اعرفوا معانا مكياج ال 3 وال 5 وال 10 دقايق !

معظم البنات تقريبا بياخدو وقت طويل قدام المرايا عشان يظبطوا مكياجهم ويعملوا مكياج يكونوا راضيين عنه ويطلعوا بلوك حلو بس دي بتكون مشكلة لو احنا مستعجلين ومعندناش وقت نعمل مكياج ومش بنعرف نعمل ايه في الحالة دي, عشان كده احنا جيبنا لكل بنات حوا مكياج سريع يتعمل في وقت قياسي جدا بتلات طرق مكياج بسيط في 3 دقايق ومكياج متوسط في 5 دقايق ومكياج للخروج بالليل في 10 دقايق.

تعالوا نشوف مع بعض اول حاجة مكياج ال 3 دقايق:

 ده مكياج بسيط اوي ينفع للخروج الصبح او للجامعة.

1- اول حاجة في 15 ثانية هنحط البرايمر بتاعنا اللي هو اساس المكياج وبيثبت مكياجنا طول اليوم.

2- في دقيقة هنستخدم اداة تني الرموش “Eyelash Curler” تلات مرات لكل عين عشان ندي حجم اكبر واطول لرموشنا.

3- هنحط الماسكارا على الرموش والخطوة دي هتاخد مننا دقيقة.

4- واخر حاجة في 45 ثانية هنحط كريم الاساس اللي بيكون كريم اساس وبودرة مع بعض او ممكن نستبدله بكريم ال BB يعني هنستخدم حاجة خفيفة جدا على البشرة.

هنلاحظ طبعا في اللوك ده اننا اكتفينا بحاجات بسيطة جدا في المكياج واستغنينا عن حاجات كتير لانه لوك طبيعي وبسيط جدا.

مكياج ال 5 دقايق:

ده مكياج متوسط وكحد اقصى مش هياخد مننا اكتر من 5 دقايق عشان نعمله.

1- في دقيقة هنحط الكونسيلر بتاعنا تحت العين عشان نداري اي هالات سودا.

2- في 30 ثانية هنحط البلاشر او احمر الخدود على عضمة الخد, وهنستخدم لون طبيعي قريب من لون بشرتنا.

3- وفي 30 ثانية كمان هنحط البودرة البرونزية فوق عضمة الخد وعلى الجبين من الجانبين والانف والدقن وخط الفكين عشان ندي اضاءة حلوة للوش ونبرز عضم الوش.

مكياج ال 10 دقايق:

دي طريقة لمكياج اقوى شوية ينفع للخروج بالليل.

1- هنحط هايلايتر على عضم الحاجبين وعلى عضمة الخدين عشان ندي اضاءة ليهم ونظهرهم والخطوة دي مش هتاخد مننا اكتر من دقيقة واحدة بس.

2- في دقيقتين هنرسم الايلاينر بتاعنا على خط الرموش من فوق.

3- في دقيقة كمان هنحط الماسكارا بتاعتنا على الرموش عشان نديها كثافة وطول اكتر.

4- اخر حاجة واللمسة الاخيرة في المكياج ومش هتاخد مننا كمان اكتر من دقيقة هي الروج.

كده نكون خلصنا تلات طرق لمكياج سريع جدا والتوقيتات دي حد اقصى عشان نخلص المكياج بتاعنا يعني ممكن كمان نخلصه في اقل من كده, ياللا جربوه وقولوا لنا جربتو اي طريقة فيهم واكتبوا لنا اخدتوا وقت قد ايه.

شوفو معانا كمان طريقة لمكياج ناعم وهادي بالخطوات.