وصفات و حيل ازاى ممكن تعرقى اقل
مهما كان الفصل اللى احنا فيه حتى لو شتاء ، جسمنا بيعرق مع اى حركة او مجهود زيادة. و كمان احنا خلاص على ابواب الربيع و الصيف و فى الفصول دى بنعرق اكتر من اى وقت تانى فى السنة حت لو ما بنعملش مجهود جامد بسبب ارتفاع درجة الحرارة و جسمنا بيفقد سوايل كتير ، و ده ممكن يحطنا فى مواقف كتير مش لطيفة خصوصا مع ريحة العرق اللى بتبقى متلاحظة و بقع العرق اللى بتبان على الهدوم . علشان كده فى المقال ده ” بنات حوا ” هتعرفك 8 طرق وحيل طبيعية لعرق اقل خلال يومك.
1- قللى من اكلك و اتجنبى الاكل الحامى spicy food :
الاكل الحامى او ال spicy بيحتاج مجهود اكبر من جسمك علشان يتم هضمه ، بالاضافه الى انه بيرفع من حرارة الجسم بشكل كبير اثناء اكله و ده بيخلى جسمك يعرق بضعف معدل التعرق الطبيعى . اتجنبى تناول الاكل ال spicy على قد ما تقدرى ، او لو كنتى من عشاقه يبقى على الاقل ابعدى عنه خلال الايام اللى بتبقى حر اوى او درجة حرارة الجو فيها عالية.
2- الملابس القطنية هى صديقتك الاقرب !
ايوة ، فى الصيف او الايام اللى درجة حرارتها عالية العدى تماما عن الاقمشة الحرارية او الستان و البوليستر و الالياف اصناعية طن واعتمدى بشكل اكر على الملابيس القطنية لان نسيجها طبيعى و بتحافظ على رطوبة الجسم و مابتخليهوش يسخن ، كمان بتتشرب العرق احسن من اى نوع قماش تانى و بتدى المشساحة لجسمك يتنفس ، علشان كده الملابس القطنية بتعتبر من افضل الطرق الطبيعية لعرق اقل.
3- قللى من الملح فى اكلك :
لما بتاكلى اكل مملح بزيادة ، جسمك بيفضل يحاول يوازن كمية المح اللى دخلتله علشان يفضل الجسم محافظ على رطوبته . العملية دى بتتطلب مجهود كبير من جسمك علشان كده هتلاحظى بعد اى اكلة مملحة انه بتعرقى بزيادة . ابعدى عن الاكل المملح خصوصا فى الايام الحر.
4- ابعدى عن القهوة و الكافيين :
طبعا القهوة و الشاى جزء لا يتجزأ من الروتين اليومى بتاعنا علشان نصحصح و نقدر ننزل شغلنا او كليتنا ، لكن نسبة الكافيين الكتيرة اللى جسمنا بياخدها من المشروبات دى بتخلى النظام العصبى بتاع الجسم يحاول يسيطر على نسبة الكافيين دى فده بيخليه ينتج عرق اكتر.
5- اعتمدى على مزيل العرق :
مزيل العرق هو رقم واحد فى مستحضرات الصيف ، خليه دايما بجنبك و ماتستغنيش عنه ، الغلطة اللى دايما بنعملها اننا بنستخدمه لما نلاحظ ريحة العرق او نحس بيه ، استخدمى مزيل العرق على بشرتك و هى جافه علشان تحصلى على نتيجة افضل و على فترات منتظمة خلال اليوم.
6- عصير الليمون لـ ” عرق اقل ” !
ايوة ، عصير الليمون فعال جدا فى التقليل من العرق و القضاء على ريحته ، اعصرى ليمونة و بقطنة امسحى بيها تحت دراعك ،و هو جاف ، جسمك هيتشرب الليمون و هتلاحظى انه العرق قل بصورة ملحوظة.
7- عايزة عرق اقل ، جربى خل التفاح:
امسحى بقطنة مبللة بخل التقاح تحت دراعك و نامي بيه طول الليل ، و الصبح اغسليه بمياة و صابون . الوصفة دى هتخلىكى تلاحظه انه بقى فيه عرق اقل بصورة كبيرة ، كرريها يوميا فى الصيف.
8- استخدمى الكتافات او ” الفوط الصحية ” كبطانة للعرق!
انتشر دلوقتى بطانة العرق اللى ممكن تجيبيها و بتتلبس او تتلزق فى الهدوم عشان تمتص العرق و تجنبك الاحراج بس المنتج لسه منتشرش اوى فى مصر عشان كده جبنالك البديل.. ايوة اللى انتى قريتيه ده صح ! ” الفوط الصحية ” او اليومية من الحجم الصغير ممكن تبقى نافعة جدا فى انك تدارى عرقك تماما خصوصا لو لابسة قماش حريرى او ستان و العرق بيبان فيه فى مناسبة او خروجة مثلا ، هاتى واحدة من الفوط الصحية من الحجم الصغير او اقطعى واحدة من الحجم الكبيرو الزقيها على منطقة الدراع من تحت على بلوزتك او فستانك و هى هتتشرب العرق تماما و مش هيبان منه اى حاجه ابدا ، وممكن كمان تجربى انك تلزقى او تخيطى واحدة من ” الكتافات السفنج ” اللى كانوا بيستخدموها قبل كده فى انهم يرفعوا اكتاف البلوزات او الجواكت بنفس الطريقة ، الطريقتين دول ناجحين و مفيدين جدا.
