ازاي تخلي ايدك اصغر وارفع واحلى باستخدام المانيكير بس!

بقلمريهام محمود فيأظافر visibility5233

في بنات كتير مننا لما بنحط المانيكير بنبقى مش راضيين عنه على ايدينا بالرغم اننا بنكون احنا اللي مختارين اللون ومتوقعين انه هيبقى حلو على ايدينا لكن لما بنحطة بنلاقي نتيجة غير مرضية بالنسبة لنا وشكله بيطلع مش حلو على الايد ومش بنكون عارفين السبب,  لكن السبب في ده ان مش كل الوان المانيكير ممكن تليق على اي ايد يعني الالوان اللي تليق على البشرة البيضا غير السمرا ومش بس كده انتي كمان بالالوان تقدري تتحكمي في شكل ايدك وضوافرك  في الوان ممكن تبين ايدك شكلها اصغر او ارفع او تديكي لون مختلف عن لون بشرتك الاصلي فلما بنختار لون غلط بتطلع النتيجة مش حلوة, عشان كده احنا النهاردة هنقول لكل بنات حوا اسرار المانيكير وازاي تختاري الوان المانيكير اللي تخليكي تتحكمي في شكل ايدك وضوافرك وايدك تظهر بشكل حلو وتكوني راضية عنه.

1- الوان المانيكير اللي تخلي شكل ايدك اصغر:

عشان تخلي ايدك تبان بشكل اصغر ابعدي عن الالوان الفاقعة اوي او النيون اختاري الالوان الهادية اكتر.

بالنسبة للبشرة البيضا: انسب الالوان ليها عشان تبان اصغر هي الالوان الوردي.

البشرة المتوسطة: اللون البرتقاني المرجاني اللي هو بيكون مايل للاحمر شوية هو انسب لون ليها.

البشرة السمرا: انسب لون ليها اللون البرتقاني الصريح.

البشرة السمرا الداكنة: اللون الاخضر النعناعي اللي بيكون لون ورق النعناع, واللون الازرق.

الوان المانيكير اللي تبين شكل ايدك اصغر
الوان المانيكير اللي تبين شكل ايدك اصغر

2- الوان المانيكير اللي تدي لون تان لبشرتك:

لو عايزة لون بشرتك تظهر كانها معمولها تان او بلون برونزي اختاري الوان الباستيل, و الاصفر, والبرتقاني, والاخضر.

بالنسبة للبشرة البيضا: اختاري اللون الاخضر ده انسب لون ليكي ممكن يدي لون بشرتك لون برونزي.

البشرة المتوسطة: انسب الوان هي الوردي المرجاني اللي بيكون مايل على الموف شوية, واللون السيمون.

البشرة السمرا: بردوا اللون الاورانج هو الانسب ليها.

البشرة السمرا الداكنة: انسب لون ليها هو اللون الاصفر الليموني.

الوان المانيكير اللي تدي لون برونزي لبشرتك
الوان المانيكير اللي تدي لون برونزي لبشرتك

3- الوان المانيكير اللي تخلي ضوافرك اكبر او اعرض:

الالوان اللي ممكن تخلي ضوافرك تبان بشكل اكبر هي الالوان الفاتحة من اول الابيض لحد الالوان الباستيل.

للبشرة البيضا: انسب الوان ليها هي درجات الوردي.

البشرة المتوسطة: انسب الوان ليها هي الاوف وايت مع تاتش رمادي وازرق, واللون الابيض.

البشرة السمرا: اللون البيج هو افضل لون للبشرة السمرا.

البشرة السمرا الداكنة: انسب لون ليها هو اللون البينك النيود.

الوان المانيكير اللي تبين ضوافرك اكبر
الوان المانيكير اللي تبين ضوافرك اكبر

4- الوان المانيكير اللي تخلي ضوافرك اصغر:

دي بقى عكس اللي فوق لو انتي ضوافرك اصلا عريضة وعايزة تبينيها اصغر يبقى في الحالة دي هتعتمدي على الالوان الغامقة لانها هتبين الضوافر بحجم اصغر.

للبشرة البيضا: انسب لون ليها هو الازرق الغامق.

البشرة المتوسطة: اللون الرمادي الغامق هو انسب لون.

البشرة السمرا: انسب لون هو اللون الاحمر الغامق المايل للنبيتي.

البشرة السمرا الداكنة: من انسب الالوان ليها هو اللون الاخضر الغامق.

الوان تبين ضوافرك اصغر
الوان تبين ضوافرك اصغر

5- الوان المانيكير اللي تخلي ايدك تبان ارفع:

لو عايزة ايدك تبان بشكل ارفع ايه الالوان اللي هنستخدمها؟

بالنسبة للبشرة البيضا: انسب لون هو اللون البينك الفاتح اوي.

البشرة المتوسطة: اختاري اللون النيود اللي هو بيكون لون البشرة.

البشرة السمرا: انسب لون ليها اللون الوردي المايل للبيج.

البشرة السمرا الداكنة: اللون التوفي او البيج.

الوان تبين ايدك ارفع
الوان تبين ايدك ارفع

شوفي معانا كمان طريقة عمل المانيكير للايدين في البيت بالخطوات.