسبة الكوليسترول السيء في الجسم, وغني جدا باحماض اوميجا 3 ويعتبر هو انسب بديل للاسماك اللي فيها اوميجا 3 زي السلمون والتونة للي مش بيحب السمك ممكن يستبدله بعين الجمل, ممكن ناكل منه يوميا 20 حبة.
6- المكسرات البرازيلي:
للي عندهم مشكلة الغدة الدرقية بتفرز بنسبة قليلة وكلنا عارفين ان الغدة لما بتفرز بنسبة قليلة ده بيسبب زيادة الوزن وبيعمل مشاكل كتير في الجسم عشان نتفادى مشاكل الغدة الدرقية ناكل المكسرات البرازيلي لانها بتحتوي على السيلينيوم وده العنصر المسئول عن تنشيط عمل الغدة الدرقية, ده غير ان عنصر السيلينيوم بيرفع مناعة الجسم وبيساعد على شفاء الجروح بسرعة, وعشان تخلي جسمك يستفاد من ده كله مش محتاجة اكتر من 3 او 4 وحدات مكسرات برازيلي بس في اليوم, وممكن ناكل منها في اليوم لحد 10 حبات.
7- ابو فروة او الكستناء:
غني جدا بالكربوهيدرات النشوية والالياف, وبيحتوي على نسبة كبيرة من فيتامين C , وفيه نسبة من البروتين ولكن اقل من اللي موجودة في انواع المكسرات التانية, وبيحتوي على فيتامين B و B6 , وخالي خالص من الدهون والسعرات الحرارية يعني تاكليه وانتي مطمنة انه مش هيزود وزنك, وممكن تاكليه بالطريقة العادية مشوي او ممكن يطحن ويبقى زي الدقيق يتعمل منه كيك.
وعشان تعمليه دقيق تشويه على 180 درجة في الفرن لمدة نص ساعة وبعدين تقشرية وتحطيه تاني في الفرن على نار هادية جدا لحد ما ينشف وبعدين تطحنية في الخلاط وتنخليه عشان تتخلصي من اي كتل مش مطحونة ويبقى عندك ناعم خالص زي الدقيق بالظبط وتستخدمية عادي بدل الدقيق عشان تعملي كيك.
8- مكاداميا:
المكاداميا بالرغم ان فيها نسبة عالية من الدهون ولكن فيها نسبة من العناصرالاحادية الغير المشبعة الصحية, وغنية جدا بالالياف, والمعادن زي المغنسيوم والكالسيوم والبوتاسيوم, وممكن تتاكل كده زي ما هي وناكل منها يوميا لحد 15 حبة او تتضاف للاكل الحلو والحادق.
9- الجوز الامريكي:
الجوز الامريكي يعتبر صديق القلب لانه مفيد جدا للقلب لانه بيحتوي على عناصر فعالة في خفض نسبة الكوليسترول في الدم, وكمان غني بالمواد المضادة للاكسدة اللي بيحمي القلب من تصلب الشرايين, وغني جدا بحمض الاوليك والدهون الصحية زي اللي موجودة في الافوكادو والزيتون, وفيه نسبة عالية من فيتامين B3 وده بيدي طاقة هايلة للجسم, ناكل منه يوميا 15 حبة.
10- السوداني:
السوداني هو مصنف من البقوليات لكن فيه نفس الفوايد الصحية والغذائية اللي موجودة في المكسرات, فيه نسبة عالية من حمض الفوليك, والالياف, والمعادن زي المغنسيوم والفسفور والبوتاسيوم, ناكل منه يوميا 30 حبة سوداني.
كده تقريبا نبقى عرفنا من الكمية لكل نوع ايه الانواع الاعلى في نسبة الدهون وايه الانواع الاقل.
المكسرات اللي بتحتوي على نسبة عالية من الدهون هي الكاجو, والمكسرات البرازيلي, والمكاداميا يعني نلتزم بالكميات اللي احنا قولناها لكل نوع او مناكلش منها على طول يعني على فترات.
المكسرات اللي بتحتوي على نسبة متوسطة من الدهون هي عين الجمل, والجوز الامريكي, والفسدق.
المكسرات اللي بتحتوي على نسبة منخفضة جدا من الدهون هي البندق, واللوز, وابو فروة, دول تقدروا تاكلوا منهم براحتكم في اي وقت.