18 خدعة عبقرية عشان تصلحي هدومك وتحافظي عليها !
كتير مننا بتقابلنا مشاكل في اننا نحافظ على الهدوم بتاعتنا سواء بطريقة الغسيل الصح لكل نوع قماش او لو مثلا في بقعة على حاجة عزيزة علينا وبنحب نلبسها ومش عارفين نتخلص منها لاننا معرضين يوميا ان هدومنا تتعرض لاي حاجة زي بقع المكياج مثلا اللي كتير مننا بتحصل معاهم ان هدومنا يجي عليها مكياج ومش بنعرف نتخلص ازاي من البقعة, او بلوفر مثلا يتنتش في مسمار او اي حاجة ودي بنتعرض لها كتير اوي في المواصلات او في الجامعة او في الشغل, ومش بس الهدوم كمان الجزم والاكسسوارات, عشان نحل لكم كل المشاكل دي وتقدروا تحافظوا على هدومكم واكسسواراتكم والحاجات الخاصة بيكم اطول فترة ممكنة جيبنالكم مجموعة خدع مفيدة وفعالة جدا تقدري تصلحي بيها هدومك وتحافظي عليها.
تعالوا اعرفوا معانا ايه هي الخدع اللي تعمليها عشان تصلحي هدومك وتحافظي عليها:
1- من المشاكل اللي بتقابلنا كتير وخصوصا في الشتا هي مشكلة وبر البلوفرات الصوف او الكشمير دايما بنلاقي الوبر بتاعها بيلزق في اي مكان بنقعد فيه او حتى على بنطلوناتنا الجينز بتتبهدل من وبر البلوفرات الصوف وعشان نتخلص من المشكلة دي هنجيب البلوفر ونحطة في كيس بلاستيك ونحطه في الفريزر على الاقل 3 ساعات ده هيخلي الوبر مينزلش من البلوفر.
2- طبعا كلنا مش بنستغنى عن البنطلونات الجينز لكن دايما بتقابلنا مشكلة انه بيبوظ من كتر الغسيل ولونه بيبهت وخامته بتبوظ والقماش بتاعه بيطرى وبيوسع لان مواد الغسيل بتأثر على الخامة بتاعته وبتبوظها وعشان نحل المشكلة دي بردوا هنجيب البنطلون الجينز ونحطه في كيس بلاستيك ونحطه في الفريزر كام ساعة ده هيقضي على اي روايح مش حلوة او اي بكتيريا وده بديل للغسيل المستمر يعني حاولي تغسلي الجينز بتاعك على فترات متباعدة على قد ما تقدري واستبدلي الغسيل بالطريقة دي.
3- بقع العرق تحت الابطين من اسوأ المشاكل اللي بتقابلنا لانها بتعلم في الهدوم ومع الوقت بتعمل بقع صفرا بيكون شكلها وحش جدا على الهدوم عشان نتخلص من المشكلة دي في طريقتين, الطريقة الاولى باستخدام الليمون افركي مكان البقعة بخليط من عصير الليمون والمية, والطريقة التانية نعمل عجينة بصودا الخبز”الكربوناتو” والمية ونفرك بيها مكان البقعة ونسيبها على البقعة لمدة دقايق وبعدين نغسلها عادي هتلاقوا البقع راحت خالص لان الليمون وصودا الخبز من المبيضات الطبيعية.
4- المشكلة اللي بتحصل لمعظم البنات وهي بقع المكياج على الهدوم ساعات غصب عننا بيقع على الهدوم كريم اساس عشان تتخلصي منها افركيها بكريم الحلاقة وبعدين اغسليها.
5- لو الهدوم عليها بقعة روج رشي على البقعة مثبت الشعر وسيبيه عليها دقايق وبعدين اغسليها.
6- لو دراع نضارة الشمس بتاعتك مفكوك ومش عارفة تصلحيه ازاي ممكن تثبتيه بمقوي الاظافر ادهنية بالمقوي هيثبت معاكي.
7- مقوي الاظافر بردوا ليه استخدام تاني ممكن تثبتي بيه زراير القميص او البلوزة بتاعتك لو مش متوفر معاكي خيط وابره وتقدري تخيطيه ممكن تثبتيه بشكل مؤقت بانك تدهنية بمقوي الاظافر عشان ميقعش.
8- لو عندك شوز قطيفة ومش عارفة تنضفيه ازاي طبعا لان كلنا عارفين التراب بيلزق على طول في القطيفة وبيبان عليه على طول عشان تنضفيه استخدمي مبرد الضوافر افركي الشوز بالمبرد هيلقط كل التراب اللي عليه وهينضفه.
9- لو عايزة تنضفي البوط الجلد من اي بقع استخدمي الخل الابيض لتنضيفها هاتي فرشة اسنان قديمة عندك تكون ناعمة وحطيها في الخل وابدأي افركي بيها البوط بالراحة.
10- لو في اي خدوش على الشوز بتاعك ممكن تصلحيها بانك تجيبي عود القطن الخاص بتنضيف الودان وتحطي عليه فازلين وتمسحي بيه مكان الخدش على الشوز بتاعك.
11- لو معندكيش ملمع احذية ومحتاجة انك تلمعي الشوز بتاعك ممكن تستخدمي اللوشن المرطب بتاع البشرة هاتي قماشة او فوطة صغيرة وحطي عليها اللوشن وامسحي بيها الشوز هتلاقيه رجع بيلمع.
12- لو راجعة من يوم طويل وكنتي لابسة الشوز بتاعك فترة طويلة ولقيتي فيه ريحة مش حلوة رشي فيه من جوه صودا الخبز “كربوناتو” وسيبيها شوية هتمتص كل الروايح اللي مش حلوة.
13- الشوزات الجلد اللميع مع الوقت لونها بيطفي وبيبقى شكلها مش حلو لو عايزة ترجعي لمعتها تاني رشي عليها من منظف الزجاج هتلاقيها رجعت تلمع زي الاول.
14- معظمنا بيلبس حمالة الصدر اللي فيها Push up اللي بيرفع الصدر بس ساعات من كتر الغسيل بتطلع من مكانها وبتضايقنا في اللبس عشان تحلي المشكلة ممكن تعملي عليها رقعة بحتة قماش عشان تقفليها ومتضايكيش في اللبس.
15- بقع الزيت على الهدوم من اصعب الحاجات اللي ممكن تقابلنا ومش بنعرف نتخلص منها الحل ليها انك تحطي عليها شوية من منظف غسيل الاطباق هيخلصك من البقعة بسهولة لان المنظفات دي بتمتص الزيوت والشحوم وكمان مش قوية على نسيج الهدوم يعني استخدميها على هدومك بشكل امن جدا.
16- لو هدومك اتنتشت في اي حاجة وده بيحصل لنا كتير عشان ترجعيها زي ما كانت شدي حوالين النتش يمين وشمال وفوق وتحت عشان ترجعي النسيج مع بعضه تاني.
17- لو الشراب بتاعك اتقطع ومعندكيش وقت تشتري واحد تاني عشان توقفي القطع وميطلعش على باقي الشراب حطي على القطع مقوي اظافر.
18- لو سوستة الجاكت او اي حاجة عندك علقت ومش عايزة تفتح وده بيحصل لنا كتير هاتي عود قطن بتاع تنضيف الودان وحطي عليه فازلين ومشيه على السوستة هتلاقيها اتفتحت معاكي بسهولة.
