12 علامة تبين انه معجب بيكي !
البنات بطبيعتهم رومانسيين وعاطفيين اوي وبيتأثروا بسرعة بالكلام الحلو والحركات اللي فيها اهتمام زايد أو حنية, لكن لازم نفرق ما بين الاعجاب او الكلام اللي بيتقال على سبيل المجاملة مثلا او مجرد كلام تقدير من شخص معين ليكي وممكن انتي تفسريها غلط او تفهميها بشكل تاني يعني مش اي تصرف يبقى معناه اعجاب الرجل بيكي لان طريقة التعبير عن المشاعر بتختلف ما بين الولد والبنت , عشان كده احنا النهاردة هنقول لكل بنات حوا علامات لو الولد عملها يبقى معجب بيكي…
ايه هي العلامات اللي تبين اعجاب الرجل بيكي؟ تعالوا نعرفها مع بعض:
1- من اكتر العلامات اللي ممكن تبين اعجاب الرجل بيكي هي نظرات العيون, لو انتوا في مكان واحد وبتتقابلوا باستمرار زي الشغل او الجامعة هتلاقيه دايما بيبص لك باستمرار وبيحاول يركز عيونه في عيونك ده اكيد بيدل على اهتمامه بيكي اللي هي اول مراحل الاعجاب.
2- لو لقيتيه بيتصل بيكي من غير سبب او بيبعت رسايل كتير اعرفي انه معجب بيكي, لو بيتصل بيكي بشكل مستمر من غير سبب للاتصال اعرفي انه بس عايز يسمع صوتك مش اكتر حتى لو كانت المكالمة قصيرة وسألك عن اخبارك بس هنا اعرفي انه هو معجب بيكي وبيخترع اي حاجة عشان يكلمك وخلاص.
3- لو وهو بيكلمك غير نبرة صوته وكلمك بنعومة اكتر اعرفي انه معجب بيكي لان تغيير نبرة الصوت من اكتر الحاجات اللي بنعلمها مع حد نكون معجبين بيه وهي على فكرة بتحصل بشكل لا ارادي مش مقصود ان نبرة الصوت بتتغير قدام الشخص اللي احنا معجبين بيه.
4- لو لقيتيه بيحاول انه يقضي معاكي وقت دايما وبيخلق الحجج عشان يشوفك, او بيتجنب مواعيد مع اصحابة مثلا عشان يكون معاكي انتي تأكدي ساعتها انه معجب بيكي وعايز يقضي معاكي اطول وقت ممكن.
5- الرجالة عموما مش بيتكلموا عن علاقاتهم ومش بيرغوا كتير في الموضوع ده زي البنات :) فلو حكى لاصحابة عنك اعرفي انه معجب بيكي, لان عادة الرجالة مش بيتكلموا عن علاقة الا لو كانت جدية, وبعد مرحلة الاصحاب هيقدمك لعيلته ويعرفهم بيكي وفي الحالة دي اعرفي انه معجب بيكي جدا والموضوع جدي بالنسبة له.
6- لما يتكلم معاكي هيحاول يعرف اكتر شخصيتك ويعرف انتي بتحبي ايه وبتكرهي ايه وهيحاول يتقرب منك اكتر في الحالة دي اعرفي انه معجب بيكي وعايز يعرف كل حاجة عنك ويبقى قريب منك.
7- في حاجة مهمة جدا تبين انه معجب بيكي لو ضحى بحاجة هو بيحبهاعشان يرضيكي او يكون معاكي يعني كلنا عارفين ان الرجالة بيحبوا الكورة ولو في ماتش محدش يقدر يقومهم من قدامه :) فلو ساب الماتش في مقابل انه يكون معاكي ده دليل انه معجب بيكي جدا وممكن يضحي بحريته وبالحاجة اللي بيحبها عشانك.
8- لو لقيتيه دايما في اغلب المواقف اللي انتي محتاجة حد جنبك فيها بيكون هو معاكي اعرفي انه معجب بيكي وعايز يبين لك ان هو سند وموجود في اي وقت هتكوني محتاجاه فيه, وهتلاقيه كمان جنبك من غير ما تطلبي منه ده.
9- انه يشجعك دايما على النجاح ويحفزك تحققي احلامك وطموحاتك تأكدي في الحالة دي انه معجب بيكي يعني مش العكس لان في رجالة كتير يحبوا يسيطروا ويلغوا شخصية البنت وفي بنات بتفتكر ده اعجاب او حب لكن ده مش صح المفروض العلاقة تكون خالية من الانانية واللي معجب بحد او بيحبه يحب يشوفه دايما ناجح ويكون فخور بنجاحه.
10- من اكتر الحاجات اللي بتبين اعجابة بيكي هو انه يتصرف ويتكلم زيك ودي حقيقة فعلا والموضوع بيحصل بشكل مش مقصود خالص, لما تلاقيه بدأ يتكلم زيك او يقول كلمات انتي دايما بتقوليها او يعمل حركات زي اللي انتي بتعمليها تأكدي ساعتها انه معجب بيكي وبيعمل ده عشان عايز يكون شبهك والموضوع ده الدراسات اثبتته انه من اكتر علامات اعجاب الرجل بالبنت.
11- لما يكلمك عن حياتة الشخصية ويحكيلك كل حاجة عنه اعرفي انه معجب بيكي, لان الرجالة عادة مش من النوع اللي بيحكوا عن حياتهم الخاصة او مشاكلهم لاي حد فلو حكالك اعرفي انه بيثق فيكي عشان كده فتح لك قلبه.
12- لو بياخد باله من التفاصيل البسيطة في شكل لبسك او شعرك مثلا وبيمدحك بكلام حلو اعرفي انه معجب بيكي, لان الرجالة في الغالب مش بياخدوا بالهم من التفاصيل الصغيرة فلو اخد باله منها وعلق عليها ده معناه انه مهتم ومعجب بيكي, ولو بيراعي مشاعرك دايما وبيحاول يفرحك ويعمل الحاجات اللي بتبسطك تأكدي انه معجب بيكي.
وفي النهاية نصيحتنا لكل بنات حوا متسسرعوش في الحكم يعني حطي كل العلامات في الاعتبار ولكن خلي خطواتك محسوبة لحد ما يبين لك فعلا انه جدي في علاقتة بيكي.
