11 نصيحة وحيلة عشان تخلي وشك يبان ارفع ومنحوت !
كلنا بنحب نهتم بجمالنا وبشرتنا ورشاقتنا وبنمشي على انظمة رجيم عشان نحافظ على رشاقة جسمنا لكن ساعات كتير بعد الرجيم الجسم بينزل لكن الوش بيفضل زي ما هو او ساعات حتى بيكون في بنات اجسامهم حلوة لكن وشهم بيبقى مقلبظ او مليان زيادة عن اللزوم والدهون اللي في الوش ده بتبقى شكلها مزعج خصوصا لما بتكون عند منطقة تحت الدقن او الخدود وبيطلع شكل وشنا مش حلو في الصور لان كلنا عارفين ان جمال الوش بيعتمد اكتر على بروز عضم الوش ودي تعتبر من مقاييس الجمال ان كل ما كان عضم الوش بارز ومتحدد بيبقى الوش احلى واجمل وبقى في دلوقتي في المكياج فن الكونتور اللي بيعتمد على نحت الوش عشان وشك يبان ارفع ويبرز العضم اكتر, عشان كده احنا جيبنا النهاردة لكل بنات حوا نصايح وحيل بسيطة هتخلي وشك يبان ارفع وشكله يطلع احلى في الصور وخصوصا السيلفي.
تعالوا نعرف مع بعض ايه هي الحيل اللي هتخلي وشك يبان ارفع:
1- من الحاجات اللي بتأثر على دهون الوش هي وقفتنا وقعدتنا اننا دايما بنقعد غلط وبنقف وقفات غلط بتأثر علينا وتخلي الدهون تتراكم في اماكن معينة اكتر من اماكن عشان كده دايما وانتي قعدة او واقفة خلي كتفك لورا والعمود الفقري مشدود وبشكل مستقيم يعني متقعديش محنية لقدام او تقعدي قعدة مش مظبوطة لان القعدة والوقفة الصح من الحاجات اللي بتعالج مشكلة الدقن المزدوجة.
2- الدهون في الوش ممكن تتكون بسبب العادات الغذائية السيئة والاكل اللي بيكون مش صحي ومليان دهون, واحيانا بيحصل من ان الجسم بيحبس المية جواه من اكلات معينة وده بيعمل انتفاخ في الوش, وعشان نتفادى ده اعملي دايما تدليك للوش ومنطقة الخدين والرقبة ده بيساعد على تنشيط الغدد الليمفاوية.
3- في كتير بيفتكروا ان كتر المية بيعمل انتفاخ لكن ده مش صح العكس هو الصحيح نقص المية هو اللي ممكن يعمل احتباس ويسبب انتفاخ لان لما يكون في مية زيادة في الجسم هتخرج اول بأول لكن لما تكون المية قليلة هتحتبس في الجسم, عشان كده اشربي كمية مية كفاية يوميا مش اقل من 8 كوبايات.
4- تمارين الوجه او اليوجا من الحاجات اللي هتساعدك تتخلصي من دهون الوش وهتخليه ارفع وكمان هتعالج الاكياس تحت العين وتجاعيد الوش, لو استمريتي عليها هتخلصك من دهون الوش خلال فترة من شهر لشهرين.
5- من الحاجات اللي ممكن تبين وشك بشكل ارفع انك تلبسي حلق طويل لانه بيعمل Shape للوش وبيحدده ويخليه يبان ارفع.
6- تسريحة الشعر كمان ممكن تتحكم في شكل الوش, عشان تبيني شكل وشك ارفع اعتمدي على تسريحة ديل الحصان المنخفض هيدي وشك حجم اقل وهيبين وشك ارفع.
7- مش بس استايل التسريحة ممكن يبين الوش ارفع كمان اللون من الحاجات اللي هتساعدك ان وشك يبان ارفع هي استايل صبغة الشعر اومبري او درجات واحنا اتكلمنا عليه قبل كده وازاي نعمله, لو عملتي اومبري غامق عند الجذور ونازل على فاتح عند الاطراف ده هيدي شكل ارفع لوشك.
8- اعملي تسريحة لشعرك تديه حجم اكبر عشان تاخد شوية من حجم وعرض الوش وتقلل من تدويرته شوية وتداري دهون الوش.
9- ممكن نعمل حيل بالمكياج اننا نعمل حاجة تلفت النظر عشان ميبقاش التركيز على دهون الوش ومنها رسمة الايلاينر عين القطة بتدي وسع اوي للعين وبتخلي شكلها حلو وملفت وده هيخلي التركيز على عينيكي اكتر من باقي الوش.
10- زي ماقولنا في البداية من الحاجات اللي ظهرت اوي في المكياج لنحت الوش هي الكونتور بيحدد عضم الوش ويبينه انحف وبيبرز جماله.
11- البلاشر كمان من الحيل اللي ممكن نستخدمها عشان نبين شكل وشنا انحف, والطريقة الصح عشان تحطي البلاشر ويطلع مظبوط ابتسمي ابتسامة خفيفة وحطي البلاشر على عضمة الخد.