اعرفوا معانا طرق لتخفيف الالم عند ازالة الشعر بالسويت
طبعا كل البنات تقريبا بيعانوا من مشكلة الم ازالة الشعر بالسويت وبالرغم ان في طرق تانية لازالة الشعر اسهل ومن غير الم زي الكريمات واستخدام الشفرة لحلاقة الشعر لكن الطرق دي لازالة الشعر مش مفضلة ابدا اننا نستخدمها لانها ممكن تسبب التهابات في الجلد وتخلي الشعر اللي هيطلع بعد كده خشن وشكله مش حلو خالص والاهم من ده كله انها من اكتر الاسباب اللي بتخلي الشعر يظهر تحت الجلد بعد ازالته لانها مش بتشيل الشعر من الجذور عشان كده احسن وافضل الطرق لازالة الشعر هي السويت لانها بتشيل الشعر من الجذور وكمان لان تأثيرها بيقعد فترة طويلة والشعر بياخد وقت على ما يطلع تاني لكن مشكلة السويت اللي كلنا بنعاني منها انها بتسبب الم عشان كده احنا النهاردة هنحل المشكلة دي لكل بنات حوا وجايبين لكم نصائح ووصفات لتخفيف الم ازالة الشعر.
نبدأ الاول مع شوية نصايح قبل ازالة الشعر هتساعد في تخفيف الالم:
1- من الافضل قبل ازالة الشعر اننا ناخد حمام سخن لان ده هيساعد ان مسام البشرة تتفتح وتوسع ود هيسهل ازالة الشعر بشكل كبير جدا.
2- بعد ما تاخدي حمام سخن قشري بشرتك باي مقشر مناسب لبشرتك ومتعودة تستخدمية عشان تتخلصي من الجلد الميت وده هيساعد كمان انه يخلصك من الشعر اللي بيكون تحت الجلد وهيخفف الم ازالة الشعر.
3- لما تيجي تشيلي الشعر شدي الجلد وشيلي عكس نمو الشعر يعني شدي الجلد بايد وشيلي الشعر بايدك التانية لان ده هيخفف الالم كتير, لان لو سيبتي الجلد رخو ومن غير ما تشديه ده بيخلي فيه الم لما بنيجي نشيله.
4- قبل ما نشيل الشعر نقصه بالمقص خصوصا في المناطق الحساسة وتحت الابطين لان ده هيخفف الالم بنسبة كبيرة جدا لان كل ما يكون الشعر طويل ده هيسبب لك الم اكتر عشان كده من الافضل تقصيه قبل ازالته.
5- متشربيش قهوة ولا نسكافية ولا اي حاجة فيها كافيين قبل ازالة الشعر ب 4 ساعات على الاقل يمكن تكون المعلومة دي جديدة على كتير مننا وده لان الكافيين بيخلي الجهاز العصبي يبقى حساس اكتر وهيخليكي تحسي بالم اكتر عشان كده ابعدي عن شرب المشروبات اللي فيها كافيين قبل ازالة الشعر.
6- بعد ما تشيلي الشعر مرري على بشرتك تلج لان ده بيخفف من الاحمرار والالتهاب اللي ممكن يحصل للبشرة بعد ازالة الشعر خصوصا البشرة الحساسة اللي بتتأثر بسرعة.
تعالوا بقى دلوقتي نشوف وصفات لتخفيف الم ازالة الشعر بالسويت:
1- الوصفة الاولى:
اول وصفة معانا مش بس بتخفف الالم كمان بتقلل ظهور الشعر بالتدريج مع الاستخدام هتلاحظوا ان الشعر بدأ يقل اوي في الجسم.
المكونات:
كوباية ترمس مر مطحون ” من عند العطار”.
3 كوبايات مية مغلية.
