7 اسباب هتخليكي تصبغي شعرك Crazy Color !

ريهام محمود
ريهام محمود
في
شعر
55082

في كتير من البنات بيحبوا دايما يصبغوا شعرهم ويغيروا لونه يعني كنوع من التغيير وتجديد اللوك لكن عادة معظمنا او كلنا بنصبغ شعرنا الالوان التقليدية يعني نفتح او نغمق عن لون شعرنا او نعمله هايلايت او يوم ما نقول عملنا حاجة جديدة نعمله اومبري مش بنعمل اكتر من كده لكن من فيكم جربت تصبغ شعرها الوان صبغة مجنونة؟ الالوان المجنونة او الغير تقليدية زي البينك والاصفر والازرق والبنفسجي او الفضي انتشرت اوي في الفترة الاخيرة وفي مشاهير كتير بقوا يعملوها وبقت دلوقتي موجودة في اغلب صالونات التجميل في مصر.

ولو انتي عايزة تعمليها في البيت دلوقتي في ماركات صبغات بقت بتنزل منها زي لوريال باريس وويلا تقدري تشتري اللون اللي يعجبك وتعمليها بنفسك في البيت ده غيرصبغة  كريزي كلر Crazy Colors اللى انتشر الكلام عنها اليومين دول و دية نوع انجليزى صبغات شعر مؤقته خاليه من الأمونيا.

crazy colors صبغة
crazy colors صبغة

لكن طبعا معظمنا ممكن يخاف يعمل الالوان دي لان شوية معندناش الجرأة اننا ناخد الخطوة ونصبغ شعرنا بالوان مجنونة, لكن احنا النهاردة هنقولك على 7 اسباب هتخليكي تصبغي شعرك الوان مجنونة ولو حتى لمره واحدة بس ومش لازم هتكرريها تاني.

تعالوا نعرف مع بعض الاسباب اللي هتخليكي تصبغي شعرك الوان صبغة مجنونة ولو لمرة واحدة !

1- من الاسباب اللي هتخليكي تصبغي شعرك لون مجنون هي المجاملة يعني لفت النظر وانك تعملي حاجة غير تقليدية وغير مألوفة هيخلي اللي حواليكي ياخدوا بالهم ويعلقوا عليه ودي حاجة بتزود الثقة في النفس غير لما بتعملي لون عادي ومحدش بياخد باله منه وده بالنسبة لنا احنا البنات شيء محبط لاننا دايما بنحب المجاملات وان اللي حوالينا ياخدوا بالهم من كل حاجة جديدة احنا بنعملها عشان كده اصبغي لون مجنون واستمتعي بمجاملات اللي حواليكي.

الوان صبغة مجنونة
الوان صبغة مجنونة

2- تاني حاجة هتشجعك تصبغي شعرك لون مجنون انك تبسطي نفسك يعني اعملي اللون For Fun  لنفسك عشان تستمعي وتنبسطي بالتغيير وتعملي شخصية منفردة لنفسك ومش شبه حد.

الوان الصبغة المجنونة 1
الوان الصبغة المجنونة 1

3- اكتر سبب هيخليكي تختاري لون مجنون هو كسر الملل, لو زهقتي من اللوك بتاعك ومن الالوان العادية التقليدية وعايزة تعملي حاجة جديدة وتكسري الملل اكيد لازم تختاري لون مجنون تصبغي بيه شعرك.

الوان الصبغة المجنونة 2
الوان الصبغة المجنونة 2

4- اللون المجنون او الغير تقليدي هيخليكي تعبري عن نفسك او شخصيتك يعني عادة كل واحدة فينا بتقدر تبين شخصيتها من اختيار لبسها يعني شكل اللبس بيعبر عن شخصية كل واحدة فينا, ليه منعبرش عن شخصيتنا بطريقة مختلفة باننا نصبغ شعرنا لون مجنون يعبر عننا وعن شخصيتنا.

الوان الصبغة المجنونة 3
الوان الصبغة المجنونة 3

5- مواكبة الموضة الالوان المجنونة من الحاجات اللي نازلة موضة اوي وفي مشاهير كتير اعتمدوها في اللوك بتاعهم ممكن نجرب نمشي على الموضة دي ولو لمرة واحدة بس مش اكتر.

الوان الصبغة المجنونة 4
الوان الصبغة المجنونة 4

6- الالوان المجنونة من الصبغات اللي مش بتقعد كتير على الشعر يعني بالكتير بتفضل على الشعر 6 اسابيع وبعد كده اللون بيروح يعني تقدري تجربيها وتستمعي بفترة ال6 اسابيع وبعد كده هترجعي للون شعرك الطبيعي وهتبقي عملتي تغيير ولو لفترة مؤقتة.

الوان الصبغة المجنونة 5
الوان الصبغة المجنونة 5

7- السبب الاهم لصبغ شعرك بلون مجنون هو انك اكيد هتحبيه لانك انتي اللي مختاراه وبيعبر عن شخصيتك وانك اخدتي خطوة جريئة في انك تغيري اللوك بتاعك حتى لو بعض اللي حواليكي استغربوه او محبهوش لكن انتي هتكوني عملتي حاجة غير تقليدية وبسطتي نفسك وفي النهاية هي حاجة مش مضره وزي ما قولنا مش هياخد اكتر من 6 اسابيع.

