اسباب اسمرار حول الفم ووصفات طبيعية لعلاجه
من اكتر المشاكل المزعجة اللي بتضايق كتير مننا هي مشكلة اسمرار حول الفم في كتير بيعانوا منها وبتبقى مسببة لنا ازمة لان بيكون شكلها مش حلو وبتشوه شكل الوش خصوصا انها في منطقة مهمة وملفتة, احنا النهاردة هنقولكم على اسباب اسمرار في منطقة حوالين الفم لان معرفة الاسباب هي اول خطوة في علاج المشكلة, وجيبنا لكل بنات حوا الحلوين وصفات طبيعية للتخلص نهائيا من السمار حوالين الفم.
تعالوا نعرف الاول ايه هي اسباب اسمرار حول الفم ؟
1- ممكن يكون سبب السمار ده التهاب المنطقة دي وفي الحالة دي لازم نعالج الالتهاب الاول عند دكتور متخصص, وبعدين نستخدم الوصفات الطبيعية عشان نعالج السمار اللي ناتج عن الالتهاب.
2- من اسباب السمار كمان هو قلة ترطيب المنطقة دي وده بيخليها تنشف وبيسبب السمار, لان منطقة حوالين الفم بتتعرض للمية كتير طول اليوم يعني بعد ما بناكل او بنشرب حاجة طول اليوم بنغسل بعدها المنطقة دي وده بيخليها تنشف عن باقي البشرة عشان كده لازم نرطبها بعد كل مره نعرضها للمية بكريم مرطب.
3- ممكن تكون بسبب مرض جلدي زي الاكزيما وفي الحالة دي محتاجة دكتور جلدية عشان تعالجي المشكلة الاول قبل اي حاجة.
4- من اسبابها كمان التعرض للشمس لفترات طويلة, عشان كده لازم قبل ما نخرج من البيت نحط واقي من الشمس عشان نحمي بشرتنا من الاسمرار وبقع الشمس.
5- وممكن يكون السبب داخلي يعني تكون بسبب نقص فيتامينات في الجسم لان كلنا عارفين ان المشكلة وعلاجها كمان بيبدأ من جوه قبل بره عشان كده لازم تتأكدي ان جسمك بياخد كل الفيتامينات المهمة اللي لزماه, وكتري من اكل الفاكهة والخضروات الطازة.
6- معظمنا عندنا عادة بنحط ايدنا حوالين منطقة الفم او على وشنا وده غلط لان ده بينقل البكتيريا للمنطقة دي وبالتالي بيخليها تسمر.
7- استخدام مكياج رخيص او مش معروف مصدره من الحاجات المضره جدا ببشرتنا ومن اسباب السمار حوالين الفم عشان كده لازم نستخدم ماركات كويسة ومعروفة عشان نحافظ على بشرتنا.
8- معجون الاسنان من الحاجات اللي ممكن تسبب اسباب حوالين الفم لان فيه مادة الفلورايد اللي بيسبب غمقان منطقة حوالين الفم عشان كده بعد ما نغسل سنانا نغسل حوالين الفم كويس من اثار المعجون, وكمان الصابون لما نغسل المنطقة دي بعد الاكل نغسلها كويس من اثار الصابون.
9- تراكم الجلد الميت على البشرة ممكن يسبب اسمرار المنطقة دي عشان كده لازم نهتم بتقشير بشرتنا مره في الاسبوع عشان نتخلص من الجلد الميت, ونشرب كمية كافية من المية خلال اليوم.
10- بعض انواع الفاكهة زي البرتقان واليوسفي واحنا بناكلها ممكن تنزل عصير على منطقة حوالين الفم واكل الموالح من الحاجات اللي ممكن تسبب اسمرار حوالين الفم فلازم ناخد بالنا واحنا بناكل الحاجات دي, وكمان لو شربنا مشروبات غازية وعصاير من غير ما نغسل الفم اللي بيحصل ان بقايا السوايل دي بتتراكم عند منطقة حوالين الفم وبتسبب السواد فلازم تكوني حريصة بعد ما تشربي او تاكلي اي حاجة تغسلي منطقة حوالين الفم كويس وترطبيها بعد الغسيل زي ما قولنا.
