18 نصيحة للعناية بشعرك اول مره تعرفيهم !

ريهام محمود
ريهام محمود
في
شعر
30642

كلنا تقريبا بنعاني من مشاكل في شعرنا وبنقعد ندور دايما على حلول ليها لكن ساعات احنا بنعمل اخطاء من غير ما ناخد بالنا وبتضر بشعرنا, في حاجات بسيطة جدا لازم نكون عارفنها ولو طبقناها على شعرنا هتفرق معانا كتير جدا, عشان كده احنا جيبنا لكل بنات حوا مجموعة نصايح للشعر اول مره تعرفوها معانا.

ياللا نعرف سوا ايه هي اهم وافضل نصايح للشعر:

1- كلنا تقريبا بنستخدم البلسم او مرطب الشعر زي الشامبو يعني من الجذور للاطراف لكن الطريقة دي غلط البلسم المفروض ميتحطش على الجذور لان فروة الراس بتنتج زيوت طبيعية بشكل يومي ومش محتاج يتحط عليها اي مرطبات الطريقة الصح للبلسم انه يتحط من تحت الجذور على 3/4 الشعر من تحت بس لحد الاطراف ونركز على الاطراف كويس ونبعد عن الجذور خالص.

الاطراف بتحتاج للبلسم أكتر لأنها بتبقي هي الجزء المعرض للتلف و الجفاف من الشعر، بس وضع البلسم علي الجذور ممكن يسد المسام و يبطئ عملية نمو الشعر.

2- كتير مننا عندهم مشكلة البنس مش بتثبت في الشعر وعلى طول بتقع خصوصا للي شعرهم ناعم اوي او خفيف والحل ليها انك ترشي البنس بمثبت الشعر او بالشامبو الجاف وتسيبيهم دقيقتين ينشفوا وبعدين تحطيهم في شعرك هيثبتوا ومش هيقعوا.

عشان تثبتي البنس في شعرك
عشان تثبتي البنس في شعرك

3- معظمنا بينام على مخدات قطن لكن القطن مضر للشعر لانه بيسبب الجفاف للشعر وبيسبب تقصف الاطراف عشان كده استبدلي المخدة القطن بالساتان او الحرير. لانه ثبت فعلا إن الحرير أو الستان أفيد من المخدات القطن و بيفرق في نعومة الشعر بنسبة ٣٠% علي الأقل و بيمنع الشعر من التشابك ، الحرير مش بيمتص ولا بيتفاعل مع دهون الشعر او البشرة الطبيعية التي بيفرزها الجسم على عكس القطن, ده غير انه بيقلل ظهور التجاعيد فى البشرة.

4- كل مره لما تيجي تغسلي شعرك بالشامبو دلكي فروة الراس لمدة دقيقة لانه بيحفز نمو الشعر وبيقوي الجذور, مش بس كده التدليك ده بيحسن المود جدا وبيقلل من التوتر وبيخفف الالم لانه بيزود تدفق الدم لفروة الراس وده بيحسن عمل الدورة الدموية.

5- لو هتسرحي شعرك وهو مبلول يبقى استعملى بمشط تكون سنانة واسعة لانه بيخلصك من تشابك الشعر بسهولة من غير ما يقطع الشعر ويقصفة.

6- ممكن نستبدل البنس العادية بالبنس الحلزونية لتثبيت الشعر خصوصا لو هنعمل تسريحة الكحكة, مع البنس العادية بنحتاج بنس كتير عشان نثبتها خصوصا لو الشعر تقيل, لكن البنس الحلزونية ممكن تستخدمي منهم اتنين بس لتثبيت الكحكة, بس هي مشكلة البنس الحلزونية انها لسه مش منتشرة اوي في مصر بس ممكن تسألوا عليها في المحلات الكبيرة اللي بتبيع اكسسوارات ومستلزمات الشعر.

7- لو عايزة تعملي تسريحة ديل حصان وانتي  شعرك خفيف وعايزة تديها حجم اكبر وتبقى مرفوعة اعملي خدعة بسيطة اوي  بعد ما تلمي شعرك بالتوكة الاستك حطي في نص الشعر توكة مشبك ونزلي عليها باقي الشعر الحيلة دي هتدي حجم اكبر لشعرك وهترفعه.

8- لو انتي شعرك قصير وعايزة تعملي ديل حصان طويل ممكن تعملي خدعة بسيطة انك تقسمي شعرك نصين وبالنص اللي تحت اعملي ديل حصان بارتفاع متوسط والجزء اللي فوق اعملي بيه ديل حصان تاني عالي ونزليه على الجزء اللي تحت الحيلة دي هتدي طول لشعرك بطريقة ذكية ومش باينة.

9- سرحي شعرك قبل ما تغسليه عشان تتخلصي من التشابك ويبقى سهل عليكي غسيله وميتقطعش منك ويقع وانتي بتغسليه.

10- البنس عشان تثبت في الشعر كويس خلي الناحية المموجة هي اللي من تحت والناحية المستقيمة هي اللي ناحية بره, يعني قضينا عمرنا كله  واحنا بنحط البنس غلط :) .

