ازاي نداري خطوط وتجاعيد تحت العين بالمكياج بالخطوات؟
احنا اتكلمنا قبل كده عن اسباب خطوط وتجاعيد تحت العين وعلاجها بالوصفات الطبيعية بس لحد ما الوصفات بتاعتنا توصل للنتيجة المطلوبة اللي احنا عايزنها اكيد مش هنخرج والخطوط والتجاعيد باينة تحت عنينا, عشان كده احنا جيبنالكم طريقة اخفاء الخطوط والتجاعيد بالمكياج.
تعالوا نعرف الاول نصايح لازم نحطها في الاعتبار مع المكياج عشان نداري بيها الخطوط والتجاعيد:
1- اول حاجة نستخدم مكياج خفيف يعني نحط طبقة خفيفة لان المكياج التقيل هيتكتل على البشرة ويدخل في خطوط البشرة ويبين الخطوط والتجاعيد اكتر بدل ما يداريها.
2- اختاري درجة كريم الاساس المناسبة للون بشرتك اللون المفروض يكون مطابق للون بشرتك او اغمق من لون البشرة بدرجة ده هيساعد ان الخطوط والتجاعيد تتدارى ومتبانش على بشرتنا.
3- حطي طبقة خفيفة من البودرة متكتريش منها لانها بردوا هتدخل في خطوط البشرة وهتبين التجاعيد اكتر, والافضل انك تحطي البودرة بالفرشة مش بالسفنجة عشان تتوزع كويس على بشرتك, و لو ينفع تستغنى عن البودر تماما يكون افضل.
4- استخدمي كريم مرطب تحت العين وبعدين الكونسيلر, واستخدمي كونسيلر ابيض او اصفر دول انسب حاجة عشان نداري بيهم الخطوط والتجاعيد, ولما تيجي تحطي الكونسيلر متفركيش تحت العين لان الجلد في المنطقة دي حساس جدا افردي بطريقة الربت او الخبط بالراحة جدا.
5- اتجنبي المكياج اللي بيلمع على العين عشان ميبقاش ملفت اوي وتلفتي النظر اكتر للخطوط والتجاعيد استخدمي دايما للعين المكياج المات او المطفي.
6- استخدمي الايشادو البودر ده انسب نوع للي عندهم مشكلة الخطوط والتجاعيد حوالين وتحت العين لانه بيساعد انه يداريها, واتجنبي الايشادو الكريمي لانه هيبين شكل عينيكي مرهق, والافضل تحطي الوان ايشادو فاتحة وابعدي عن الالوان الغامقة.
7- وفي حيلة ذكية ممكن تعمليها عشان متلفتيش النظر للخطوط والتجاعيد وتخلي التركيز على حاجة تانية انك ترسمي عينيكي بايلاينر اسود غامق وتحطي كذا طبقة ماسكارا على الرموش اللي فوق تدي كثافة وطول لرموشك, كده هتظهري عينيكي بشكل حلو وتبعدي النظر عن الخطوط والتجاعيد بطريقة ذكية.
دلوقتي تعالوا نعرف بالخطوات ازاي نداري خطوط وتجاعيد تحت العين بالمكياج:
1- اول خطوة هنحط كريم مرطب حوالين وتحت منطقة العين.
2- تاني خطوة هنفرد الكونسيلر تحت العين بطريقة التربيت او الخبط, وانسب لونين زي ما قولنا الابيض والاصفر.
3- بعد كده هنحط طبقة خفيفة من كريم الاساس المطابق للون البشرة او اغمق من البشرة بدرجة ويكون مطفي.
4- اخر خطوة هي البودرة وبردوا نحط منها طبقة خفيفة جدا, وتكون نفس لون البشرة.
ممكن كمان تجربى حيلة زيت الجوجوبا عشان تخفي الخطوط تماما بعد المكياج:
1- بعد ما تحتي كريم الأساس أو الكونسيلر تحت عينك حطي نقطة من زيت الجوجوبا علي ضهر ايدك .
2- بطرف صباعك خدي حته بسيطه أوي من الزيت و أهم حاجة إنك متخديش كتير عشان متبوزيش الحيلة.
3- بصباعك اللي فيه الزيت طبطبى و دلكي تحت عينك برقة.
4-هتلاقي إن الزيت تغلغل في الكونسيلر و قضي علي الخطوط المزعجة ديه و داراها على طول.
زيت الجوجوبا في تركيبته مشابه جدا للزيت الطبيعي اللي البشرة بتفرزة عشان كده نقطة صغيرة منه هتعمل كأنها زيت البشرة الطبيعي وهتخليه يدوب مع الجلد من غير ما يسيح المكياج اللي حطيناه تحت العين, ده طبعا غير فوايد زيت الجوجوبا عامة للبشرة ومحاربة التجاعيد لإحتوائه علي فتامين C + E
الحيلة دية تتعمل بزيت الجوجوبا بس لان اى زيت تانى هيبقة تقيل وهيسيح المكياج.
ازاى تخفى خطوط المكياج اللى بيسببها الكونسيلر تحت العين باستعمال زيت الجوجوبا؟
الخطوات بسيطة وسهلة جدا لو نفذناها مع النصايح اللي قولناها الخطوط والتجاعيد هتختفي تماما.