طريقة التحضير والاستخدام:
هنخلط الترمس المطحون مع المية المغلية في اي ازازة ببخاخ موجودة عندكم ورجي الازازة كويس اوي عشان تخلطي الترمس كويس مع المية وبعدين سيبيها 24 ساعة في اي مكان بدرجة حرارة الغرفة وبعد ال24 ساعة استخدميها عادي, قبل ازالة الشعر رشي المكان بالخليط ونشفيه كويس وبعدين ابدأي شيلي الشعر وبعد ما تخلصي رشي من الخليط مره كمان على بشرتك وسيبيه ينشف على بشرتك واغسليه بعد 10 دقايق, ورشي بشرتك بيه لمدة يومين بعد ازالة الشعر مرتين في اليوم سيبيه على البشرة 10 دقايق واغسليه, وكل ما يظهر الشعر شيليه وكرري نفس الطريقة بعد 3 او 4 مرات هتلاحظي ان الشعر بدأ يقل ويخف جدا من الجسم ومع الاستمرار مش هيظهر شعر خالص وهتلاقي بشرتك افتحت كمان لان الترمس بيساعد على تفتيح البشرة.
2- الوصفة التانية:
الوصفة دي بتمنع الالم وبتشيل الجلد الميت وبتساعد انها تشيل الشعر الصغير من البشرة.
المكونات:
خميرة.
عسل نحل.
مية ورد.
عصير ليمون.
طريقة التحضير والاستخدام:
حطي مقادير متساوية من الخميرة والعسل وخففيهم شوية بمية الورد وعصير الليمون والكميات على حسب ما انتي محتاجة وعلى حسب المنطقة اللي هتشيلي منها الشعر بعد ما تخلطي المكونات مع بعض كويس حطيها على المكان اللي هتشيلي منه الشعر وسيبيها لحد ما تنشف وبعدين ابدأي شيلي الشعر.
3- الوصفة التالتة:
المكونات:
3 معالق سكر.
نص كوباية مية.
قرص خميرة “من الصيدلية”.
طريقة التحضير والاستخدام:
دوبي السكر في نص كوباية المية ودوبي معاهم قرص الخميرة وقلبيهم كويس لحد ما السكر والخميرة يدوبوا في المية خالص وادهني المنطقة اللي هتشيلي منها الشعر بالخليط وسيبيه لحد ما ينشف وبعدين ابدأي شيلي الشعر بالسويت.
4- الوصفة الرابعة:
الوصفة دي هي لتخدير البشرة قبل ازالة الشعر وفي عندنا طريقتين لتخدير المنطقة قبل ازالة الشعر .
1- الطريقة الاولى: ادهني المنطقة بزيت القرنفل “من عند العطار” وسيبيه لمدة نص ساعة بس مش اكتر من كده عشان ميعملش حساسية للبشرة وبعدين امسحيه وابدأي شيلي الشعر.
ولو ملقيتوش زيت القرنفل بس هو عموما متوفر بس للبنات اللي مش هيلاقوه هو طريقته سهلة وممكن تعملوها في البيت هتجيبي نص معلقة كبيرة قرنفل مطحون وتحطي عليهم نص معلقة كبيرة زيت زيتون وتخلطيهم كويس وتحطيهم في علبة او ازازة وتسيبيه لمدة 10 ايام وبعدها تقدري تستخدمية عادي قبل ازالة الشعر بالطريقة اللي قولناها.
2- والطريقة التانية للتخدير: باستخدام معجون الاسنان ادهني المنطقة اللي هتشيلي منها الشعر بمعجون الاسنان سواء المنطقة الحساسة او الرجل او الايد او تحت الابطين وسيبيه خمس دقايق وبعدين امسحيه وابدأي شيلي الشعر ده هيخفف الالم جدا ويمكن متحسيش بالم خالص كمان لان معجون الاسنان هيعمل تأثير مخدر على البشرة ومش هيخليكي تحسي باي الم.
اعرفوا معانا كمان ازاي نمنع ظهور الحبوب عند ازالة الشعر و وصفات لازالة الشعر نهائيا.