بعد ما عرفنا كل الاسباب تعالوا نشوف مع بعض وصفات طبيعية هتخلصك من اسمرار حول الفم:
1- الوصفة الاولى:
اخلطي معلقة عسل نحل مع معلقة زبادي وادهني بيها منطقة حوالين الفم وسيبيها لمدة ربع ساعة وبعدها اغسليها بمية دافية ونشفيها كويس ورطبيها بكريم مرطب.
2- الوصفة التانية:
اخلطي معلقة كبيرة نشا مع معلقة كبيرة مية ورد او مية عادية بس تكون مغلية سيبيها تبرد او تبقى بس يادوب دافية وبعدين اخلطيها مع النشا وقلبيهم لحد ما تدوبي النشا في المية كويس ويبقى الخليط عندك قوامة معقول ادهني بيه حوالين الفم وسيبيه لمدة نص ساعة وبعدين اغسليه بمية دافية, لو كررتي الوصفة دي يوميا هتحسي بالفرق وهتلاقي المنطقة افتحت كتير واستمري عليها لحد ما تتخلصي من السمار خالص.
3- الوصفة التالتة:
اخلطي معلقة فازلين مع معلقة عصير ليمون ومعاهم معلقة عسل نحل وقلبيهم كويس مع بعض وادهني بيهم حوالين الفم وسيبي الخليط ربع ساعة وبعدين اغسليه بمية دافية, الخلطة دي من الخلطات الفعالة جدا في علاج اسمرار حول الفم وهتلاحظي النتايج بعد فترة قصيرة من استخدامها.
4- الوصفة الرابعة:
اخلطي عصير نص ليمونة مع معلقة جلسرين وادهني بيهم حوالين الفم كل يوم قبل ما تنامي وسيبيه لحد الصبح, ولو بشرتك حساسة من الليمون ممكن تضيفي على الخلطة معلقة مية ورد.
5- الوصفة الخامسة:
جيبي قشر البرتقان ونشفيه واطحنية وخدي منه معلقة وضيفي عليه معلقة شوفان مطحون ومعلقة عصير ليمون اخلطيهم كويس مع بعض وادهني بيهم حوالين الفم وسيبيه عشر دقايق وبعدين اغسليه بمية دافية.
6- الوصفة السادسة:
اخلطي معلقة عسل نحل مع معلقة نشا ومعاهم معلقة لبن وضيفي عليهم كام نقطة عصير ليمون وقلبي الخليط وكويس وادهني بيه حوالين الفم وسيبيه ربع ساعة وبعدين اغسليه بمية دافية.
7- الوصفة السابعة:
افركي منطقة حوالين الفم بشريحة بطاطس او ادهنيها بعصير البطاطس, استمري على الوصفة دي يوميا هتلاحظي النتايج بعد فترة قصيرة جدا.
8- الوصفة التامنة:
اخلطي معلقتين شوفان مطحون مع معلقتين عصير طماطم ومعلقة لبن اخلطي المكونات كويس وادهني بيهم حوالين الفم وسيبي الخليط ربع ساعة وبعدين اغسليه بمية باردة.
9- الوصفة التاسعة:
ادهني منطقة حوالين الفم يوميا بزيت اللوز الحلو وسيبيه لمدة عشر دقايق وبعدين اغسليه بمية باردة.
10- الوصفة العاشرة:
اخلطي نص معلقة نشا مع نص معلقة دقيق وشوية عصير ليمون ومية ورد “لو بشرتك حساسة ممكن تستغني عن الليمون”, اخلطي المكونات مع بعض لحد ما تكون عندك عجينة قوامها متوسط تقدري تفرديها على بشرتك بسهولة, حطي الخليط حوالين الفم وسيبيه نص ساعة لحد ما ينشف وبعدين شيليه عن طريق الفرك وبعدين هاتي قطنة وادهني المنطقة بمية الورد.
شوفوا معانا كمان 11 وصفة لعلاج اثار الخدوش والجروح والحروق وندبات حب الشباب و وصفات لتبييض وتنعيم الجسم.