11- كلنا عارفين ان الحرارة العالية والسيشوار هي اكتر حاجة مضرة للشعر عشان نتفادى ده خلي شعرك كيرلي على طبيعته اكتر على قد ما تقدري يعني بالليل قبل ما تنامي حطي باندانا على شعرك ولفي الشعر عليها والصبح هتفكيه هتلاقيه معمول كيرلي طبيعي وشكله حلو جدا من غير سيشوار.

12- لو انتي صبغة شعرك والجذور طلعت بلون شعرك الطبيعي ومعندكيش وقت تروحي صالون التجميل تصبغي الجذور في حيلة ممكن تعمليها عشان تحلي الموضوع ده انك ترشي عليها شامبو جاف وتسرحي شعرك بمشط سنانة رفيعة على شكل زجزاج عشان تداري الجذور.

13- ساعات بيبقى في شعرنا شعر صغير طاير كده خصوصا عند القورة “اسمه البيبي هير Baby Hair” ومش بنعرف نعمل فيه ايه عشان تحلي المشكلة دي هاتي فرشة اسنان تكوني مش بتستخدميها ورشي عليها مثبت شعر ومشيها على الشعر اللي طاير بدل ما ترشي الاسبراي على شعرك كله.

14- كلنا بنصرف على منتجات تصفيف الشعر فلوس كتير لكن مش بنستفاد منها صح وعشان تستفادي منها وتستخدميها بطريقة صحيحة بعد ما تغسلي شعرك وتسرحيه حطي عليه اي منتج تصفيف شعر انتي بتستخدميه وسيبيه على شعرك 10 دقايق عشان يتغلغل جوه الشعر كويس والشعر يستفاد منه قبل ما تستخدمي عليه السيشوار او اي ادوات خاصة بالشعر.

15- عشان تعملي شعرك كيرلي طبيعي بالسيشوار امسكي خصلة الشعر وابرميها وبعدين ركزي عليها السيشوار هتديكي شكل كيرلي طبيعي لشعرك.

16- متستخدميش البيبي ليس على شعر مبلول لانها مضرة للشعر ومع الوقت هتضعفه لازم تستخدميها على شعر ناشف خالص.

17- مشكلة تقصف وانقسام اطراف الشعر كتير مننا بيعاني منها ومن الحلول اللي احنا دايما بنعملها اننا بنقص الاطراف لكن بتكون المشكلة ان الشعر مش بيطول بسرعة, لكن احنا ممكن نحل مشكلة التقصف وتأخر نمو الشعر بماسك طبيعي فعال جدا بمكونات بسيطة موجودة في مطبخنا والماسك عبارة عن صفار بيضة و3 معالق كبيرة زيت زيتون ومعلقة كبيرة عسل نحل اخلطي المكونات كلها مع بعض كويس وحطي الخليط على اطرف الشعر وسيبيه ساعة على الاقل وبعدين اغسليه, وكرري الوصفة كل اسبوعين هتلاقي التقصف راح مع الاستمرار.

18- اخر حاجة هنعرفها مع بعض هي انواع فرش الشعر وايه الفرشة المناسبة لكل شعر:

1- الفرشة المضرب: الفرشة دي انسب فرشة للشعر الطويل والكثيف.

2- المشط اللي اسنانه واسعة: المشط ده مناسب في حالة الشعر المبلول المتشابك لانه بيفك تشابك الشعر بسهولة من غير ما يقطعة ولا يبوظه, وكمان مناسب للشعر المجعد.

3- المشط الرفيع واسنانة ضيقة: ده مناسب لتقسيم الشعر خصل.

4- الفرشة الحرارية: دي الفرشة اللي بتستخدم مع السيشوار لانها بتساعد على تجفيف الشعر بشكل سريع.

5- الفرشة اللي شعرها متفرق: الفرشة دي مفيدة انها بتعمل اعادة توزيع للزيوت على كل الشعر.

6- الفرشة الطويلة الرفيعة: الفرشة دي بتستخدم مع السيشوار  للشعر القصيرعشان بتفرد اقصر شعر بسهولة.

7- الفرشة الكبيرة المستديرة: ده بردوا من انواع الفرش اللي بتستخدم مع السيشوار عشان تدي حجم اكبر للشعر.

8- الفرشة الرفيعة اللي شعرها متفرق: والفرشة دي عشان نعمل بيها استايل للشعر ممكن تتني بيها الشعر لتحت او لفوق.

9- الفرشة المستديرة اللي شعرها متفرق: الفرشة دي بردوا بتستخدم مع السيشوار بتساعد على تدفق الهوا اكتر على الشعر وبتديه حجم اكبر.

شوفو معانا كمان ماسكات العسل الاسود لترطيب الشعر بعمق وتنعيمه.

مقالات متعلقه

7 نصايح هندية هتساعدك على تكثيف ولمعان شعرك

7 نصايح هندية هتساعدك على تكثيف ولمعان شعرك

7 نصايح هتخلي شعرك ينمو بشكل اقوى

7 نصايح هتخلي شعرك ينمو بشكل اقوى

10 حيل تجميلية بسيطة ممكن تعمليها عشان تطلعي بلوك احلى في وقت سريع

10 حيل تجميلية بسيطة ممكن تعمليها عشان تطلعي بلوك احلى في وقت سريع