الوان الصبغة المجنونة 6
الوان الصبغة المجنونة 6

تعالوا نعرف شوية حاجات لازم نعرفها ونصايح نعملها عند استخدام الوان الصبغة المجنونة:

1- اول حاجة ان الوان الصبغة دي بتروح بسرعة زي ما قولنا انها بتقعد اكتر حاجة 6 اسابيع لكن اللون بيبدأ يبهت او يخف بعد خمس ايام بالكتير من الغسيل والشامبو.

2- نخلي بالنا لما نيجي نصبغ لازم نحط حاجة على كتفنا عشان نحمي هدومنا من الصبغة لان اللون مش بيطلع بسهولة من الهدوم, ولما تغسلي شعرك ابعديه عن هدومك وعن اي فوطة بيضا لحد ما ينشف لان وهو مبلول ممكن ينزل لون ويبقع الهدوم.

3- مننساش نلبس جوانتي عشان نحمي ايدينا من لون الصبغة ومنبوظش جلدنا وضوافرنا ويبقى عليها بقع صبغة من اللون ومش هتروح بسهولة.

4- لما هنيجي نغسل شعرنا هنلاقي اللون نزل كتير اوي وغامق وخصوصا لو انتي عاملة لون احمر هتحسي انك عاملة جريمة قتل :D فاغسلي شعرك كويس لحد ما ينزل منه اللون خالص.

5- عشان تحافظي على اللون اطول فترة ممكنة اغسلي شعرك بمية باردة.

6- لو لون شعرك الطبيعي فاتح او اشقر هتبقي محظوظة لان لون الصبغة هيظهر في شعرك على طول لكن الشعر الغامق محتاج محتاج بودرة تفتيح او تصبغي اكتر من مرة عشان اللون يبان يعني اللون هيبان تقريبا بعد 3 مرات صبغة بس افصلي ما بين كل مره بتصبغي فيها كام اسبوع او شهر يعني متصبغيش ورا بعض, ونخلي بالنا كمان ان بودرة التفتيح بتنشف الشعر وبتقصفه يعني الافضل نبعد عن الاختيار ده ونصبغ اكتر من مره ورا بعض افضل.

7- بعد الصبغة ما نحاولش نعمل شعرنا بالسيشوار كتير لان الحرارة العالية مضرة للشعر بشكل عام وعلى الشعر المصبوغ بشكل خاص لان كلنا عارفين ان الصبغة بتجهد الشعر شوية وبتخليه اضعف فنحاول على قد ما نقدر نتجنب الحرارة العالية على شعرنا.

8- اكتر الوان الصبغة الصعبة هي الوان الباستيل بيبقى غالبا صعب اللون يجي من اول مره .

9- في الوان بقى بيبقى صعب او تقريبا مستحيل انها تيجي نفس الدرجة اللي احنا عايزينها بالظبط زي اللون الاخضر يعتبر من اصعب الالوان.

10- في النهاية الوان الصبغة المجنونة تستحق التجربة فعلا لانها الوان مختلفة وجديدة وتغيير للوك بشكل جذري تماما وكسر للروتين زي ما قولنا.

دلوقتي هنقولكم كده سريعا الوان الصبغة المجنونة اللي تليق على كل لون بشرة:

1- البشرة البيضا: لو بشرتك بيضا ابعدي عن الالوان النيون او الفاقعة انسب الوان ليكي هي الوردي, والوان الباستيل زي الباستيل الازرق, والباستيل الرمادي.

الوان صبغة مجنونة للبشرة البيضا
الوان صبغة مجنونة للبشرة البيضا

2- البشرة الخمرية والقمحية: انسب الالوان ليها الوردي النيون, والبرتقاني, والازرق, والباستيل المرجاني الالوان دي بتنعكس على البشرة الخمرية وبتديها ضي حلو اوي.

الوان صبغة مجنونة للبشرة القمحي والخمرية
الوان صبغة مجنونة للبشرة القمحي والخمرية

3- البشرة السمرا: صاحبات البشرة السمرا يعتبروا المحظوظين في الوان الصبغة المجنونة لان بيليق عليهم تقريبا كل الالوان اي لون هتختاروا السمرا هيطلع عليها حلو يعني الوان النيون والباستيل الاتنين يمشوا مع البشرة السمرا, ممكن تختاري مثلا النيون البرتقاني, او الباستيل البنفسجي.

الوان صبغة مجنونة للبشرة السمرا
الوان صبغة مجنونة للبشرة السمرا

اعرفوا معانا كمان طريقة صبغ الشعر في البيت بنفسك بالخطوات.

مقالات متعلقه

7 اخطاء بتعمليها لما تصبغى شعرك فى البيت .. اعرفيهم

7 اخطاء بتعمليها لما تصبغى شعرك فى البيت .. اعرفيهم

اتعرفوا معانا على انواع الصبغات الخالية من الامونيا

اتعرفوا معانا على انواع الصبغات الخالية من الامونيا

اتعرفي معانا على طرق صبغ الشعر الاسود

اتعرفي معانا على طرق صبغ الشعر الاسود