ايه هي طريقة لبس الكارديجان في الربيع
بدأ موسم الربيع وبدأت معاه الحيره المعتادة في طريقة اللبس، لأن لبس الصيف خفيف جدا ولبس الشتا بقى تقيل جدا، ودايما بيظهر المنقد بتاعنا كلنا اللي هو الكارديجان والجميل ان السنة دي الكارديجان طالع موضة وبأشكال وموديلات كتيرة جدا، عشان كده لازم تعرفي ازاي تلبسيه بالشكل الصحيح، تعالي معانا واعرفي طريقة لبس الكارديجان في الربيع.
طريقة لبس الكارديجان بموديلاته المختلفة
الكارديجان القصير:
وده الشكل المعتاد للكارديجان، متوفر بخامات والوان متنوعة وبيليق على انواع لبس كتيره، لكن اهم حاجة في لبس الموديل ده من الكارديجان انك ماتلبسيهوش على حاجة اطول منه وخاصة البلوفرات لكن حاولي تنسقيه مع فستان او مع ممكن مع قميص بنفس الطول او اطول حاجة بسيطة، اما الالوان فلو حتلبس الكارديحان سادة حاولي يبقى القطعة اللي من تحته ملونة او مشجرة والعكس لو الكارديجان مشجر او مقلم يبقى القطعة اللي من تحت تكون سادة.
الراب الكارديجان:
الموديل ده كمان ظريف جدا لأن قصة الكارديجان مش بتبقى منتظمة او مستوية وده بيخلي شكله جذاب حتى لو لابساه مع حاجة سادة فهو بيغطي على شكلها ويخلي المظهر كله جميل، لكن خلي بالك بلاش تلبسيه خالص مع الجيب ولا مع البنطلون الواسع، لازم النوع ده من الكارديجان يتلبس مع بنطلون او مع جينز ضيق.
الكارديجان الواسع:
الكارديجان ده بيدي ايحاء ان هو مقاسه كبير عليكي عشان كده لو جسمك مليان شوية ابعدي عنه، وبالنسبة لطريقة لبسه فهو الافضل انه يتلبس مع جينز ضيق وبوط، وممكن تديله مظهر جذاب لو لبستيه مع الاسكارف او لو لبستي فوقه حزام من على الوسط
البوي فريند كارديجان:
وده الشكل المعتاد من اشكال الكارديجان، واللي طوله تقريبا بيبقى زي طول القميص العادي وغالبا بيكون له زراير من الامام، المميو في النوع ده من الكرديجان انه بيليق مع كل موديلات البنطلون، لكنه غالبا مش بيليق مع الفساتين، واهم حاجة وانتي بتختاري الموديل ده انك تشتريه على مقاسك بلاش يكون ضيق جدا ولا واسع جدا، وممكن يتلبس على تي شيرت او بلوفر خفيف او قميص.
الكارديجان الطويل:
موضة جدا السنة دي، وله اشكال كتيرة مثلا في منه بزراير وفي لأ، وفي منه له حزام، وفي كمان اللي له شراشيب من تحت، وفي منه بفتحتات طويلة من تحت الوسط ولغاية الاخر، الكارديجان ده ممكن تلبسه مع الوان او مع حاجة مشجرة، وممكن يتلبس فوق فستان او جيب ماكسي بس المهم مايكونش واسع من تحت زي الافازية او الكلوش، وتقدري كمان تلبسي معاه حزام من على الوسط، والجميل في الموديل ده انه متوفر من اول الطول اللي تحت الركبة على طول لغاية الكارديجان الطويل لحد الشوز، وده بيديكي الحرية في اختيار الطول المناسب لشكل جسمك.
قوليلنا ايه اكتر موديل كارديجان بيعجبك، وعرفينا ازاي بتلبسي الكارديجان مع استايلك المفضل
