سيروم القهوة للعين لعلاج الهالات السودا والانتفاخات

بقلمريهام محمود فيبشرة visibility13028

كتير مننا بيعاني من الهالات السودا وانتفاخات تحت العين وده بيكون سبب قلة النوم أو الاجهاد وبتكون النتيجة انه بتظهر الهالات السودا والانتفاخات, وساعات بيكون سببه وراثي يعني مالوش علاقة بقلة النوم ولا الاجهاد, واحيانا في مننا بيكون الجلد اللي تحت العين رقيق اوي وده بيخلي المنطقة دي بيبقى سهل انها تتأثر باي حاجة لانها بتبقى حساسة جدا وبالتالي بيظهر فيها الهالات السودا والانتفاخات اكتر عشان كده في بنات بيبقى عندهم الهالات السودا اكتر من غيرها.

احنا النهاردة جايبنلكم الحل لعلاج الهالات السودا والانتفاخات ايا كان سببها هو سيروم القهوة للعين لان الكافيين اثبت فعاليته في تحسين عمل الدورة الدموية وده بيساعد في علاج الهالات السودا والانتفاخات تحت العين عشان كده سيروم القهوة يعتبر من افضل علاجات الهالات السودا والانتفاخات.

سيروم القهوة للعين لعلاج الهالات السودا والانتفاخات
سيروم القهوة للعين لعلاج الهالات السودا والانتفاخات

تعالوا نعرف مع بعض مكونات وطريقة سيروم القهوة للعين لعلاج الهالات السودا والانتفاخات:

المكونات:

1- نص كوباية بن مطحون.

2- زيت لوز حلو.

3- معلقة كبيرة زيت افوكادو.

4- ازازة عشان نحط فيها السيروم.

5- حتة شاش.

والزيوت هتلاقوها موجودة عند اي عطار, والقهوة نستخدم اللي فيها كافيين لان في قهوة عضوية بتكون خالية من الكافيين دي هتبقى مش فعالة لان الكافيين هو اللي فيه الفايدة كلها.

طريقة التحضير والاستخدام:

هنجيب البن المطحون ونحطة في ازازة ونحط عليه اللوز الحلو كمية كافية لحد ما تغطي القهوة ونقفل الازازة ونحطها في مكان مقفول ونسيبها لمدة من 4 ل 5 ايام, بعدها هنجيب خليط القهوة واللوز نصفيه بالشاشة في طبق عشان يبقى عندنا زيت صافي من غير القهوة وبعدين نضيف عليه معلقة كبيرة زيت افوكادو ونحطه في الازازة ونرج الازازة كويس عشان الخليط يمتزج مع بعضه كويس وفي الاخر نحط حبتين قهوة مش مطحونين ونخليهم في الازازة ودي حيلة كده عشان نحافظ على الكافيين في الخليط ويتجدد باستمرار.

ممكن شوية القهوة والزيت اللي هيفضلوا في الطبق ومش هنعرف نحطهم في الازازة بدل ما نرميهم نفرك بيهم الايد والرجل ونعملهم تدليك كويس ده هيبقى كمقشر للبشرة وبيحسن عمل الدورة الدموية.

نيجي بقى لطريقة استخدام السيروم هندهن بيه تحت العين يوميا هنعمل تدليك بصوابعنا بالراحة لمدة 10 دقايق وبعدين نغسله, و ممكن ندهنه بالليل تحت العين ونسيبه لحد الصبح عشان يكون تأثيره اقوى ويتغلغل في الجلد ويشتغل طول الليل على البشرة “ونستخدم دايما في التدليك الصباع البنصر لان ده اضعف صوباع وهيكون الانسب للمنطقة دي عشان الجلد فيها بيكون حساس ورقيق اوي وبيتأثر بسرعة”.

الخليط ممكن نحتفظ بيه في اي مكان عادي مش هيحصله حاجة وممكن نحطه في التلاجة, بس الافضل يتحط في التلاجة لانه هيكون افيد واكتر تأثير للانتفاخات بالذات لما يتحط بارد على منطقة تحت العين.

سيروم القهوة للعين لعلاج الهالات السودا والانتفاخات
سيروم القهوة للعين لعلاج الهالات السودا والانتفاخات

شوفي كمان ازاي نداري الهالات السودا بالمكياج خطوة بخطوة ؟

اخفاء الهالات السودا بالمكياج
اخفاء الهالات السودا بالمكياج