نصايح مكياج للعيون الصغيرة عشان تبان اكبر واوسع
كتير من البنات عندهم مشكلة العيون الصغيرة ومش بيعرفوا ازاي يبينوها اكبر او اوسع لكن دلوقتي مع المكياج مافيش حاجة صعبة وكل حاجة ليها حل, احنا النهاردة جيبنالكم نصايح وحيل مكياج للعيون الصغيرة لو عملتيها هتبين عيونك اوسع واكبر.
تعالوا نتعرف سواء على حيل ونصايح مكياج للعيون الصغيرة عشان تبان اكبر واوسع:
1- رسمة الحواجب:
اول حاجة لازم نهتم بيها هي رسمة الحواجب لان الحواجب مكملة لشكل الوش وبتبرز جمال العيون جدا ولما تكون رسمة الحاجب صح بترسم شكل العين وتظهرها, لازم نساوي الحواجب بشكل مستمر ومنهملهاش, ودايما في رسمة الحاجب خلي في مسافة مناسبة بين الحاجب والعيون عشان ده بيدي العيون حجم اكبر واوسع, وعشان تطلع الحواجب بتاعتك بلوك مثالي سرحيهم بفرشة ماسكارا نضيفة.
2- الايشادو:
من الحاجات اللي بتأثر على شكل العيون هي رسمة الايشادو لازم نهتم بيها جدا, ولو انتي جفونك جافة حطي عليهم قبل الايشادو كونسيلر عشان ترطبيهم قبل وضع الايشادو بتاعك, ولو جفونك مش محتاجة الكونسيلر اكتفي بس بالايشادو.
3- اخفاء الهالات السودا:
اخفاء الهالات السودا هي مش هتبين العيون اكبر لكن على الاقل اخفاءهم هيدي شكل مثالي للعين, حطي الكونسيلر تحت العيون عشان تخفي الهالات, كونسيلر لونه روز او بينك أو خوخي برتقالي وتأكدي انه هيخفي الهالات لان في بنات كتير بيقعوا في غلطة بيختاروا لون كونسيلر فاتح وبيفتكروا ان كل ما كان اللون افتح كل ما دارى الهالات لكن ده غلط جدا لو انتي بشرتك بيضا او فاتحة انسب لون كونسيلر عشان الهالات هو الخوخي المتوسط, ولو بشرتك متوسطة او سمرا يبقى انسب لون كونسيلر هو الخوخي الغامق او اللون البرتقاني, ولما نيجي نحط الكونسيلر نحط طبقة خفيفة منكترش عشان ميتكتلش تحت العين ويعمل خطوط.
4- استخدمي ايشادو فاتح وقلم ابيض:
عشان تبيني عيونك اكبر واوسع استخدمي ايشادو ابيض على الجفون, وممكن تستخدمي قلم العين الابيض على الزاية الداخلية للعين, وبالنسبة للون الايشادو مش مهم يكون بيلمع او مات المهم يكون لون قاعدة الايشادو فاتحة عشان تدي وسع للعين وممكن نحط اللون الغامق عند الزاوية الخارجية للعين حطيه على شكل حرف V وامزجيه كويس على العين ده هيخلي عينيكي تبان اكبر واوسع.
شوفى الفرق فى الصورة بين مكياج العين بالكحل الابيض و الاسود, مين عاجبك اكتر؟؟؟ جربى و قوليلنا رأيك
لأصحاب العيون الضيقة اوالصغيرة او العميقة ازاى ممكن توسعى عينيكى؟؟
5- رسمة الايلاينر:
ارسمي الايلاينر عند خط الرموش اللي فوق ويكون خط رفيع جدا وابدأي تخنيه شوية شوية وانتي طالعة بالرسمة للزاوية الخارجية للعين, واستخدمي في رسمة الايلاينر فرشة صغيرة عشان تقدري تتحكمي في الرسمة بتاعتك وتطلع مظبوطة.
6- عدم المبالغة في الايلاينر:
اتجنبي رسم الايلاينر على خط الرموش وعند الزاوية الداخلية للرموش اللي تحت خليه بعيد عند خط الرموش شوية ومتمديش الخط لاخر الزاوية الداخلية ارسميه من اول الزاوية الخارجية للعين لحد تلتين العين بس.
7- استخدمي اداة تني الرموش Eyelash Curler :
استخدمي اداة تني الرموش “Eyelash Curler” عشان تدي رموشك حجم اكبر واطول ابدأي من الجذور لحد نهاية الرموش ده هيدي وسع للعين.
8- استخدمي قلم العيون النيود:
احنا قولنا ان قلم العين الابيض بيدي وسع للعين, بس الانسب للبشرة السمرا هو قلم العين النيود او البيج ده بيطلع حلو جدا على البشرة السمرا وهيطلع شكله طبيعي اكتر على العين من القلم الابيض, ارسميه جوه العين على خط الرموش اللي تحت.
9- الماسكارا:
اهتمي بالماسكارا لانها تعتبر العصا السحرية للعين بتدي العين حجم اكبر واوسع, استخدمي الماسكارا اللي بتكثف وتطول الرموش وركزي على الرموش في الزاوية الخارجية للعين حطي عليها من 3 ل 4 طبقات ماسكارا ده بيحدد شكل العين اوي وبيوسعها.
10- كونتور الجفون:
اعملي كونتور لجفون العين ده مهم جدا لانه بيحدد شكل العين, استخدمي ايشادو لون بني متوسط او اي لون ايشادو يكون اغمق بدرجة او اتنين من لون بشرتك الطبيعية عند تنية الجفون.
11- الاهتمام بصحة العين:
اخر حاجة هنقولها لكل بنات حوا عشان تتمتعوا بعيون مثالية انكم تهتموا بصحة العين وتعالجوا اي انتفاخات حوالين العين لان الانتفاخات هتبين العيون اصغر واضيق وعشان تحافظي على شكل عينيكي صحية.
– نامي ساعات كافية.
– اغسلي وشك دايما بمية باردة.
– استخدمي اكياس الشاي البارد على العين عشان تعالجي اي انتفاخات.
– قللي من الملح في الاكل لان الملح الكتير بيحبس المية في البشرة وبيخليها تنتفخ.
– حاولي تمارسي الرياضة بشكل مستمر لانها ليها تأثير ايجابي على بشرتنا.
